Kəlbəcər Rayon İcra Hakimiyyətinin bahalı xidməti avtomobil alması ətrafında yaranan rezonans öz həllini tapıb. Məlum olub ki, sonda İcra Hakimiyyəti yerli istehsal olan avtomobilin alışının üzərində dayanıb. Bu barədə İcra Hakimiyyətinin İctimai-siyasi və humanitar məsələlər şöbəsinin baş məsləhətçisi Hikmət Bağırov məlumat verib.
O bildirib ki, xidməti maşın başçı üçün deyil, onun birinci müavini üçün alınıb: “Bu, “Azərmaş” ASC-nin istehsalı olan “Khazar Peugeot” markalı avtomobildir. İcra başçısının özü isə “Toyota Avalon” markalı maşın sürür. Düzdür, həmin maşın 2008-ci ildə alınıb. İstismar müddəti 10 il olsa da, icra başçısı Aqil Məmmədov həmin maşından yenə də istifadə edəcək”.
Qeyd edək ki, bir neçə gün öncə rəsmi qəzetlərdə icra başçısı üçün avtomobil alınması ilə bağlı tender elan olunmuşdu. Həmin tenderdə "Mercedes S 350" markalı avtomobilin alınması nəzərdə tutulmuşdu. İcra başçısının bahalı avtomobil almaq istəyi müzakirələrə səbəb olmuşdu.
Daha sonra İcra Hakimiyyəti dövlət büdcəsindən xidməti avtomobil üçün 50-55 min manat vəsait nəzərdə tutulduğunu və "Mercedes S 350"nin son versiyasını deyil, işlənmişini almağı planladıqlarını açıqlamışdı.
Cəmi bir gün sonra isə İcra Hakimiyyəti “Mercedes S 350” niyyətini "Khazar Peugeot” ilə əvəzləyərək reallaşdırıb. Dövlət qurumlarına yerli istehsal olan avtomobillərdən istifadəni cənab Prezident də öz çıxışlarında tövsiyə edib. Dövlət qurumlarında yerli istehsal olan avtomobillərdən istifadənin nə kimi üstünlükləri var?
Abil Bayramov: “Çünki həmin qurumların xərclədikləri vəsait həm də vətəndaşların ödədikləri vergilər hesabına formalaşan büdcədən götürülür”
Ekspert Abil Bayramov “Bakı-Xəbər”ə açıqlamasında bildirdi ki, buna bütün qurumlar əməl etsə yaxşı olar: “Həm israfın qarşısını alır, həm də yerli istehsala dəstək funksiyasını daşıyacaq. Bəzi qurumların buna əməl etməməsinin başlıca səbəbi ictimai hesabatlılığının olmamasıdır. Belə hesabatlığın olması bəzi israf hərəkətlərin qarşısını ala bilər. İctimai nəzarət çox vacibdir. Onların xərclədikləri vəsaitlərə ictimai nəzarətin həyata keçirilməsinə haqqı olan təbəqə elə sadə vətəndaşlardır. Çünki həmin qurumların xərclədikləri vəsait həm də vətəndaşların ödədikləri vergilər hesabına formalaşan büdcədən götürülür. Qurum rəhbərləri xərcləri müəyyənləşdirən zaman bu amilə xüsusi diqqət yetirməlidirlər. Əks halda, son prosesdə olduğu kimi, ictimai təpki baş verəcək və onlar geriyə addım atmağa məcbur olacaqlar. Yerli avtomobillərin alınması təqdir olunmalıdır. Amma yalnız bununla büdcəyə qənaətdən söhbət gedə bilməz. Çünki vəsait yalnız avtomobilə xərclənmir. İnventarların, mebellərin alınmasında da israfa yol vermək olmaz. Maksimum dərəcədə qənaət amilinə fikir verilməlidir. Bundan əlavə, alınan yerli avtomobillərdən də səmərəli, səliqəli istifadə olunmalıdır. Bir daha vurğulayıram ki, burada büdcə vəsaitlərindən nə dərəcədə səmərəli istifadədən söhbət gedir”.
Məhəmmədəli QƏRİBLİ
