Son zamanlar xanımlar arasında rəngli və optik linzalara tələbat artıb. Belə ki, linzalar həm gözlərinin rəngini dəyişmək istəyən xanımlar üçün, həm də eynək taxmaq istəməyən və bunu özünə kompleks edən görmə qabiliyyəti zəif olan insanlar üçün əvəzsiz vasitə hesab olunur. Lakin mütəxəssislər bildirirlər ki, linzaların müsbət cəhətləri ilə yanaşı, mənfi cəhətləri də var. Belə ki, keyfiyyətsiz və ya istifadə qaydalarına düzgün riayət olunmayan linzalar gözlərdə müxtəlif infeksiyaların yaranmasına, görmə qabiliyyətinin itirilməsinə səbəb olur.
Linzalarla bağlı problemlər onların əsasən keyfiyyətsiz və saxta variantlarının da bazarda yer alması ilə izah olunur. Belə ki, linzalar və onları təmizləmək üçün istifadə olunan göz suları artıq optikalarla yanaşı, qızğın alver gedən bazarlardakı piştaxtalarda da satılır. Keyfiyyətsiz linzalar tək səyyar formada deyil, eyni zamanda, klinikalarda da satılır. Məlumatlara görə, bəzi klinikalara Türkiyədən qaçaqmalçılıq yolu ilə linzalar gətirilir.
Eyyub Hüseynov: “… qaçaqmalçılarla əlbir olan həkimlərin sayəsində...”
"Azad İstehlakçılar" İctimayi Birliyi (AİİB) əhaliyə göz protezlərinin (linzaların) qaçaqmal variantlarından ehtiyatlı olmaları ilə bağlı xəbərdarlıq edib. Birliyin sədri Eyyub Hüseynov bizimlə söhbətində qeyd etdi ki, göz əməliyyatlarında istifadə olunan göz protezlərinin-linzaların qaçaqmal yolu ilə gətirilən partiyalarından bəzi göz klinikalarında geniş istifadə olunur: "Bir çox şirkətin istehsal etdiyi, xüsusən "Alcon" şirkətinin "Acry sof" göz protezləri Türkiyədən qanunsuz yollarla ölkəmizə gətirilir. Məlumatların təhlili göstərir ki, bu mallar heç bir gömrük sənədləşdirilməsi aparılmadan, sertifikatlaşdırılmadan, Səhiyyə Nazirliyinin idxal icazəsi olmadan bazara daxil olur”.
Ekspertin sözlərinə görə, qeyd olunan mallar standartların tələbinə cavab verməyən bir şəraitdə saxlanır, daşınır, şübhəsiz ki, dövlətimizin mövcud qanunvericiliyini pozmaqla bərabər, qaçaqmalçılarla əlbir olan həkimlərin sayəsində istehlakçıların sağlamlığını da risk altında qoyur: “Bu linzaların bir hissəsi Türkiyədə tibbi sığorta xidmətindən sui-istifadə edən şəxslərin dəstəyilə ölkəmizə qutusuz, yəni açılmış şəkildə daşınır. Qutuya qablaşdırılmış qaçaqmal linzalar Türkiyə üçün nəzərdə tutulduğundan, orijinal markalanmanın üstünə türk dilində stiker yapışdırılır".
Günel CƏLİLOVA
