Müstəqil dövlətimizin mühüm atributlarından, əsas sütunlarından olan Azərbaycan polisinin 101 yaşı tamam oldu. Məlumat üçün bildirək ki, 101 il bundan əvvəl ölkəmizdə ilk polis bölüyü 1918-ci il iyulun 2-də Azərbaycan Xalq Cümhuriyyəti dövründə cinayətkarlıqla mübarizə aparmaq və ictimai təhlükəsizliyi təmin etmək məqsədilə yaradılıb.
Azərbaycan polisinin fəaliyyəti tariximizin qədim dövrünə təsadüf edib. Həmin vaxtlar xanlıqlarda xüsusi səlahiyyətlərlə fəaliyyət göstərən darğalar, Çar Rusiyası dövründə müəyyən polismeyster idarələri, Bakı Şəhər Upravasının polisi, Bakı xüsusi vergi polisi, xəfiyyə polisi, Gəncə, Zəngəzur, Şuşa, Cavad və sair qəzaların polis idarələri mövcud olub. 1920-ci ilin aprelində bolşevik Rusiyası ölkəmizi işğal edir və Azərbaycanda sovet hakimiyyəti qurulur. Sovet Azərbaycanının ilk daxili işlər naziri Həmid Sultanov təyin edilir. Pristavları komissarlar əvəzləyir, polisin adı dəyişdirilərək milis adlandırılır.
1998-ci ildən etibarən iyulun 2-si sabiq prezident Heydər Əliyevin fərmanı ilə Azərbaycan daxili işlər orqanları əməkdaşlarının peşə bayramı günü kimi qeyd olunur.
Aydın Mirzəzadə: “Azərbaycan polisi vətəndaşın təhlükəsizliyini, sakit həyat yaşamasını təmin edir”
101 yaşlı Azərbaycan polisinin ildönümü münasibətilə fikir bildirən millət vəkili Aydın Mirzəzadə qeyd etdi ki, Azərbaycanın dövlət müstəqilliyi bərpa edildikdən, xüsusən də mərhum prezident Heydər Əliyev hakimiyyətə gəldikdən sonra daxili işlər orqanlarının fəaliyyətinin yenidən qurulması sahəsində çox böyük işlər görüldü. Avropa təcrübəsi öyrənildi və müharibə şəraitində yaşamağımıza baxmayaraq, daxili stabillik təmin edildi və bu gün də qorunur. Ona görə də biz bu gün rahat şəkildə deyə bilərik ki, Azərbaycan nəinki MDB məkanında, hətta dünyada kriminal vəziyyətin ən aşağı səviyyədə olduğu ölkələrdən biridir: “Bu, məhz Azərbaycan polisinin xidməti nəticəsində mümkün olub. Azərbaycan polisi vətəndaşın təhlükəsizliyini, sakit həyat yaşamasını təmin edir və cəmiyyətdə kriminal hadisələrin baş verməsinin qarşısını alır. Ölkəmizdə mütəşəkkil cinayətkar dəstələr yoxdur. İnsanların həyatına heç bir ciddi təhdidlər qeydə alınmır. Eyni zamanda, törədilən cinayətlərin də üstü operativ şəkildə açılır. Uzun müddətdir Daxili İşlər Nazirliyinə rəhbərlik etmiş general-polkovnik Ramil Usubovun Təhlükəsizlik Şurasına katib təyin olunmasını Azərbaycan polisinin peşəkarlığı, dövlətçiliyə xidməti və vətəndaşın hüquqlarının qorunmasında göstərdiyi xidmətin dəyəri kimi qiymətləndirirəm. Bu gün polis orqanlarında Azərbaycan xalqının dəyərli oğulları xidmət edirlər. Xalqımız öz polisi ilə fəxr edir, ona güvənir. Bu gün rahat şəkildə deyə bilərik ki, Azərbaycan nəinki MDB məkanında, hətta dünyada kriminal vəziyyətin ən aşağı səviyyədə olduğu ölkələrdən biridir”.
Həmsöhbətimiz onu da vurğuladı ki, 1918-ci ildə Azərbaycan xalqı müstəqil dövlətini yaratdıqdan sonra bir çox dövlət atributlarının, o cümlədən, polisin yaradılması barədə qərar verilib: “Azərbaycan polisi 23 ay ərzində Azərbaycan Xalq Cümhuriyyətində (AXC) ictimai asayişin qorunmasında böyük işlər görüb. Baxmayaraq ki, bu müddətdə dövlətçilik təcrübəsi az idi və Ermənistan tərəfindən ərazilərin tutulması üçün hücumlar olurdu, müharibə gedirdi. Bununla belə, ictimai asayiş qorunurdu. Həmin dövrün DİN rəhbərləri Azərbaycan tarixində dövlətçiliyə şərəflə xidmət edən insanlar kimi qalıblar. Azərbaycan müstəqilliyini itirdikdən sonra isə məhdud muxtariyyətə baxmayaraq, həmin dövrdə sovet milisinin tərkibində Azərbaycan milisi ictimai asayişin qorunmasında, xalqın dinc yaşayışının təmin olunmasında böyük rol oynayıb. Həmin dövrdə daxili işlər orqanları rəhbərləri əsasən, qeyri-azərbaycanlılardan ibarət idi. Ona görə də azərbaycanlılara qarşı çox böyük təzyiqlər olurdu. Bununla belə, milis orqanlarında çalışan azərbaycanlılar xalqımızın təhlükəsizliyinin və mənəvi dəyərlərinin qorunmasında böyük xidmətlər göstəriblər”.
