18/07/2019 09:18
728 x 90

Təhsil Nazirliyinin yeni layihəsi – dərslik müzakirəsinə ictimaiyyəti qoşmağın ən işlək üsulları...

img

Dərsliklərin məzmun və keyfiyyətinin yüksək səviyyədə olması əsas məsələlərdən biridir. Son dövrlər dərsliklərin məzmun və keyfiyyəti, eləcə də həcmi ən çox müzakirə edilən, barəsində tənqidi fikirlər, rəylər bildirilən məsələlərdən biridir. Bildiyimiz kimi, şagirdlərin istifadə etdikləri dərsliklərin keyfiyyətinin yüksəldilməsi, məzmununun təkmilləşdirilməsi sahəsində mövcud problemlərin aradan qaldırılması üçün Təhsil Nazirliyi addımlar atır.

Qeyd edək ki, nazirlik 2018-2019-cu tədris ilində istifadəyə verilən dərsliklərlə də bağlı müzakirə açmışdı. Müzakirə zamanı bildirilirdi ki, dərsliklərin bir çoxunda əvvəlki tədris illərində istifadə edilən dərsliklərdə müşahidə edilən nöqsanların xeyli hissəsi aradan qaldırılsa da, mütəxəssislər hesab edirlər ki, yenə də qüsurlar var.  

Təhsil Nazirliyi bu problemin həlli üçün yeni bir addım atıb. Belə ki, nazirlikdə dərslik layihələrinə dair ictimai rəyin öyrənilməsinə başlanıb.

Təhsil Nazirliyi yenidən dərsliklərlə bağlı ictimaiyyətə çağırış edib. Nazirlik təhsil işçiləri, ziyalılar, valideynlər və bütün digər maraqlı tərəfləri dövlət ümumtəhsil müəssisələri üçün hazırlanan dərslik layihələrinə dair ictimai rəyin öyrənilməsi prosesində aktiv iştirak etməyə dəvət edib.

Nazirlikdən mətbuata verilən məlumata görə, 2019-2020-ci tədris ilinə ölkənin dövlət ümumtəhsil müəssisələrinin I sinifləri üçün yeni hazırlanmış, IV və VIII sinifləri üçün isə təkmilləşdirilmiş dərslik layihələrinə dair ictimai rəyin öyrənilməsi prosesi davam edir. 2019-cu ilin aprel ayının ortalarından başlamış proses iyul ayının ortalarına qədər davam edəcək. Hazırda ən çox baxış sayının I sinif “Azərbaycan dili (tədris dili)” dərslik layihəsinə aid olduğu müşahidə edilir. “Nazirlik bir daha alimləri, təhsil işçilərini, ziyalıları, valideynləri və bütün digər maraqlı tərəfləri müzakirəyə çıxarılmış dərslik layihələrinə dair öz arzu, irad və təkliflərini bildirməyə dəvət edir".

  • Rafiq İsmayılov: “Düşünürəm ki, dərsliklərlə bağlı ictimai müzakirəyə qoşulanlar məsələyə obyektiv yanaşacaqlar”

Tanınmış dərslik müəllifi Rafiq İsmayılov hesab edir ki, nazirlik tərəfindən dərsliklərin ictimai müzakirəyə çıxarılması əhəmiyyətlidir və bu öz bəhrəsini verəcək. Onun sözlərinə görə, bu faktor artıq söz-söhbətlərə, fikir ayrılıqlarına son qoyacaq. “Nazirlik tərəfindən dərsliklərin ictimai müzakirəyə çıxarılması əhəmiyyətlidir və bu öz bəhrəsini verəcək. Düşünrəm ki, dərsliklərlə bağlı ictimai müzakirəyə qoşulanlar məsələyə obyektiv yanaşacaqlar” - deyə R.İsmayılov bildirdi.

  • Nadir İsrafilov: “Nazirlik tərəfindən dərsliklərin müzakirəsinin keçirilməsini çox faydalı hesab edirəm”

Tanımış təhsil eksperti Nadir İsrafilov da hesab edir ki, nazirlik tərəfindən dərsliklərin ictimai müzakirəyə çıxarılması olduqca əhəmiyyətli bir işdir və bunun böyük faydası olacaq. “Bu olduqca əhəmiyyətli məsələdir. Bizim dərslik problemi bəlkə də öz həllini çoxdan tapardı. Lakin uzun illərdir bu sahədə problemlər var. Sovet dövründə dərsliklərin bir qismi Moskvada hazırlanırdı. Dəqiq fənlər üzrə dərsliklər orada hazırlanırdı, Azərbaycanda tərcümə edilərək çap olunurdu. Humanitar fənlər üzrə dərsliklər hazırlanırdı. Azərbaycan müstəqillik qazandıqdan sonra isə bütün dərsliklər öz müəlliflərimiz tərəfindən hazırlandı. Bilirsiniz, əvvəllər dərsliklər Azərbaycanın görkəmli alimləri tərəfindən hazırlanırdı. Lakin sonra tender vasitəsilə hazırlanmağa başladı. Dərsliklə bağlı tender elan edilirdi və istənilən adam dərslik hazırlamağa başladı. Tenderin qalibi olan dərslik çap olunurdu. Burada müəyyən məsələlər ortaya çıxdı. Hətta dərslik yazanlar arasında təhsilə aidiyyəti olmayan adamlar da vardı, onlar başqa ixtisas sahibləri idi. Bunun nəticəsində də dərsliklərdə xeyli nöqsanlar üzə çıxmağa başladı. Bu dərsliklərdə yalnız mütəxəssislər, alimlər, müəllimlər deyil, həm də valideynlər, şagirdlər səhvlər tutdular. Bu dərsliklərdə ciddi qüsurlar vardı. O vaxt bu dərsliklərlə bağlı daha ciddi iradlar səsləndirirdilər. Dərsliklərdə jarqonlarla yanaşı, başqa səhvlər də vardı. Bu sahədə nöqsanlar o qədər çoxaldı ki, ölkə başçısı dərsliklərin monitorinqinin keçirilməsi ilə bağlı sərəncam imzaladı. Dərsliklərdəki nöqsanların aradan qaldırılması üçün nazirlik tərəfindən son illər mütərəqqi addımlar atılır. Deyək ki, artıq nazirliyin Təhsil Problemləri İnstitutunda dərsliklərlə bağlı xüsusi şöbə yaradıldı, ehtiyat dərsliklərin hazırlanmasına başlandı. Təhsil Nazirliyinin yeni tədris ili üçün dərsliklərin ictimai müzakirəsinin keçirilməsi təşəbbüsü çox müsbət haldır. Artıq nazirlikdə dərsliklərlə bağlı xüsusi sayt yaradılıb və vətəndaşlar, alimlər, ictimaiyyət nümayəndələri çox rahat şəkildə dərsliklərlə barədə öz fikir və təkliflərini o sayta ünvanlayacaq. Bu, dərsliklərin növbəti nəşrində nəzərə alınacaq. Bu çox vacib məsələdir. Bilirsiniz ki, Prezident İlham Əliyev tərəfindən ictimai iştirakçılıqla bağlı qanun imzalanıb. Dərslik müzakirəsində ekspertlər, QHT-lər, alimlər, media nümayəndələri aktiv iştirak etməlidirlər. Nazirlik tərəfindən dərsliklərin müzakirəsinin keçirilməsini çox faydalı hesab edirəm və bu proses nə qədər davam etsə, o qədər də bizim dərsliklərimiz təkmil, məqsədəmüvafiq şəkildə nəşr olunar” - deyə N.İsrafilov qeyd etdi.

İradə SARIYEVA

Son xəbərlər