Əhalinin bütün təbəqələrinin sosial rifah halının yüksəldilməsi dövlətin hədəflədiyi əsas istiqamətlərdən biridir. Son bir neçə ayda müxtəlif sahələrdə çalışan işçilərin əməkhaqlarının artırılması ilə bağlı Prezident tərəfindən bir sıra sərəncamlar imzalanıb. Son 5 ayda demək ölkəmizdə cəmiyyətin sosial rifahının yüksəldilməsi naminə saysız sosial paketlər imzalanıb.
Məlum olduğu kimi Prezident İlham Əliyevin müvafiq sərəncamı ilə ölkədə minimum əməkhaqqı artırıldı. Minimum əməkhaqqının artması ilə əlaqədar məktəblərdə işləyən qeyri-müəllimlərin də maaşlarında artım olacaq.
Təhsil Nazirliyinin Aparat rəhbərinin müavini Fərzəli Qədirovun mətbuata verdiyi məlumata görə, məktəblərdə müəllimlərlə yanaşı, 100 minə yaxın müəllim olmayan işçi işləyir: “Həmin işçilərin də əməkhaqlarında artım olacaq. Ancaq onların hansı həcmdə əməkhaqqı alacağını demək mümkün deyil, çünki hökumət tərəfindən vahid tarif cədvəli təsdiq ediləcək və o, icra üçün göndəriləcək. Bundan sonra konkret şəkildə deyə biləcəyik ki, müəllim işləməyən digər işçilərin əməkhaqları nə qədər artacaq”.
Ekspertlərin qənaətinə görə, son dövrlər müəllimlərin maaşlarının bir neçə dəfə artırılması dövlətin orta təhsil sisteminin formalaşmasına verdiyi töhfələrdən biridir. Artıq məlum olduğu kimi müəllimlərlə bərabər məktəblərdə çalışan qeyri-müəllimlərin də, maaşları artırılacaq.
Nadir İsrafilov: “Əməkhaqqı artımı məktəblərdə işləyən qeyri-müəllimlərin işinə stimullaşdırıcı təsir göstərəcək”
Tanınmış təhsil eksperti Nadir İsrafilov baki-xeber.com-a bildirdi ki, orta ümumtəhsil məktəblərində işləyən qeyri-müəllimlərin əməkhaqlarının artırılması bu sahədə çalışanların sosial rifah halının yüksəldilməsində mühüm rol oynayacaq.
“Orta məktəb müəllimlərinin maaşlarının qaldırılması çox mühüm bir hadisədir. Əlbəttə, müəllimlərin maaşlarının bir neçə dəfə artırılması məktəblərdə işləyən qeyri-müəllimlərə müəyyən qədər pis təsir edirdi ki, bizim nə üçün əməkhaqlarımız qalxmır. Hətta bu müəyyən qədər narazılıqlar da yaradırdı, amma artıq bu məsələ öz həllini tapıb. Prezident İlham Əliyevin minimum əməkhaqqının artırılması ilə bağlı sərəncamında orta məktəblərdə çalışan qeyri-müəllimlərin də əməkhaqlarının qaldırılması məsələsinin əks olunması bu sahədə çalışan insanlara sözün əsl mənasında stimul verir. Bilirsiz ki, məktəblərdə müəllimlərlə yanaşı psixoloqlar, uşaq birlikləri, laborantlar, həkimlər, kitabxanaçılar və s. də işləyir. Onlar da təhsil kollektivinin üzvləridir. Əməkhaqqı artımı məktəblərdə işləyən qeyri-müəllimlərin işinə stimullaşdırıcı təsir göstərəcək. Hesab edirəm ki, dövlət başçısının son dövrlər imzaladığı sosial paketlər həm müəllimlərin, həm də qeyri-müəllimlərin sosial rifah halının yüksəlməsinə səbəb olacaq. Bilirsiz ki, bir vaxtlar müəllimlərin də, qeyri-müəllimlərin də əməkhaqları çox aşağı idi. Lakin son dövrlər dövlətin həyata keçirdiyi məqsədyönümlü sosial siyasət nəticəsində artıq müəllimlərin əməkhaqları artırılıb, eyni zamanda əməkhaqqı artımı orta məktəblərdə işləyən qeyri-müəllimlərə də şamil edilir. Bütün bunlar onu göstərir ki, məktəb sistemi və burada çalışanlar dövlətin diqqət mərkəzindədir” – ekspert deyir.
N.İsrafilovun qeyd etdiyinə görə, həm dövlət başçısı, həm də dövlət rəsmiləri dəfələrlə bildiriblər ki, Azərbaycan dövlətinin həyata keçirdiyi sosial siyasətin hədəfi ölkə əhalisinin sosial rifah halının gücləndirilməsidir.
“Prezidentin bu sahədə gördüyü işlər inanın ki, məktəb kollektivlərində böyük ruh yüksəkliyi ilə qarşılanır. Bilirsiz ki, mənim müxtəlif məktəb kollektivləri ilə sıx əlaqəm var və mən müəllimlərin və qeyri-müəllimlərin razılığını onların dilindən eşidirəm. Əlbəttə, qeyri-müəllimlərin də müəllimlərlə paralel olaraq əməkhaqlarının artırılması dövlətin bu sahəyə diqqətinin və həssas münasibətinin təzahürüdür” - deyə N.İsrafilov qeyd etdi.
İradə SARIYEVA
