18/09/2019 22:37
728 x 90

8 iyuldan sonra Rusiya turistlərinin Gürcüstandan Azərbaycana dönüşü gözlənir...

“Qısa müddətdə Azərbaycanın turizm şirkətləri çevik və sərfəli siyasət aparsa, o zaman daha çox rusiyalı turist gələcək”

img

Rusiya Prezidenti Vladimir Putinin sərəncamına əsasən, iyulun 8-dən Rusiya aviaşirkətlərinə Gürcüstana uçmaq qadağan ediləcək. Rusiya tərəfinin məlumatına görə, müvəqqəti tədbirlər təhlükəsizlik məqsədilə qəbul olunub. Artıq bu ölkənin aviaşirkəti Gürcüstanda olan Rusiya vətəndaşlarının ölkədən çıxarılmasına başlayıb.

Bu arada, Rusiya Turizm Sənayesi İttifaqının rəsmisi İrina Tyurina bildirib ki, bütün mütəşəkkil rusiyalı turistlər iyulun 8-nə qədər plana uyğun şəkildə və ya istənilən digər mümkün reyslərlə Gürcüstandan çıxarılmalıdır: “Gürcüstanla aviasiya əlaqələri dayandırılana qədər 2 həftədən çox vaxt keçəcək və bu ölkədə istirahət edən əksər insanlar yəqin ki, plana uyğun şəkildə oradan gedəcəklər. Turistlərdən istirahətini yarımçıq qoymaq istəməyən olarsa, onlar dönüş biletlərini özləri alacaqlar”.

O da məlum olub ki, Gürcüstana artıq yeni turistlər getməyəcək. Çünki turizm operatorlarına tur satışlarını dayandırmaq tövsiyə olunub. Bununla belə, turistlər ya tam təzminata, ya da istirahətləri yarımçıq qalıbsa, qismi təzminata ümid edə bilərlər.

Onu da qeyd edək ki, uçuşların dayandırılması Gürcüstana səfərlərin qadağan edilməsi demək deyil, buna görə bir çox turist qonşu ölkələrdən, o cümlədən, Azərbaycandan oraya gedə bilər. Ancaq, istənilən halda, Rusiyadan Gürcüstana turist axınının dayanması həmin turistlərin digər ölkələrə üz tutmasına təkan verəcək. Sirr deyil ki, Rusiya turistlərinin üz tutduqları ölkələrdən biri də Azərbaycandır. 2018-ci ildə Azərbaycan 900 minə yaxın rusiyalı turisti qəbul edib. Bu göstərici 2017-ci illə müqayisədə 5 faiz çox olub. Rusiya ilə Gürcüstan arasında yaşanan bu hadisələrdən sonra sözügedən turistlərin Azərbaycana daha çox axın edəcəkləri gözlənilirmi? Ekspertlərin bununla bağlı gözləntiləri nədən ibarətdir?

  • Çingiz İsmayılov: “Söhbət həm servis, həm də qiymət baxımından sərfəli olan turpaketlərdən gedir”

Məsələyə münasibət bildirən turizm sahəsi üzrə ekspert Çingiz İsmayılovun sözlərinə görə, Azərbaycan tərəfi bu məsələdə daha sərfəli təkliflərlə çıxış etməlidir: “Rusiya rəsmən bildirdi ki, Gürcüstana yönəldilən turların yerinə alternativ istiqamətlər təklif olunub. Bunlar Abxaziya ilə Türkiyədir. Rusiya tərəfinin bəyanatında Azərbaycanın adı çəkilmədi. Ancaq bu o demək deyil ki, həmin turistlər Azərbaycana üz tutmayacaqlar. Təbii ki, Rusiya turistləri fərdi olaraq daha çox Azərbaycanı da seçə bilərlər. Ancaq, bununla yanaşı, gərək biz yaranan bu fürsətdən maksimum dərəcədə öz xeyrimizə istifadə edək. Bunun üçün də müvafiq üstünlükləri olan turpaketlər Rusiya turistlərinə təklif edilməlidir. Söhbət həm servis, həm də qiymət baxımından sərfəli olan turpaketlərdən gedir. Hesab edirəm ki, qısa müddətdə Azərbaycanın turizm şirkətləri çevik və sərfəli siyasət aparsa, o zaman daha çox rusiyalı turist gələcək. Yoxsa gözləsələr ki, haçan həmin turistlər özləri seçim edəcəklər, o zaman bunun elə də səmərəsi olmayacaq. Ona görə də bu məsələdə turizm şirkətlərinin üzərinə böyük iş düşür. Onlar gərək bundan səmərəli şəkildə faydalanmağa səy göstərsinlər. Ötən illərlə müqayisədə Azərbaycana gələn Rusiya turistlərinin sayında artım tendensiyası var. Çalışmaq lazımdır ki, daha çox turist ölkəyə gəlsin”.

Vidadi ORDAHALLI

Son xəbərlər