Azərbaycan orta ümumtəhsil məktəblərində qadın və kişi müəllimlərin nisbətinin pozulmasından daha çox oğlan şagirdlər əziyyət çəkirlər. Kişilərin müəllimlik fəaliyyətinə kütləvi maraq göstərməməsinin səbəbi kimi əsasən əməkhaqqının aşağı olması göstərilir. Cəmiyyətdə belə bir fikir mövcuddur ki, müəllim maaşı ilə ailə saxlamaq çətindir.
Məlum olduğu kimi, son bir neçə ildə müəllimlərin maaşında xeyli artım baş verib. Prezident İlham Əliyevin bir neçə gün əvvəl imzaladığı sərəncamlarla bir sıra sahələrdə fəaliyyət göstərənlərin, eləcə də müəllimlərin maaşı yenidən qaldırılıb. Prezident sərəncamı ilə müəllimlərin maaşının artması sıradan bir göstərici deyil. Müəllimlərin əməkhaqlarının qaldırılması mütəmadi olaraq dövlətin diqqət mərkəzində olan məsələdir və dövlət daim bu amili diqqətdə saxlayır.
Müəllimlərin əməkhaqlarının 20 faiz artırılması kişi müəllimlərin orta ümumtəhsil məktəblərində dərs deməyə maraq göstərməsinə nə kimi şərait yaradacaq?
Ekspertlər qeyd edirlər ki, son dövrlər bir neçə dəfə Azərbaycan müəlliminin əməkhaqqının artırılması nəticəsində müəllimlər 600-700 civarında maaş alırlar. Onlar hesab edirlər ki, maaş artımı ali məktəbi müəllim kimi bitirən kişilərin pedaqoji fəaliyyətlə məşğul olmasına imkan verir. Bu gün Azərbaycan müəlliminin normal əməkhaqqı aldığını deyən mütəxəssislərin bildirdiyinə görə, bu hətta müəllimlik peşəsini başqa peşələrə dəyişən kişilərin də orta təhsilə qayıtmasına əsas verir.
Kamran Əsədov: “Aparılan islahat nəticəsində həmin müəllimlərin orta aylıq əməkhaqqı 465 manat təşkil etməklə, ölkə üzrə müvafiq göstəriciyə yaxınlaşıb”
Tanınmış təhsil mütəxəssisi Kamran Əsədov “Bakı-Xəbər”ə bildirdi ki, son illər Azərbaycanda təhsilə qayğı ildən-ilə artmaqdadır. “İlk növbədə qeyd edim ki, təhsil sistemində müəllimlərin 79 faizini qadınlar, təhsil alanların isə 47 faizini qızlar təşkil edir. Peşə təhsilində bu göstərici təhsil verənlər üzrə 69, təhsil alanlar üzrə 33, orta ixtisas sahəsində təhsil verənlər üzrə 78 faiz təşkil edir. Bakalavriat səviyyəsində təhsil alanların 50, magistratura səviyyəsində 54, doktorantura səviyyəsində isə 56 faizini qadınlar təşkil edir. Hazırda fəlsəfə doktorlarının 51, elmlər doktorlarının isə 46 faizini qadınlar təşkil edir.
Prezident İlham Əliyevin rəhbərliyi ilə həyata keçirilən milli təhsil islahatlarının bir hissəsini də ixtisaslı müəllim kadrlarının hazırlanması, müəllimlərin sosial vəziyyətinin yaxşılaşdırılması təşkil edir. Son illər Azərbaycanda təhsilə qayğı ildən-ilə artmaqdadır. Bunu təhsilin bütün sferalarında aparılan davamlı islahatlar bir daha təsdiq edir. 2014-2018-ci illərdə Təhsil Nazirliyinin diaqnostik qiymətləndirməsindən keçən müəllimlərin orta aylıq əməkhaqqı 465 manatdır. 2014-cü ildən bu günə kimi 142 min müəllim diaqnostik qiymətləndirmədən keçib. Amma maaşın 20 faiz artımı diaqnostik qiymətləndirmədən keçməyənlərə də şamil olunur. Əməkhaqlarının artımı diaqnostik qiymətləndirmədən keçən bütün müəllimlərə şamil ediləcək. Amma artım zamanı qiymətləndirmədən keçən müəllimlər arasında fərq qoyulmayacaq, artım bütün müəllimlərin əməkhaqlarına eyni səviyyədə təsir göstərəcək.
Hazırkı dövrdə diaqnostik qiymətləndirmənin nəticələri müəllimlərin dərs bölgüsü zamanı nəzərə alınır. Bu o deməkdir ki, diaqnostik qiymətləndirmənin nəticələri yüksək olan müəllim daha çox dərs saatı alacaq və bu da onun yüksək əməkhaqqı almasına imkan verəcək”.
K.Əsədovun qeyd etdiyinə görə, bu artımdan sonra təkcə Bakı şəhərində 8965 nəfər müəllimin əməkhaqqı 500-1000 manat, 476 nəfər müəllimin əməkhaqqı isə 1000 manatdan yuxarı olub. “Aparılan islahat nəticəsində həmin müəllimlərin orta aylıq əməkhaqqı 465 manat təşkil etməklə, ölkə üzrə müvafiq göstəriciyə yaxınlaşıb. Yeni artımdan sonra müəllimlərin əməkhaqqı orta hesabla 77-99 manat artıb. İndi pedaqoji stajı 3 ilə qədər olan və bir stavka dərs yükü (18 saat) dərs deyən müəllim aylıq 462 manat, pedaqoji stajı 18 ildən çox olan və və bir stavka dərs yükü (18 saat) dərs deyən müəllim aylıq 594 manat aylıq əməkhaqqı alacaq. Ölkə Prezidenti tərəfindən müəllimlərin əməkhaqqının dəfələrlə artırılması kişi müəllimləri yenidən məktəblərə qaytaracaq” - deyə mütəxəssis qeyd etdi.
İradə SARIYEVA
