Bağçalarda ərzaq təhlükəsizliyi məsələsinə Qida… Agentliyi özü qarışdı…
Yay mövsümünün başlanması ilə əlaqədar bağçalarda uşaqların düzgün qidalanmasına nəzarət məqsədilə Azərbaycan Respublikasının Qida Təhlükəsizliyi Agentliyi (AQTA) tərəfindən monitorinqlər aparmaq üçün tədbirlər planı hazırlanır. Bu barədə agentliyin mətbuat xidməti məlumat verib.
Qeyd olunur ki, məktəbəqədər yaşlı uşaqların rasional və təhlükəsizlik qaydalarına uyğun qidalanması əhalinin və gələcək nəsillərin sağlamlığının təmin olunması üçün vacib şərtdir və strateji əhəmiyyət daşıyır: “Gələcək nəsillərin sağlam böyüməsi və uşaqların fiziki cəhətdən normal inkişafını təmin edən ən vacib komponent onların düzgün qidalanması ilə bağlıdır. Özündə gündəlik lazımi qida dəyərini ehtiva edən qida maddələrindən ibarət balanslaşdırılmış qida rasionu uşaq orqanizminin böyüməsi və normal inkişafını təmin edir. Düzgün qidalanma xüsusilə uşaqların immunitetinə müsbət təsir etməklə orqanizmin dözümlülüyünü artırır, onların psixoloji cəhətdən düzgün inkişafına əlverişli şərait yaradır. Odur ki, uşaq bağçalarının təhlükəsiz qida məhsulları ilə təmin edilməsi və uşaqların sağlam qidalanması çox böyük əhəmiyyət kəsb edir”.
Ekspertlər məktəbəqədər təhsil müəssisəsində uşaqların düzgün qidalanmasına nəzarət olunması üçün monitorinqlərin keçirilməsini müsbət dəyərləndirirlər.
- Fatimə Hacıbəyli: “… bəzi bağça müdirləri və ayrı-ayrı yerli icra hakimiyyəti orqanları tərəfindən həmin ərzağın böyük əksəriyyəti mənimsənir”
“Vəfa” Sosial Problemlərə Dəstək İctimai Birliyinin rəhbəri Fatimə Hacıbəyli “Bakı-Xəbər”ə açıqlamasında qeyd etdi ki, bu gün əksər bağçalarda qidalanma ilə bağlı çoxsaylı problem yaşanır: “Bu olduqca ciddi nöqsandır. Məlumat üçün bildirim ki, dövlət tərəfindən hər bir uşağın qidalanması üçün menyu müəyyən olunsa da, bəzi bağça müdirləri və ayrı-ayrı yerli icra hakimiyyəti orqanları tərəfindən həmin ərzağın böyük əksəriyyəti mənimsənir. Beləliklə, həmin qidalar uşaq bağçasına gedib çatmır. Bu problemlə bağlı şikayətlər yetərincədir. Valideynlərin özləri övladlarına evdən ərzaq qoymasa, o zaman uşaqlar keyfiyyətsiz qida ilə qidalanmalı olacaqlar. Təəssüf ki, bu problem bütün dövlət uşaq bağçalarında qeydə alınır.
Məlumat üçün bildirim ki, dövlət tərəfindən gün ərzində 4 dəfə yüksək səviyyədə qidalanma menyusu müəyyən edilib verilsə də, təəssüf ki, uşaqlar üçün verilən qidalar daha keyfiyyətsiz və az həcmdə olur. Bu səbəbdən bağçalarda aidiyyəti qurumların iştirakı ilə monitorinqlərin keçirilməsi vacibdir. Tək yay aylarında deyil, ilin bütün fəsillərində uşaqların necə qidalanmasına nəzarət etmək üçün bağçalarda yoxlanış etmək lazımdır”.
Həmsöhbətimiz onu da əlavə etdi ki, dövlət uşaq bağçalarından fərqli olaraq, özəl bağçalarda uşaqların qidalanması ilə bağlı hər hansı bir problem yoxdur.
Günel CƏLİLOVA
