Yay fəslində insanlar istirahət üçün ya ölkə xaricinə üz tutur, ya da daxildə istirahət edirlər. Ölkə daxilində istirahət etmək istəyənlərin bir qismi rayonlarda fəaliyyət göstərən istirahət mərkəzlərinə yollanır. Bölgələrdə insanların rahat şəkildə istirahəti üçün 4-5 ulduz adı ilə otellər açılıb. Həmin otellərdə ulduz sayına uyğun xidmətin göstərilmədiyi bildirilir. Bunu tək sadə əhali deyil, eyni zamanda, Dövlət Turizm Agentliyinin sədri Fuad Nağıyev də bildirir.
O qeyd edir ki, otellərin ulduzlanması yeni sistemlə aparılacaq: “Otellər yenidən akkreditasiya olunacaq. Bununla ictimai qurum məşğul olacaq. Lakin sonda yekun qərarı biz verəcəyik. Bununla bağlı ictimaiyyətə 2 ay müddətində məlumat veriləcək".
F.Nağıyev qeyd edib ki, mövcud vəziyyətdə otellər göstərdiyi ulduzlara uyğun xidmət etmirlər: "Bakıda 100-dən çox fəaliyyət göstərən oteldə bu barədə problem yoxdur. Bakıda otellərin ulduzları ilə göstərdikləri xidmətin keyfiyyəti arasında fərqin olması faktı çox cüzidir, ancaq regionlarda bu problem müşahidə edilir”.
Elçin Rüstəmov: “… dünyada ənənəvi qəbul edilən 4 ulduz otellərin standartlarına cavab vermir”
Regionlardakı otellərin ulduz sayına uyğun xidmət göstərməsi və bu məsələyə yenidən baxılması barədə fikir bildirən turizm sahəsi üzrə ekspert Elçin Rüstəmov “Bakı-Xəbər”ə açıqlamasında qeyd etdi ki, otellərdə ulduz verilmə mexanizminə yenidən baxılmalıdır: “Otellərə ulduzların yenidən verilməsinə ehtiyac var, çünki ulduzların tətbiqi otelin keyfiyyətinin göstəricisidir. Hər bir ulduzun özünün dünya praktikasında nəzərdə tutulmuş standartları var. Həmin standartlarda otellərdə vanna otaqlarının sayı belə nəzərə alınmaqla ulduzların sayı müəyyən edilir. Hər bir otel ulduzların sayı çərçivəsində öz işini qurmağa çalışır. Azərbaycanda bir qisim 4 ulduzlu otelin xidmətləri çox təəssüf ki, dünyada ənənəvi qəbul edilən 4 ulduz otellərin standartlarına cavab vermir və onların xidmətləri səviyyəsində deyil. Əslində, xaricdən gələn turist Azərbaycanda 4 ulduzlu otelin xidmət keyfiyyəti haqqında qabaqcadan məlumatlı olmalıdır. Xaricdən gələn turist 4 ulduzlu və ya 3 ulduzlu otelə gedəndə ona uyğun hansı xidməti alacağını qabaqcadan bilməlidir. Bir çox hallarda gedəndə bəlli olur ki, 4 ulduzlu otel heç də dünya ölkələrində 3 ulduzlu otelin təklif etdiyi xidmətləri belə təklif etmir”.
Həmsöhbətimiz onu da vurğuladı ki, hər bir otel göstərdiyi xidmətin keyfiyyət səviyyəsinə uyğun ulduz almalıdır: “Bu, birdəfəlik medal deyil. Bir neçə ildən bir keçirilən akkreditasiya nəticəsində bəzi mehmanxanaların ulduzlarının sayı artırıla və ya azaldıla bilər. Avropa təcrübəsinin də tətbiq olunması təqdirəlayiqdir. Çünki bir neçə ildir Bakıda və regionlarda otellərin sayı artıb. Həmin otellər heç nəyə əsaslanmadan, heç bir müqavilə öhdəliyi olmadan ulduz qoyurlar”.
Günel CƏLİLOVA
