Bəzən cəmiyyətdə elə hadisələrlə qarşılaşırıq ki, bu, Azərbaycan xalqı üçün xarakterik deyil. Çox təəssüf ki, cəmiyyətimizdə gedən müəyyən aşınma prosesləri nəticəsində bəzi xoşagəlməz olaylar baş verir. Son zamanlar bizim cəmiyyətdə çox mənfi bir tendensiyanın yayılmaqda olduğunu müşahidə edirik. Bu, 2-3 uşaq anasının gənc oğlana qoşulub qaçması, subay qızın 4 uşaq atasına getməsi, evli kişinin başqa bir evli qadını aparması ilə bağlıdır.
Evində azyaşlı uşaqlarını, həyat yoldaşını qoyub yeni “sevgilisi”nə qoşulub qaçan gəlinlər haqqında tez-tez məlumatlar yayılır. Eləcə də evdə ailəsini, uşağını qoyub gənc qızı qaçıranlar da az deyil. Ümumiyyətlə, bu mənfi tendensiya əsasən bölgələrdə daha çox yayılıb. Bu azmış kimi, öz bacısının ərinə, hətta dayısına qoşulub qaçanlara da təsadüf edilir. Bu barədə vaxtaşırı olaraq yerli saytlar tez-tez xəbərlər yayırlar.
Sosioloqlar hesab edirlər ki, gəlinlərin subay oğlanlara, gənc qızların evli kişilərə qoşulub qaçması hallarının yayılması çox mənfi reallıqdır. Onların fikrincə, bunun mövcud olmasının əsas səbəbi erkən nikah, könüllü ailə həyatı qurmamaqla bağlıdır. Sosial şəbəkələrin, internetin də bu halın yayılmasında rolunun az olmadığını deyən mütəxəssislərin bildirdiyinə görə, çox zaman ərli, uşaqlı gənc qadınlar internetdə, sosial şəbəkələrdə tanış olduqları, reallıqda tanımadıqları oğlanlara qoşulub qaçırlar, bu da onların sonradan həm el qınağı ilə qarşılaşmasına, övlad, ər, qohum-əqrəba nifrəti qazanmasına səbəb olur. Bundan başqa, həmin qadınların onları qaçıranlar tərəfindən fahişəliyə və digər neqativ yollara cəlb edilməsi halları da reallıqdır. Bir sıra xarici ölkə seriallarında və internetdə təbliğ olunan “qadın azadlığı” tendensiyası bizim bəzi qadınları qoşulub qaçmağa vadar edir.
Psixoloqlar hesab edirlər ki, övladlarını atıb subay oğlana qoşulub qaçan gəlinlər əsasən sevgi axtarışında olanlardır. Onlar qeyd edirlər ki, uşaqlarını atıb başqasına qoşulub qaçan qadınların əksəriyyəti sonradan peşman olurlar.
Nərgiz Allahverdiyeva: “3-4 uşaq anası olan qadınların əksəriyyətini subay oğlanlar evlənmək məqsədilə qaçırmırlar”
Psixoloq Nərgiz Allahverdiyeva bizimlə söhbətində bildirdi ki, Azərbaycanda əvvəllər belə hallar nadir hallarda baş verərdi, amma indi buna az qala hər ay rast gəlirik. Ekspert qeyd etdi ki, bu günlərdə İsmayıllı rayonunda 3 uşaq anasının subay oğlana qoşulub qaçması cəmiyyətdə böyük ajiotaj yaradıb. O bildirdi ki, indi gənc və yeniyetmə qızlar arasında da imkanlı evli kişilərə qoşulub qaçanlar var. “Bütün bu halların yaranmasının kökündə o insanların yalnız özlərini düşünməsi dayanır. Onlar ailələrini, gözüyaşlı övladlarını nəzərə almadan bu addımı atırlar. Bu onların övladlarının üzərinə böyük və qara bir damğa qoyur. Bəziləri deyir ki, bu addımı “sevgi naminə” atmışam. Bu hadisənin biri-ikisi sevgi naminə baş verə bilər, qalanları isə ailədən, evin problemlərindən xilas olmaq, azad yaşamaq üçün bu addımı atırlar. 3-4 uşaq anası olan qadınların əksəriyyətini subay oğlanlar evlənmək məqsədilə qaçırmırlar, onlardan müxtəlif vasitələr üçün istifadə etmək üçün qaçırırlar. Gənc oğlanlara qoşulub qaçan qadınların çoxu sonradan bu addımı atdığına, ailəsini, balalarını “sevgisi”nə qurban verdiyinə görə peşman olduqlarını etiraf edirlər, lakin bu faydasız olur. İndi bəzi qadınlar yeni fikirlər irəli sürürlər ki, mən ərimi istəmirəm. İstəmirsənsə məhkəməyə müraciət et, boşan, daha niyə balalarını, ərini, qohum-əqrəbanı rüsvay edirsən? Təəssüflər olsun ki, üç-dörd uşaq analarının subay oğlanlara qoşulub qaçması halları mövcuddur. Bunun qarşısının alınması üçün tədbirlər görülməlidir ki, bu kimi hallar kütləviləşməsin. Ya qanunvericilikdə bir maddə olmalıdır, ya da digər bir cəza qaydası tətbiq olunmalıdır”.
Cavid İmamoğlu: “Təəssüflər olsun ki, bizdə son dövrlər evli qadınların subay oğlanlara qoşulub qaçması məsələsi, müəyyən mənada, bəzi saytlar tərəfindən şişirdilir”
Sosioloq Cavid İmamoğlu isə hesab edir ki, qadın bu addımı atırsa, bu onun mövcud durumu, yaşadığı şəraitə etirazı ilə bağlı olur. “Hesab edirəm ki, evli qadın başqasına qoşulub qaçırsa, demək, ona ailədə hər hansı bir zorakılıq göstərilir və bunun nəticəsində də başqasına qoşulub qaçır. O qoşulub qaçan insan ailənin də, övladın da, münasibətlərin də üstündən xətt çəkir. Azərbaycan hüquqi dövlətdir və insanların məhkəməyə müraciət edərək boşanmaq və yenidən ailə qurmaq imkanları var. Amma təəssüflər olsun ki, bizdə son dövrlər evli qadınların subay oğlanlara qoşulub qaçması məsələsi müəyyən mənada bəzi saytlar tərəfindən şişirdilir. Bunun nəticəsində bu tendensiya təbliğ olunur və başqalarını da bu addımı atmağa vadar edir. İnsanlar başa düşmürlər ki, xoşbəxt deyillərsə, ailədaxili zorakılıqla üzləşirlərsə, təhqir olunurlarsa, bunun yolu məhkəməyə müraciət edib boşanmaq və yenidən ailə qurmaqdır. Evli qadının subay oğlana qoşulub qaçması, yaxud evli kişinin gənc qızı qaçırması xəbərləri medianın gündəmini zəbt etməməlidir. Ümumiyyətlə, ailədə problemi olan insanlara yaxınları dəstək verməlidirlər. Bu dəstək olmadıqda onlar başqasına qoşulub qaçmağa üstünlük verir, bu vəziyyət də onları gələcəkdə dəstəksiz qoyur. Bu kimi tendensiyaların təbliğinin özü yanlışdır” - deyə müsahibimiz bildirdi.
Leyla QARAXANLI
