Bu gün uşaqlar üçün təşkil olunan əksər şənlikdə bəzək üçün helium şarlarından istifadə olunur. Tək uşaq şənliklərində deyil, eyni zamanda, bəzi dükanlar da dekor üçün hava ilə doldurulmuş şarlarla bəzənilir. Onu da qeyd edək ki, helium şarları adi şarlardan fərqli olaraq günlərlə tavanda asılı vəziyyətdə qala bilir.
Məlumdur ki, adıçəkilən helium şarları qazla doldurulur. Ekspertlər isə qəti şəkildə qapalı şəraitdə helium şarından istifadəni düzgün saymırlar. Xüsusilə də uşaq şənliklərində istifadə olunan, içərisinə helium qazı doldurulmuş şarlar təhlükə mənbəyi hesab edilir. Bu günlərdə "Megafun" Əyləncə Mərkəzində helium şarlarının partlaması nəticəsində ani alışma baş verib. Hadisə nəticəsində 6 nəfər yanıq xəsarəti alıb. Hadisə yerində olanlar arasında uşaqlar üstünlük təşkil edib.
Maraqlıdır, təhlükəsizlik baxımından helium şarlarından necə qorunmaq olar?
Əntiqə Əliyeva: “Qapalı bir məkanda şarın partlaması…”
Kimya sahəsi üzrə mütəxəssis Əntiqə Əliyeva bizimlə söhbətində qeyd etdi ki, helium qazı uşaqların tənəffüs yollarına daxil olarsa, bədəndəki oksigen miqdarını aşağı salır: “Bu isə ölümə səbəb ola bilər. Helium havadan daha yüngül olduğu üçün, bədənimizə daha tez daxil olur və oksigenin yerini tutur. Bu da 5 yaşdan aşağı olan uşaqlarda ciddi fəsadlar yaradır”.
Həmsöhbətimiz onu da vurğuladı ki, helium şarları havada olarsa, onun heç bir təhlükəsi yoxdur: "Nəzərə almaq lazımdır ki, helium təsirsiz qazdır. Onun heç bir fəsadı yoxdur. Amma uşaq hava əvəzinə bu qaz mühitində olarsa, fəsadlar yarana bilər. Helium reaksiyaya daxil olmadığı üçün partlayış törətmir. Ancaq qapalı məkanda adıçəkilən bəzək əşyasının olması düzgün deyil. Bu, şarın içində olan heliumun miqdarından asılı olan bir məsələdir. Qapalı bir məkanda şarın partlaması havada həcm nisbəti yarada bilər. Həmin vaxt uşaqlarda təngnəfəslik yaranır. Bu, qazın miqdarından asılı olan məsələdir.
Bir neçə gün öncə istirahət mərkəzlərinin birində baş vermiş xoşagəlməz hadisə qapalı bir məkanda baş verib: “Hadisənin necə baş verdiyini göstərən videoya baxanda görünür ki, uşaqları əyləndirmək üçün həmin məkanda olan şəxsin məsuliyyətsizliyi ucbatından əlində olan çilçıraq şarlara dəyib və nəticədə hadisə baş verib. Ümumiyyətlə, helium şarları olan məkanda alışqan və ya yandırıcı olan hər hansı bir əşyadan istifadə etmək olmaz. Çünki həmin şarlar qazla doldurulub”.
Günel CƏLİLOVA