Şəmsəddin Əliyev: “… həm ölkə əhalisi, həm də dövlətimiz polisimizlə qürur duya bilər”
“Polisə Yardım” İctimai Birliyinin rəhbəri Şəmsəddin Əliyev “Bakı-Xəbər”ə açıqlamasında qeyd etdi ki, Azərbaycan polisinin bünövrəsi Cümhuriyyət dövründə qoyulub: “Azərbaycan polisi bir əsr müddətində püxtələşib. Azərbaycan polisinin cinayətkarlıqla mübarizə fəaliyyəti ilə bağlı yaddaqalan xatirələri var. Təbii ki, cinayətkarlığın kökünü kəsmək mümkün deyil. Bütün cəmiyyətlərdə cinayətkarlıq olur, sadəcə, onunla mübarizə hər bir dövlətdə fərqlidir. Ötən illər ərzində Azərbaycan polisinin topladığı təcrübə sayəsində cinayətkarlıqla mübarizə qısa zamanda açılır. İl ərzində 26-27 min cinayət hadisəsi qeydə alınır, ancaq onun 86-87 faizi açılır. Vətəndaşlara bəlli olmayan cinayətlər Azərbaycan polisi tərəfindən açılır. Bu, MDB ölkələrində qazanılmayan uğurdur. Eyni zamanda, ölkə əhalisinin sayına görə cinayət hadisələrinin sayında Avropa ölkələrindən ön sırada dayanır. Azərbaycan polisinin səyi nəticəsində ölkəmizin cinayətkarlıq səviyyəsinə görə Avropa ölkələrindən seçilməsinə görə həm ölkə əhalisi, həm də dövlətimiz polisimizlə qürur duya bilər”.
Həmsöhbətimiz onu da vurğuladı ki, Azərbaycan polisinin cəmiyyətlə sıx təmasda olmasından qürur duyur: “Cəmiyyətin təhlükəsizliyini təmin etmək, ictimai asayişi qorumaq, sabitliyin dayanıqlı olmasını arzu ediriksə, mütləq mənada polislə birgə addımlamaq lazımdır. Nəzərə almaq lazımdır ki, harada cinayət hadisəsi qeydə alınırsa, polis ordadır. Bu hal hər kəs üçün xeyirlidir.
Bu gün Azərbaycanda daxili sabitlik, təhlükəsizlik yüksək səviyyədə təmin olunur. Öz adımdan Azərbaycan polisini təbrik edirəm. Başda cənab nazir Vilayət Eyvazov olmaqla, bütün kollegiyanın üzvlərini təbrik edirəm”.
Vaqif Əsədov: “Bu gün Azərbaycan cəmiyyəti onun polisinə inanıb arxalanırsa, təhlükəsiz, rahat hərəkət edirsə, polisin fəaliyyəti deməkdir”
Bakı şəhər Dövlət Yol Polisi İdarəsinin ictimaiyyətlə əlaqələr şöbəsinin rəisi, polkovnik Vaqif Əsədov Azərbaycan polisinin bu günə kimi əldə etdiyi uğurlardan bəhs edib. O, ilk növbədə, Azərbaycan polisinin yaranmasının 101 ili, peşə bayramı münasibətilə bütün həmkarlarını təbrik edib: “Bu gün Azərbaycan cəmiyyəti onun polisinə inanıb arxalanırsa, təhlükəsiz, rahat hərəkət edirsə, polisin fəaliyyəti deməkdir. Hər bir polis əməkdaşına xidmətində uğurlar arzu edirəm. Polisin xidmətinə cəmiyyət qiymət verir, hər bir polis əməkdaşının xidmət etdiyi ərazidə təhlükəsizlik təmin edilirsə, asayiş qorunursa, dövlət, vətən qarşısında xidməti yerinə yetiririksə, bu elə bizim fəaliyyətimiz deməkdir.
Bu gün bütün sahələrdə uğurlar qazanmış polisin bir fəaliyyəti olan yol polisi də xeyli uğurlu nəticələr əldə edib. Elə təkcə onu demək kifayətdir ki, Bakı şəhəri üzrə qeydə alınan yol-qəza hadisələrinin azalması, ölüm faktlarının aşağı düşməsi, eyni zamanda, müsbət dinamika üzrə hərəkət etməsi Bakı Şəhər Dövlət Yol Polisinin uğuru sayılır. Baxmayaraq ki, ölkə üzrə gətirilən nəqliyyat vasitələrinin sayı, sürücülərin sayı artır, küçə və yolların müasir səviyyəyə gətirilməsi davam etdirilir, sürət həddi artırılır, yol birləşmələri, kəsişmələri, körpü və tunellərin istifadəyə verilməsi kimi yeniliklər yol-qəza hadisələrinin olmasına zəmin yaradır. Amma bu günədək yol polisinin məqsədli şəkildə keçirdiyi tədbirlər, eyni zamanda, “Yol hərəkəti haqqında” Qanuna və İnzibati Xətalar Məcəlləsinə edilən əlavə və dəyişikliklər, polisin fəaliyyəti ilə bağlı tətbiq edilən müasirlik və yeni texnologiyalar, bütövlükdə, polisin fəaliyyətinə təsir edən bu müsbət göstəricilər nailiyyət əldə etmək üçün bir stimuldur. Bundan sonra da insanların təhlükəsizliyini təmin etmək bizim funksional borcumuz olacaq”.
Günel CƏLİLOVA
