Bakıda bir çox ərazidə Xəzərin və sahilboyu zolağın çirklənməsi halları ilə qarşılaşırıq. Məsələn, Şıx, Buzovna çimərliyində sahil zolağı kanalizasiya suları ilə yanaşı, məişət tullantıları ilə də çirkləndirilir. Xəzər dənizini çirkləndirən istirahət mərkəzlərinə dəfələrlə xəbərdarlıq edilsə də, həmin məkan sahibləri işlərində hər hansı bir dəyişiklik etmədilər. Belə olan vəziyyətdə Xəzər dənizini çirkləndirən istirahət mərkəzləri cərimələnib.
Qeyd edək ki, Xəzər dənizi sahillərində ətraf mühitin mühafizəsi haqqında qanunvericiliyin tələblərinə riayət olunmasını yoxlamaq məqsədilə Ekologiya və Təbii Sərvətlər Nazirliyinin əməkdaşları Daxili İşlər Nazirliyinin Baş İctimai Təhlükəsizlik İdarəsinin nümayəndələri ilə birgə növbəti reydlər keçiriblər. Reydlər zamanı Sumqayıt şəhərinin Xəzər dənizinin sahil zolağında fəaliyyət göstərən "Duyğu", "Liman", "Atlantida", "Narınqala" və "Flaqman" istirahət mərkəzlərində formalaşan tullantı sularının təmizlənmədən dənizə axıdıldığı aşkar edilib. Ətraf mühitin mühafizəsi haqqında qanunvericiliyin tələblərini pozduqlarına görə cavabdeh şəxslər Etibar Məmmədov, Mehriban Kılıc, Ələkbər Qarayev, Süleyman Məmmədov, Amil Mirzəquliyev barəsində protokol tərtib olunub və onların hər biri vəzifəli şəxs qismində 2500 manat məbləğində cərimə edilib. Sutəmizləyici qurğuların quraşdırılması üçün sözügedən obyektlərin sahiblərinə icrası məcburi olan "məcburi göstəriş"lər verilib. Eyni zamanda, qurğular quraşdırılanadək sözügedən obyektlərin fəaliyyətlərinin dayandırılması ilə bağlı Sumqayıt İnzibati-İqtisadi Məhkəməsi qarşısında vəsatət qaldırılıb.
İlqar Hüseynli: “... 2500 manat deyil, daha yüksək məbləğdə cərimə...”
Sosial sahə üzrə ekspert İlqar Hüseynli bizimlə söhbətində qeyd etdi ki, dənizə çirkab sular axıdanlar və məişət əşyaları atanlar sərt şəkildə cəzalandırılmalıdırlar: “Bu günlərdə dənizi çirkləndirən istirahət mərkəzlərinin sahibləri müəyyən məbləğdə cərimələniblər. Dənizi və onun sahilini çirkləndirənlər yüksək məbləğdə cərimələnməlidirlər ki, bu hal digərlərinə də dərs olsun”.
Həmsöhbətimiz onu da vurğuladı ki, Xəzər dənizinin ətrafında fəaliyyət göstərən istirahət mərkəzlərinin bir qismi çirkab sular üçün xüsusi qurğu quraşdırmayıb. Belə olduğu halda, həmin çirkab su dənizə axıdılır: “Aidiyyəti qurumlar dəfələrlə çirkab suların dənizə axıdılmaması, iaşə obyektlərinə xüsusi qurğunun quraşdırılmasının vacibliyi barədə xəbərdarlıq ediblər. Ancaq bəzi sahibkarlar həmin xəbərdarlığa əhəmiyyət verməyərək ekologiyanı pozmaqla məşğuldurlar. Bu səbəbdən də hesab edirəm ki, Xəzər dənizini və onun sahilini çirkləndirən istirahət mərkəzlərinin sahibləri sərt şəkildə cəzalandırılmalıdırlar. Zənnimcə, dənizi çirkab su ilə çirkləndirənlərin 2500 manat dəyərində cərimələnməsi az rəqəmdir. Hesab edirəm ki, Xəzər dənizini bilərəkdən çirkləndirən sahibkarlar 2500 manat deyil, daha yüksək məbləğdə cərimə olunmalıdırlar”.
Günel CƏLİLOVA
