Kəlbəcər Rayon İcra Hakimiyyəti qurumun aparatı üçün "Mercedes Benz S 350" model minik avtomobilinin alınması üçün tender elan edib. Lüks "Mercedes"in alınması üçün tender elanı Nazirlər Kabinetinin orqanı olan "Respublika" qəzetində dərc edilib. İşğal altında olan və əhalisi məcburi köçkün qismində ölkənin müxtəlif rayonlarına səpələnən Kəlbəcərin İcra Hakimiyyətinin lüks avtomobil almaq planı sosial şəbəkələrdə tənqidlərə səbəb olub.
Sosial şəbəkələrdə qeyd edilib ki, məcburi köçkünlərin böyük əksəriyyətinin ehtiyac içində olduğu bir vaxtda İcra Hakimiyyətinin belə maşın alması və bunu elan olaraq yayması doğru deyil.
Qeyd edək ki, sözügedən avtomobilin yeni modelinin satış qiyməti 145 min dollardan (221 min manat) başlayır. Komplektləşdirmədən asılı olaraq avtomobilin qiyməti 200 min dollara qədər qalxa bilər. Bu, Avropa bazarlarında olan qiymətdir. Avtomobil alqı-satqısı üzrə ixtisaslaşmış yerli saytlarda bu modeldən olan ən yeni avtomobil 2018-ci il istehsalıdır, qiyməti 110 min dollara yaxın təklif olunur.
Bir qaçqın rayonuna belə fantastik qiymətdə avtomobil əldə etmək lazımdırmı?
İlqar Hüseynli: “Dövlətin pulunu bu şəkildə israf etmək olmaz”
Sosial məsələlər üzrə ekspert İlqar Hüseynli “Bakı-Xəbər”ə açıqlamasında bildirdi ki, bu cür amillər birbaşa büdcənin talanmasına xidmət edir: “Bu qədər vəsaiti sərf edib hansısa avtomobili almağa heç bir ehtiyac yoxdur. Bunu almaq istəyənin qaçqın rayonu olduğu üzə çıxanda, təbii ki, narazılıqlar lap artmış olur. Ümumiyyətlə, tendensiya ona yönəlməlidir ki, biz maksimum büdcəyə qənaət edə bilək, əlavə israflara yol verməyək. Dövlət orqanlarında belə dəbdəbəli avtomobillərə çəkilən xərclərin qarşısı alınmalıdır. Bir qaçqın rayonunda dəyəri 200 min olan avtomobilin alınması həmin rayonun büdcəsinin talanmasına xidmət edir. Həmin məbləğə nə qədər məcburi köçkünün həyat səviyyəsini yaxşılaşdırmaq olar. Təhsildə uğur əldə edən şəxslərə əlavə təqaüdlər təsis etmək mümkündür. Biz digər sahələrdə də tender oyunları ilə büdcənin nə qədər talandığının şahidi oluruq. Vəsaitlərin belə insafsızcasına xərclənməsi faktına mütləq hüquqi qiymət verilməlidir. Onlar elə bir fərqli şəraitdə yaşamırlar ki, xüsusi komfort tələb edən avtomobillərdən başqa nə iləsə keçinə bilməsinlər. Burada bir məmur vicdanı da olmalıdır. Bilməlidir ki, dövlətin pulunu bu şəkildə israf etmək olmaz”.
İcra başçısı: “Mercedes Benz S 350” avtomobilinin alınmasını təxirə saldıq”
Yaranmış vəziyyətə aydınlıq gətirmək üçün sözügedən rayonun İcra Hakimiyyəti ilə əlaqə saxladıq. Bizə bildirdilər ki, Kəlbəcər Rayon İcra Hakimiyyətinin başçısı Aqil Məmmədovun tender yolu ilə “Mercedes Benz S 350” xidməti avtomobilin alınmasına aydınlıq gətirən açıqlaması var, ondan başqa nəsə söyləyə bilməzlər. Aqil Məmmədov bildirir ki, dövlət tərəfindən İcra Hakimiyyətinə 55 min manat xidməti avtomobilin alınması üçün pul ayrılıb:
“2 ildir ki, müavinimin xidməti avtomobili yoxdur. Dövlət büdcəsindən xidməti avtomobilin alınması üçün 55 min manat pul ayrıldı. Təklif etdim ki, sözügedən məbləğə 2010-cu ilin buraxılışı olan “Mercedes Benz S 350” avtomobili alınsın. İcra Hakimiyyəti bunun üçün tender komissiyasına müraciət etdi və tender elan olundu”.
Aqil Məmmədov vurğulayıb ki, artıq sözügedən xidməti avtomobilin dəyəri büdcələrinə uyğun olmadığı üçün alınması təxirə salınıb: “Tenderdə hələlik sözügedən avtomobillər təklif olunmayıb. Təklif olunan avtomobillərin qiyməti çox bahadır. Ona görə “Mercedes Benz S 350” avtomobilinin alınmasını təxirə saldıq”.
Məhəmmədəli QƏRİBLİ
