Məcburi köçkünlərin həyat şəraitinin yaxşılaşdırılması üçün görülən işlər bu kateqoriyadan olan soydaşlarımızın həyat şəraitini daha da yaxşılaşdırıb. Onların müvəqqəti yaşayış yerləri və çadırlardan müasir tələblər səviyyəsində inşa edilən qəsəbələrə köçürülməsi dövlətin bu insanlara göstərdiyi diqqətin təzahürüdür.
Məcburi köçkünlərin həyat şəraitinin yaxşılaşdırılması istiqamətində görülən işlər nəticəsində qeyd olunan kateqoriyadan olan insanlar arasında yoxsulluq həddi 75 faizdən 12 faizədək azalıb. Bu barədə Qaçqınların və Məcburi Köçkünlərin İşləri üzrə Dövlət Komitəsi sədrinin müavini Fuad Hüseynov BMT-nin İnsan Hüquqları Şurasının 41-ci sessiyası çərçivəsində çıxış zamanı bildirib.
Sədr müavini Azərbaycanın əhalinin sayına nisbətdə ən çox məcburi köçkün və qaçqın əhalisi olan ölkələr sırasında olduğunu diqqətə çatdırıb: “Ermənistanın həyata keçirdiyi hərbi təcavüz, işğal və etnik təmizləmə siyasəti nəticəsində 250 min azərbaycanlı Ermənistandakı ata-baba yurdlarından qovulub və 700 min insan Azərbaycanın işğal olunmuş ərazilərindən məcburi köçkün vəziyyətinə düşüb. Ötən müddət ərzində 300 min məcburi köçkünün mənzil-məişət şəraiti yaxşılaşdırılıb, görülən tədbirlər nəticəsində məcburi köçkünlər arasında yoxsulluq həddi 75 faizdən 12 faizədək azalıb. Ümumilikdə, ötən müddət ərzində bu sahəyə 7,4 milyard ABŞ dollar məbləğində vəsait ayrılıb”.
Ekspertlər məcburi köçkünlər arasında yoxsulluq səviyyəsinin 75 faizdən 12 faizə endirilməsinin gözlənilən olduğunu düşünürlər. Onların fikrincə, son illər qaçqın və məcburi köçkünlərin həyat şəraitinin yaxşılaşdırılması istiqamətində çoxlu sayda iş görülüb.
Fikrət Yusifov: “… görülən işlər sayəsində bu qəbildən olan insanlar arasında yoxsulluq səviyyəsi azalıb”
İqtisadçı-ekspert Fikrət Yusifov “Bakı-Xəbər”ə açıqlamasında qeyd etdi ki, son illər məcburi köçkün və qaçqınların həyat tərzinin yaxşılaşdırılması istiqamətində dövlət tərəfindən mühum işlər görülüb: “Xüsusilə də onların sosial təminatının gücləndirilməsi istiqamətində çox vacib layihələr həyata keçirilib. Eyni zamanda, bu qəbildən olan şəxslərin sosial müdafiəsinin gücləndirilməsi istiqamətində görülən işlər arasında onların mənzil şəraitinin yaxşılaşdırılmasını göstərmək olar. Bu istiqamətdə görülən işlər sayəsində məcburi köçkünlərin bir qismi mənzillə təmin olunub. Görülən işlərin hər biri qaçqın və məcburi köçkünlərin həyat şəraitini yaxşılaşdırıb. Bu səbəbdən də məcburi köçkünlər arasında yoxsulluq səviyyəsi 12 faizədək düşüb”.
Həmsöhbətimiz onu da vurğuladı ki, məcburi köçkünlər üçün nəzərdə tutulan müavinətlərin həcminin artması onların maddi durumunun inkişaf etməsinə səbəb olub. Bununla yanaşı, aidiyyəti qurumların dəstəyilə məcburi köçkünlər işlə təmin olunub. Bu sahədə görülən hər bir iş məcburi köçkünlər arasında yoxsulluğun azalmasına səbəb olub.
Günel CƏLİLOVA
