Qadın gözəlliyini tamamlayan amillərdən biri onun dırnaqlarıdır. Qadınlar əllərinin gözəlliyinə xüsusi önəm verir və bu səbəbdən də daim dırnaqlarına müxtəlif üsullarla qulluq edirlər. Qadınlar əvvəllər manikürlə kifayətlənirdilərsə, indi bu sahədəki yeniliklərdən yararlanırlar.
Bu gün paytaxtımızda və bölgələrimizdə fəaliyyət göstərən gözəllik salonlarında dırnaqların düzəldilməsi, süslənməsi ilə tamam yeni üsullarla məşğul olunur. Onların geniş yayılmışı gel-lakdır ki, qadınlar, hətta yeniyetmə məktəbli qızlar da gel-lak etdirirlər. Təəssüf ki, bizlər çox zaman bu yeni süsləmə formalarının sağlamlığımız üçün nə qədər zərərli olduğunu göz önünə almaq istəmirik. Dəfələrlə mütəxəssislər tərəfindən gel-lakın təhlükələri barədə xəbərdarlıqlar edilsə də, yeni də bu amil gel-laka kütləvi maraq göstərən qadınları bu yoldan çəkindirə bilməyib. “Gözəllik qurban tələb edir” tezisinə əməl edən qadınlar təəssüf ki, gözəlliyə öz sağlamlıqlarını qurban edirlər.
Bu gün Azərbaycanda xərcəng və müxtəlif şiş xəstəlilərinin qadınlar arasında daha geniş yayılmasının şahidi oluruq. Bu sırada gənc qadınların daha üstünlük təşkil etməsi ağrıdıcı faktdır. O da məlumdur ki, qadınlarımız gözəllik salonlarında hepatit C və digər xəstəliklərə də yoluxurlar. Əlbəttə, gigiyena qaydalara əməl edilməyən gözəllik salonlarının xəstəlik mənbəyinə çevrilməsi qaçılmazdır.
Yayılan məlumatlara görə, hazırda manikür ustalarının bir nömrəli metodu olan və qadınların da bəyəndiyi, tez quruması, dırnaqlarda çox qalması, praktikliyi, bir çox üstünlüyü səbəbindən tez-tez müraciət etdiyi gel-lakın insan üçün zərərli olması mütəxəssislər tərəfindən sübuta yetirilib.
Mətbuatın yazdığına görə, gelin dırnaqlara möhkəmlənməsi üçün xüsusi ultrabənövşəyi şüalanma ilə lampadan istifadə olunur. Bu şüalar isə dırnaqətrafı dərini zədələyir, baryerini dağıdır, vaxtından əvvəl qocalma və xərçəngə səbəb olur. Problem ondadır ki, bu lampalar texniki standartlara cavab vermir, şüanın müştərinin əlinə yönəldilmə vaxtına əməl olunmur, hər salon öz bildiyi kimi istifadə edir. Doza müştərinin ayda neçə dəfə belə manikür etdirməsindən də asılıdır. Nə qədər çox, tez-tez gel-lak edilirsə, şüa dozası bir o qədər çox olur və müştəri risqə atılır.
Əgər qadının genetik olaraq dəri xərçənginə meylliyi varsa, eləcə də yüksək dəri piqmentasiyası varsa, o zaman onun dəri xərçəngi olma ehtimalı dəfərlərlə artır və bu adamlara belə lampalar altında şellak, gel-lak etdirmək ümumiyyətlə olmaz.
Bu barədə məlumat verən mütəxəssislərin sözlərinə görə, eləcə də kimyaterapiya preparatları və antibiotiklərin qəbulu UVÇ şüaların təsirini, həssaslığını artırır. Bu dərmanları qəbul edənlər də prosedurdan uzaq durmalıdırlar. Dermatoloqlar dəri xərçənginə yoluxmamaq üçün gel-lak prosedurunu 2 aydan bir etdirməyi tövsiyə edirlər.
