Vəzifəsindən, daşıdığı statusdan asılı olmayaraq, hər bir Azərbaycan vətəndaşı Azərbaycan Silahlı Qüvvələrinə dəstək göstərməlidir. Bu gün imkanlı şəxslərin, xüsusən də yüksək maaş alan dövlət məmurlarının kütləvi olaraq Azərbaycan Silahlı Qüvvələrə Yardım Fonduna maliyyə dəstəyi göstərməsinin şahidi ola bilmirik. Müəyyən istisnaları nəzərə almasaq, demək olar ki, dövlət məmurları arasında bu sahəyə könüllü yardımlar göstərənlər azdır.
Ekspertlər qeyd edirlər ki, Azərbaycan Silahlı Qüvvələri Prezident İlham Əliyevin şəxsi nəzarətindədir və dövlət tərəfindən bu sahəyə kifayət qədər maliyyə vəsaiti ayrılır. Bununla belə, müxtəlif dövlət məmurlarının, imkanlı şəxslərin də Silahlı Qüvvələrə maliyyə yardımları göstərməsi çox müsbət olardı.
Ekspertlər bildirirlər ki, Silahlı Qüvvələrə Yardım Fonduna dəstək aksiyasına insanlar könüllü qoşulmalıdırlar.
Əliməmməd Nuriyev: “Silahlı Qüvvələrə yardım məsələsi birbaşa Vətənlə bağlı məsələdir”
Tanınmış hüquqşünas Əliməmməd Nuriyev bizimlə söhbətində bildirdi ki, Silahlı Qüvvələrə Yardım Fonduna maliyyə dəstəyi göstərmək hər şeydən əvvəl mənəvi məsələdir. Ə.Nuriyev hesab edir ki, həm iri məmurlar, həm xaricdəki Azərbaycan diasporu, həm də digər şəxslər bu sahədə aktivlik göstərməlidirlər. Bir sıra məmurların bu aksiyaya qoşulmağa maraq göstərmədiyini deyən Ə.Nuriyev bildirdi ki, sanki onlar yardım üçün “komanda” gözləyirlər. Ancaq onların bu işə könüllü qoşulmalı olduğunu deyən Ə.Nuriyevin sözlərinə görə, başqa ölkələrdə həm məmurlar, həm də diaspor qurumları çox aktiv şəkildə Silahlı Qüvvələrə yardımlar göstərirlər. “Hər şeydən əvvəl Silahlı Qüvvələrə Yardım Fonduna dəstək könüllü şəkildə olmalıdır. Silahlı Qüvvələrə dəstək göstərmək hər bir vətəndaşın mənəvi borcudur. Gərək könüllü olaraq onlar öz borclarını dərk etsinlər. Əvvəlki illərdə Silahlı Qüvvələrə Yardım Fonduna çox aktiv və kütləvi şəkildə dəstək göstərilir, maliyyə köçürülürdü. Həm məmurlar, həm iş adamları, həm də sıravi vətəndaşlar bu sahəyə daha çox dəstək göstərirdilər. Sonradan bu proses səngiməyə başladı. Yalnız müəyyən şəxslər əməkhaqqının bir hissəsini Silahlı Qüvvələrə Yardım Fonduna köçürürlər. Az da olsa, bəzi məmurlar bu addımı atırlar. Məmurlar Silahlı Qüvvələrə Yardım Fonduna maliyyə köçürmək üçün daha böyük imkanlara malikdirlər, lakin onların çoxu bu istiqamətdə addım atmır. Onların çoxu bu məsələdə sərbəst hərəkət etmir və sanki bir göstəriş gözləyir. Bu daha çox mənəvi məsələdir. Silahlı Qüvvələrə Yardım Fonduna maliyyə dəstəyi göstərmək bir vətənpərvərlik işidir. Mən deməzdim ki, Silahlı Qüvvələrə Yardım Fonduna vəsait köçürməyən məmurlar vətənpərvər deyil, sadəcə olaraq onlar sanki tapşırıq gözləyirlər. Bizim bəzi məmurların əməkhaqqı daha yüksəkdir, bundan əlavə, onların başqa gəlir yerləri var, biznesə sahibdirlər, bu baxımdan onların Silahlı Qüvvələrə yardım Fonduna maliyyə köçürmək imkanları var. Bu onlara imkan verir ki, prosesdə aktiv şəkildə iştirak etsinlər”.
Ə.Nuriyev qeyd etdi ki, Silahlı Qüvvələrin güclənməsi, bütövlükdə, ölkəmizin müdafiə sisteminin güclənməsinə səbəb olur. O hesab edir ki, dövlət büdcəsindən orduya kifayət qədər vəsait ayrılmasına və ordunun Prezident İlham Əliyevin şəxsi nəzarətində olmasına baxmayaraq, vətəndaşlar da Silahlı Qüvvələrə yardım göstərmək sahəsində aktiv olmalıdırlar: “Vətəndaşların da bu istiqamətdə fəal iştirak etməsi vacibdir. Qonşu ölkələrə baxsaq görərik ki, həmin ölkələrdə həm iri dövlət məmurları, həm də diaspor Silahlı Qüvvələrə yardım sahəsində çox fəaldırlar. Xüsusən də ərazisi işğal altında olan ölkələrdə bu məsələyə xüsusi vətəndaş münasibəti var. Məmurlar, vətəndaş cəmiyyətinin üzvləri, özəl sektorun nümayəndələri, mediada mütəmadi olaraq, simvolik də olsa, orduya maliyyə köçürürlər. İşğalçı Ermənistanın silahlı qüvvələrinə xaricdəki erməni diasporu indinin özündə də böyük maliyyə vəsaiti köçürür. Ancaq Azərbaycanda isə nə imkanlı şəxslər, nə diaspor Silahlı Qüvvələrə Yardım Fonduna maliyyə yardımı göstərmirlər. Halbuki, onlar bu işdə daha fəal olmalıdırlar. Silahlı Qüvvələrə yardım məsələsi birbaşa Vətənlə bağlı məsələdir. Ona görə də bu işdə həm məmurlar, həm də vətəndaşlar yaxından iştirak etməlidirlər”.
İradə SARIYEVA
