Deyir ki, yüz dəfə imama yalvarınca bir dəfə Allaha yalvar. Əslində, doğru deyimdir. Bizdə təəssüf ki, yalnız yaşlı nəsil deyil, hətta yeniyetmə və gənclər də bir qədər xurafata meyl göstərirlər. Cadu, “dil-ağız bağlama” kimi cəhalət örnəyi olan hallara gənclərimizin də meyl etməsi diqqəti çəkir.
Biz bunu daha çox ali məktəblərə keçirilən qəbul imtahanlarında müşahidə edirik. Əvvəllər imtahana gedənlər özləri ilə şparqalka götürərdilərsə, indi şparqalkanı dua, seyid şəkilləri əvəzləyir. Saysız abituriyent var ki, onlar öz həyəcanlarını yox etmək, imtahanda yüksək nəticə qazanmaq üçün müxtəlif falçılara üz tutur, onların yazdıqları duaları özləri ilə imtahana götürür.
Bu hal hər il yaşansa da, keçən illərlə müqayisədə budəfəki imtahanlarda özünü daha kütləvi şəkildə göstərib. Bakıda və bölgələrdə II və III ixtisas qrupları üzrə ali məktəblərə növbəti qəbul imtahanının gedişində abituriyentlərin üzərində aparılan yoxlama zamanı dualar, seyidlərin şəkilləri çıxıb. Hətta imtahan olan binada çəkiliş aparılan zaman da diqqət abituriyentlərin üzərindən çıxan bəzi əşyalara yönəlib. Abituriyentlərin öz biliklərinə güvənmək əvəzinə, xurafata meyl etmələri təəccüb və təəssüf doğurur.
Son zamanlar cəmiyyətimizdə yayılan bu kimi halların mövcudluğundan təəssüf hissi keçirən dinşünaslar hesab edirlər ki, gənclərin kütləvi şəkildə xurafata meyl etməsinin səbəbi dini maarifçiliyin zəif olmasıdır.
İsmayıl Əhməd: “... imtahan və digər məsələlərdə dinə üz tutması dənizdə batan insanın saman çöpündən yapışması kimidir”
Dinşünas İsmayıl Əhməd mövzunu şərh edərkən “Bakı-Xəbər”ə bildirdi ki, şübhəsiz, bu kimi hallar abituriyentlərin özünə güvənsizliyindən irəli gəlir. “Abituriyentlərin imtahanlara dualar, seyid şəkilləri ilə getməsi həm onların özünə güvəninin olmamasından, həm də cahilliklərindən irəli gəlir. Dini baxımdan cahil savadsız insana deyil, həqiqəti dərk etməyən insana deyilir. Yəni bu abituriyentlərin aləmində hətta bilmədikləri, bacarmadıqları bir işin həllində özündən yüksək bir şəxsə üz tutmaq, ondan kömək gözləmək anlamına gəlir. Təbii ki, bu da absurd və cəfəngiyyatdır. Əgər insan hansısa fənni bilmirsə, o özü ilə seyidlərin, peyğəmbərlərin şəkillərini, hətta 10 Quran götürüb imtahana getsə belə, bunun ona heç bir müsbət təsiri olmayacaq. Biliyi olmayan belə abituriyentlər isə imtahanda heç zaman uğur qazana bilməz. Onların imtahana dua, seyid şəkilləri aparmasının səbəbinə gəlincə, bunun bir neçə səbəbi var. Birincisi odur ki, həmin abituriyentlərin ailələrində ya dini maarifləndirmə zəifdir, ya da din onların ailəsində xurafat şəklində təbliğ olunur. Digər tərəfdən, həmin abituriyentlərin özlərinin həqiqi dini təlimə meylli olmaması, onların imtahan və digər məsələlərdə dinə üz tutması dənizdə batan insanın saman çöpündən yapışması kimidir” - deyə İ.Əhməd vurğuladı.
İradə SARIYEVA