Prosedur zamanı əllərə, dırnaqətrafı dəriyə xüsusi gündən qorunma SPF kremləri çəkilməlidir. Gel-lakı özünüz evdə qopardıb təmizləməyin. Bu zaman dırnaq plastininini zədələyə bilərsiniz.
Aynurə Həsənova: “Müştəri ayda bir neçə dəfə gel-lak etdirirsə, şüa dozası bir o qədər çox olur və onun sağlamlığı risq altına düşür”
Həkim-kosmetoloq Aynurə Həsənova “Bakı-Xəbər”ə bildirdi ki, ümumiyyətlə, son dövrlər gözəllik üçün həyata keçirdikləri prosedurlar bəzi qadınların sağlamlığını əlindən alır. Mütəxəssisin sözlərinə görə, çox zaman qadınlar gözəl görünmək üçün əməliyyata üz tutur, dırnaq düzəltdirir, saç əkdirirlər. Ancaq bir sıra hallarda bütün bunlar qadınların sağlamlığını təhlükə altına alır. “Əlbəttə, qadının hər zaman baxımlı olması vacibdir. Ancaq bəzən qadınlarımız daha gözəl görünmək üçün başqa vasitələrə əl atırlar. Əllərinin baxımlı olması qadının ən həssas yeridir desək yanılmarıq. Qadınların çoxu gözəllik salonlarına gedir və baha qiymətə dırnaqlarını düzəltdirirlər. Onlar ən çox gel-lak etdirməyə üstünlük verirlər. Bəzi salonlarda gel-lak edilərkən lazımi qaydalar gözlənilmir. Məsələn, gel-lak gec quruduğundan, onun qurumasını daha yüksək dozada həyata keçirirlər ki, tez qurusun. Belə olmaz. Hər şeyin öz qaydası var. Nəticədə ültrabənövşəyi şüalar qadınların dərisinə mənfi təsir göstərir. Bəzən elə qadınlar olur ki, onların immun sistemi çox zəif olur və bu halda onlar daha tez xəstəliyə tutula bilirlər. Bəzi qadınlarda xərcəng olur, ancaq onlar bundan xəbərsiz davamlı olaraq gel-lak etdirirlər. Bu halda qadınlarda o xəstəlik inkişaf edir. Gel-lak xüsusi avadanlıqla həyata keçirilir. Bu avadanlıqlar da şüa ilə çalışır. Qadınlara şüa həddən artıq pis təsir edir və orqanizmi zəif olanların saçları tökülür, dərisi qırışır, dırnaqlarının ətrafı didilir. Deformasiyaya uğrayan dəri isə sonradan daha böyük fəlakətlərə səbəb olur. Qadınların çoxu gel-lak etdirdikdən bir müddət sonra hiss edir ki, dırnaqları uzanıb, ona mane olur, salona gedib korreksiya etdirmək əvəzinə, evdə gel-lakı özü qopardıb təmizləyir. Bu zaman isə dırnaq plastini zədələnir. Gel-lak edilmiş dırnaqlar yalnız xüsusi avadanlıqla sökülə bilər, ona başqa müdaxilə olmaz. Qadınlarımız uzun müddət gel-lak etdirirlər, sonra gel-lak etdirmək imkanları olmadığı üçün, proseduru dayandırırlar. O qadınların dırnaqlarının təbii vəziyyəti o qədər pis olur ki, dırnaq örtüyü tamamilə nazilir, az qala ət görsənir. Odur ki, qadınlarımız bu cür prosedurlarda ehtiyatlı olmalıdırlar. Bilirsiniz, heç də bütün salonlarda işləyənlər peşəkar olmur. Elə salonlar var ki, qadınlarımızın dırnaqlarına orada lazımi qulluq göstərilmir. Xərçəng, dəri qocalması və s. risqlər o zaman daha çox artır ki, qəbul edilən doza həddən artıq olur. Yəni müştəri ayda bir neçə dəfə gel-lak etdirirsə, şüa dozası bir o qədər çox olur və onun sağlamlığı risq altına düşür” - deyə A.Həsənova vurğuladı.
İradə SARIYEVA
