Tanınmış din xadimi, "Tövbə" cəmiyyətinin sədri Hacı Əbdül Əbdülov jurnalistlərə avtomobil hədiyyə edəcək. Bu barədə Hacı Əbdül Əbdülov özü məlumat verib.
Din xadimi bildirib ki, avtomobillər tövbə etməyi ən çox təbliğ edən jurnalistlərə təqdim olunacaq: "Jurnalistlərin təbliğat gücü böyükdür. Onların sayəsində tövbə edən insanlarımızın sayı artır. İnşallah, avtomobilləri 2020-ci ilin Milli Mətbuat Günü ərəfəsində Azərbaycanın peşəkar jurnalistlərinə hədiyyə edəcəyik. Təbii ki, mükafatlar tövbə etməyi ən çox təbliğ edən jurnalistlərə veriləcək".
Hacı Əbdül Əbdülov əlavə edib ki, avtomobillər “Xəzər” avtomobil zavodunun istehsalı olan maşınlar ola bilər. O bildirib ki, “Tövbə”nin bu qədər vəsaiti yoxdur: “Buna görə də qərara almışıq ki, bank hesabı açılsın və xalqın, xeyriyyəçi insanların gücü sayəsində mükafat fondunu formalaşdıraq. Artıq bu təşəbbüsümüzü bildikdən sonra bir sıra xeyriyyəçilər və şirkət rəhbərləri belə xeyirxah iş üçün mümkün qədər vəsait köçürəcəklərini vəd ediblər.
Müsabiqə mövzusunun konkretləşdirilməsi, münsiflər heyətinin formalaşdırılması işi Qafqaz Müsəlmanları İdarəsi Elmi-Dini Şurasının sədri, hörmətli akademik Vasim Məmmədəliyevə həvalə edilib. Ancaq tərəfsizlik olsun deyə, “Tövbə”dən heç kəs münsiflər heyətinə qatılmayacaq. Yəni tamamilə neytral, obyektiv mütəxəssislər olacaq həmin heyətdə”.
Hacı Əbdülün bu təşəbbüsünə media ekspertlərinin münasibəti necədir?
Azər Həsrət: “Maraqlıdır, hansı gerçək jurnalist belə bir mükafata əyiləcək?”
Media eksperti Azər Həsrət “Bakı-Xəbər”ə açıqlamasında bildirdi ki, olduqca maraqlı və düşündürücü bir mövzudur: “Hər yerindən duran jurnalistlər üçün mükafat təyin edib və bunun müqabilində istədiyi yazını yazdırmağa istiqamətləndirmək istəyəcəksə, onda biz qələmi atıb başqa işlə məşğul olmalıyıq. Jurnalistikanın tövbə ilə nə əlaqəsi ola bilər? Bu nə təbliğatdır, nə üçün aparılır? Maraqlıdır, hansı gerçək jurnalist belə bir mükafata əyiləcək? Mən düşünmürəm ki, normal jurnalistlər belə bir mükafatı əldə etmək üçün çalışsınlar. Dinə sayğımız var, bu öz yerində. Amma kiminsə bundan istifadə edib, jurnalistika ilə manipulyasiya etməsi yolverilməzdir. Şəxsən mən bir jurnalist kimi bundan çox narahat oldum. Din sərbəst seçimdir, bu hər kəsin öz azadlığına buraxılır. Bizim dövlət vicdan azadlığına böyük önəm verir. Kim istər, dinə gələr, kim istər ondan dönər. Heç kimi nəyəsə məcbur etmək olmaz. Konkret dini təbliğat aparacaq adamlara mükafat vəd edilməsi isə dünyəvi quruluşda yolverilməz bir faktordur. Aydın düşünən insanlarımız, dəyərli ziyalılarımız bu məsələyə sərt reaksiya verməlidirlər. Hacı Əbdül hansısa xeyirxahlıq etmək istəyirsə, qoy bunu etsin. Ehtiyacı olan ailələrə yardım göstərsin, hansısa tələbənin təhsil haqqını ödəsin, bir xəstəyə əl tutsun. Yoxsa onun diqtə etdiyi dəyərləri təbliğ edən jurnalistləri maşınla şirnikləndirmək çox ayıb bir məsələdir. Dünyəvi dövlət üçün xarakterik hal deyil. Orada Vasim Məmmədəliyevin də adını çəkir ki, münsifliyi o edəcək. Ümid edirəm ki, dəyərli ziyalımız bu təşəbbüsün doğru olmadığını Hacı Əbdülə izah edəcək. Qoy bizim fikirlərimiz xeyirxahlığa, dinə qarşı kimi dəyərləndirilməsin. Bu cür incə mövzular ətrafında jurnalistika ilə manevrlər etmək olmaz. Bu, bizim peşəmizə sayğısızlıqdır. Həmkarlarımı bu məsələdə məsafəli davranmağa çağırıram”.
Məhəmmədəli QƏRİBLİ
