18/07/2019 09:28
728 x 90

Çimərliklərə və akvaparklara giriş xeyli bahalaşdırıldı…

“Sahibkarlar bazar iqtisadiyyatını bəhanə edib çimərliyə giriş üçün müəyyən məbləğdə pul tələb edirlər”

img

Yayın qızmar istisində sərinlənmək istəyənlərin bir qismi dəniz kənarına üz tutur. Dəniz kənarına gedəndə hamı çalışır ki, büdcəsinə uyğun istirahət mərkəzində və ya ictimai çimərlik deyilən (açıq ərazilər) ərazilərdə istirahət etsin. Kimi pulsuz açıq ərazilərə üstünlük verir, kimi istirahət mərkəzlərinə.

Ancaq müşahidələr onu göstərir ki, azacıq öz sağlamlığının qayğısına qalan şəxslər ictimai çimərliyə getmirlər. Səbəb isə göz önündədir. İctimai çimərliklər orada istirahət edən şəxslər tərəfindən zibillənir və müvafiq qurumlar tərəfindən çox gec təmizlənir. Pullu istirahət mərkəzləri isə bir çox insanın büdcəsinə görə deyil.

Dəniz mövsümü açılan kimi çimərliklərə və akvaparklara giriş haqqı qaldırılıb. Məlumatlara görə, Mərdəkan, Novxanı, Nardaran və Bilgəhdə dəniz sahilində yerləşən əksər istirahət mərkəzləri qiymətləri 5 manat artırıblar. Məsələn, böyüklər üçün qiymətlər həftəiçi üzrə 15 manatdan 20 manata, həftəsonu üzrə 20 manatdan 25 manata qaldırılıb. Qeyd edək ki, istirahət mərkəzləri yaşı 12-dən yuxarı şəxsləri böyük kateqoriyasına daxil edirlər.

6-12 yaş aralığında olan uşaqlar üçün isə qiymətlər, istirahət mərkəzindən asılı olaraq, 10 manatdan 15 və 20 manata qaldırılıb.

İstirahətə ailəvi getməyi nəzərdə tutanlar qiymət artımından məyus olublar. İndi 2 böyük və uşaqdan ibarət 4 nəfərlik ailənin həftəsonu hovuzlara və akvaparklara girişi 90 manata başa gəlir. Nahar da nəzərə alındıqda qiymət 130-150 manatadək qalxır. Yay fəslində Azərbaycanda 10 dəfə hovuzlara və akvaparklara getmək istəyən ailələr azı 1300 manat xərcləməli olacaqlar.

Çimərliklərə, istirahət mərkəzlərindəki aquaparklara giriş haqqının qaldırılması ölkə ictimaiyyəti tərəfindən xoş qarşılanmır.

  • İlqar Hüseynli: “Digər sahələrdə olduğu kimi, dəniz mövsümündə də elə rəqabət mühiti yaradılmalıdır ki, sahibkarlar süni qiymət artımına çox aludə olmasınlar”

Sosial sahə üzrə ekspert İlqar Hüseynli qeyd etdi ki, Azərbaycandakı istirahət mərkəzlərindəki qiymətlər orta əməkhaqqı səviyyəsində 500 manat gəliri olan insanların istirahəti üçün çox bahadır: “Türkiyədə, Gürcüstanda olduğu kimi, ölkəmizdə də təkcə varlılar üçün yox, imkanı aşağı olanlar üçün də şərait yaradılmalıdır. Digər sahələrdə olduğu kimi, bu sahədə də rəqabət mühiti yaradılmalıdır. Elə rəqabət mühiti yaranmalıdır ki, sahibkarlar süni qiymət artımına çox aludə olmasınlar”.

Həmsöhbətimiz onu da vurğuladı ki, bazar iqtisadiyyatı bütün sahilin pullu olması demək deyil: “Çimərliklərdə şlaqbaum quraşdıraraq camaatı pulsuz içəri buraxmırlar. Hər çimərlik, istirahət mərkəzi özünə uyğun qiymət təyin edib. Sahibkarlar bazar iqtisadiyyatını bəhanə edib nə istəyirlərsə, onu edirlər”.

Ekspertin sözlərinə görə, yay fəslində vətəndaşların Xəzərin sahilində sərbəst istirahəti artıq mümkün deyil. Çünki vətəndaşların çimərliyə daxil olması üçün ondan müəyyən məbləğdə pul tələb olunur: “Hətta uşağın girişi üçün də xüsusi məbləğ müəyyən ediblər. Ancaq sahibkarlar Prezidentin Xəzərin sahilində vətəndaşların rahat şəkildə istirahəti üçün heç bir maneə olmaması haqqında bəyanatını unudurlar. Sərəncamda qeyd olunurdu ki, Xəzər dənizinin Azərbaycan Respublikasına mənsub olan bölməsində tikinti, yaxud hasarlama işləri aparıla bilməz. Ancaq bəzi işbazlar Prezidentin məlum göstərişinə əhəmiyyət verməyərək yenə də öz bildiklərini edirlər”.

Günel CƏLİLOVA

Son xəbərlər