İtlərin gözəllik salonları haqqında əvvəllər az-az eşitsək də, son zamanlar bu cür salonlara tez-tez rast gəlinir. Əsasən Bakının mərkəzində fəaliyyət göstərən bu salonlarda paytaxtın sahibli itləri süsləndirilir, bəzədilir.
Bu gün Azərbaycanda itlər üçün gözəllik salonlarına tələbat böyükdür. Hətta deyilənə görə, it sahibləri bu salonlara düşmək üçün bəzən günlərlə gözləyirlər. Bir sözlə, itlər üçün salonlarda növbələrin yarandığı qeyd edilir.
Dünyanın bir çox iri şəhərində olduğu kimi, Azərbaycanda da it həvəskarlarının, kinoloqların sayı günbəgün artır. Hazırda evində müxtəlif it cinsləri saxlayan, hətta bəzən ona övladından, valideynindən artıq qayğı bəsləyənlər kifayət qədərdir.
Hazırda it sahiblərinin çoxu istəyir ki, evində saxladığı it təmiz və bəzəkli olsun. İtlər üçün gözəllik salonlarından bildirirlər ki, salonlara müraciət edənlər itlərinin- “sevimliləri”nin daha baxımlı olmasını istəyirlər. Məlumatlara görə, müştərilər salonlara daha çox itlərinin saçını rənglətməyə gəlirlər. Bundan əlavə, salonda heyvanlar üçün müxtəlif bəzək əşyaları və geyimlər də təqdim olunur. Ən çox müraciətlər isə Şi tsu cins itləri ilə bağlıdır. İtlərə bu salonlarda manikür, pedükür xidmətləri göstərilməklə yanaşı, onların qaşlarını tatu da edirlər. Salonlarda itləri çimizdirib darayırlar, hətta tüklərini boyayıb, dırnaqlarına rəng də çəkirlər.
Burada işləyənlər özlərinin ifrat it sevgisi ilə seçilənlərdir. Onlar qeyd edirlər ki, insan itləri sevməsə, heç zaman itlərə belə xidmət göstərə bilməz.
Bu gün itlər üçün gözəllik salonlarına əsasən imkanlı ailələrin və şou-biznesçilərin itləri gətirilir. Məlumatlara görə, müğənnilərdən Almaz Ələsgərli, Röya, Nura Surinin iti də bu cür salonlarda tez-tez görsənir. Bundan başqa, Azərbaycan yığmasında oynayan voleybolçu Adina Bayramovanın, fotoqraf Orxan Aslanovun, DJ Samın, müğənni Çingiz Mustafayev və başqalarının itləri bu kimi salonlara gətirilir.
İtlər üçün gözəllik salonlarının sahibləri bildirirlər ki, bu məkanların təmizliyi, burada gigiyenik qaydalara əməl olunması məşhurları bura cəlb edir.
Salonlarda itlər üçün müxtəlif formada geyimlərin də satıldığı məlumdur. İtlərə göstərilən xidmətin haqqı itlərin parodasından asılı olaraq dəyişir.
Kəmalə Əliyeva: “İt sahibləri itlərinin daha gözəl və baxımlı olmasını istəyirlər”
Belə salonlardan birində işləyən Kəmalə Əliyevanın bildirdiyinə görə, qiymətlər itin vəziyyətindən və parodasından asılıdır. Elə vaxt olur ki, it salona səliqəli gəlir, bəzən isə pis vəziyyətdə. Qiymətlər buna görə müxtəlifdir. “İtlər üçün gözəllik salonlarına müracət edənlər çoxdur və it sahibləri itlərinin daha gözəl və baxımlı olmasını istəyirlər. Məsələn, “Yorkshire Terrier”i götürək, onun tüklərinin daranması, kəsilməsi, gözlərinin və qulaqlarının təmizlənməsi, dırnaqların kəsilməsi, parfüm vurulması, bantik taxılması 45-55 manat edir. Eyni zamanda, istəkdən asılı olaraq, biz itlərin tüklərinə rəng də qoyuruq, qulaqlarına sırğa vururuq. Bundan əlavə, itlərə tatu edirik, müştərilərin zövqünə uyğun itlərin dırnaqlarını boyayırıq”.
Salonlara daha çox “Yorkshire Terrier” və “Şpitsi” gətiririldiyini deyən salon əməkdaşının sözlərinə görə, “Ovçarka”, “Çoban iti” , ”golden rentriver”, ”rotveyler”, ”xaski”, ”akita inu” və s. it cinclərinə də salonda rast gəlmək olur.
İtlərə xidmət göstərən alətlərə gəlincə, bunların xüsusilə itlər üçün olduğu qeyd edilir. Son zamanlar itlər nəinki gözəllik salonlarına gedir, hətta onlar arasında gözəllik müsabiqələri də təşkil edilir.
İtlər üçün gözəllik salonlarının fəaliyyət göstərməsi çoxlarında təəccüb yaratsa da, bəzilərin bunu təqdir edirlər.
Ekspertlərin fikrincə, itlər üçün gözəllik salonlarında sanitar qaydaların qorunması vacib şərtdir. Bəzi mütəxəssislər qeyd edirlər ki, itləri gözəllik salonlarına aparan sahibləri onları tez-tez baytar yanına aparsalar daha yaxşı olar. Bəzi itlərin, ümumiyyətlə, baytar xidmətindən yararlanmadığını, müayinəyə və müalicəyə cəlb edilmədiyini deyən mütəxəssislərin sözlərinə görə, bu da həmin itlərin salonlar üçün təhlükə yaratmasına səbəb olur.
Yolçu Xanvəli: “İtlərin gözəllik salonlarına aparılmasından əvvəl onların müalicə edilməsi daha məqsədəuyğundur”
Kənd Təsərrüfatı Nazirliyi yanında Aqrar Xidmətlər Agentliyinin İnformasiya təminatı, ictimaiyyətlə əlaqələr və beynəlxalq əməkdaşlıq şöbəsinin baş məsləhətçisi Yolçu Xanvəli də “Bakı-Xəbər”ə bildirdi ki, itlərin gözəllik salonlarına aparılmasından daha vacib olanı onların baytar yanına aparılması, həkim müayinəsindən keçirilməsidir. “İtlərin gözəllik salonlarına aparılmasından əvvəl onların müalicə edilməsi daha məqsədəuyğundur. Əvvəlcə sahibli itlər həkim nəzarətindən keçməli və sahibi əmin olmalıdır ki, onun itində quduzluq, qurd, gənə və s. yoxdur, onda o, itini həmin salona aparmalıdır. Bəzən görürsən ki, heyvanda hər hansı bir xəstəlik olur və o heyvanın xəstəliyi başqa heyvanlar üçün də təhlükə yaradır. İt sahibləri Aqrar Xidmətə müraciət etməli, itini qeydiyyata aldırmalı, onu müayinədən keçirməli, xəstəliyi varsa müalicə etdirməlidirlər. Aqrar Xidmətdə 250 mindən çox sahibli it qeydiyyatdan keçib. Onların 235 mininə müxtəlif xəstəliklərə qarşı vaksinlər vurulub. Hesab edirəm ki, itin gözəlliyindən öncə onun sağlamlığı əsas götürülməlidir” - deyə Y.Xanvəli qeyd etdi.
İradə SARIYEVA
