24/10/2019 09:25
728 x 90

Zibilə görə Bakı bələdiyyə sədrlərinin cəzalandırılmasına çoxdan başlamaq lazım idi…

“Tək Bakıətrafı qəsəbələr deyil, mərkəzi ərazilərdə də zibil qutuları gün ərzində bir neçə dəfə boşaldılmalıdır ki, yığılıb ətrafa üfunət saçmasın”

img

Paytaxt Bakının vaxtlı-vaxtında daşınmadığından qalaq-qalaq yığılan məişət tullantıları problemi illərdir həllini tapmır. Xüsusilə Bakıətrafı kənd və qəsəbələrdə ərzaq tullantıları küçəboyu səpilir, üfunətdən nəfəs almaq mümkün olmur. Natəmiz ərazilər isə sahibsiz heyvanların məskəninə çevrilir. Təbii ki, belə şəraitdə müxtəlif növ xəstəliklər yaranır.

Bəllidir ki, istənilən ərazinin təmizliyinə, tullantıların vaxtlı-vaxtında daşınması ilə bələdiyyələr məşğul olmalıdırlar. Ancaq bələdiyyələr ərazinin təmizliyi ilə məşğul olmurlar. Onların necə fəaliyyət göstərdiyi sual doğurur.

Tullantıların yığılaraq qalaqlandığı ərazilərdən biri də Suraxanı rayonu, Zığ qəsəbəsidir. Adıçəkilən qəsəbədə tullantıların qalaqlandığı və düzgün idarə olunmadığı aşkar edilib.

Ekologiya və Təbii Sərvətlər Nazirliyinin mətbuat xidmətindən “Trend”ə verilən məlumata görə, 11 saylı Regional Ekologiya və Təbii Sərvətlər İdarəsinin əməkdaşları tərəfindən keçirilən növbəti reyd zamanı Suraxanı rayonu, Zığ qəsəbəsi ərazisində tullantıların qalaqlandığı və düzgün idarə olunmadığı aşkar edilib.

Faktla bağlı əraziyə cavabdeh Zığ qəsəbə bələdiyyəsinin sədri Kənan Nəsrullayev barəsində protokol tərtib edilib və ona inzibati qaydada 2500 manat məbləğində cərimə tətbiq olunub.

Həmçinin, tullantıların qısa vaxt ərzində təmizlənməsi və gələcəkdə düzgün idarə olunması tələbi ilə bələdiyyə sədrinə icrası məcburi olan müddətli “məcburi göstəriş” verilib. 

Ərazinin təmizliyinə nəzarət etməyən qurumların cəzalandırılması ictimaiyyət tərəfindən müsbət qarşılanır. Çünki əksər Bakıətrafı ərazilərdə tullantılar daşınmadığı üçün zibil qalaqlanır və həmin ərazidə xoşagəlməz mənzərə yaranır. Bu cür halların yaşanmaması üçün dəfələrlə aidiyyəti qurumlar tərəfindən müəyyən işlər görülsə də, vəziyyət hələ də eyni olaraq qalırdı. Ancaq bu günlərdə Ekologiya və Təbii Sərvətlər Nazirliyinin tullantıları düzgün idarə etməyən bələdiyyəni cərimələməsi təqdir olunur.

  • İlqar Hüseynli: “… ərazi üzrə məsul olan bələdiyyənin cərimələnməsindən sonra digər bələdiyyələr…”

Sosial sahə üzrə ekspert İlqar Hüseynli “Bakı-Xəbər”ə açıqlamasında qeyd etdi ki, məişət tullantılarının düzgün idarə olunmamasına görə bələdiyyənin cərimələnməsi müsbət haldır: “Vəzifəli və hüquqi şəxslərin cərimələrinin artırılması təqdirəlayiqdir. Həmin ərazidə zibil qutusu yoxdursa, buna nəzarət edən qurum cəzalandırılmalıdır. Bu gün elə ərazilər var ki, orada zibil qutusu olsa belə, tullantı əhalinin istifadə etdiyi əraziyə tökülür. Beləliklə, həmin ərazidə tullantılardan ibarət təpəcik yaranır. Həmin ərazidə olan tullantı vaxtında təmizlənərsə, heç bir təpəcik yaranmaz. Ancaq bəzi bələdiyyələr və ya əraziyə nəzarət edən qurumlar öz işinə məsuliyyətsiz yanaşdığına görə onların cərimələnməsi düzgün addımdır”.

Həmsöhbətimiz onu da vurğuladı ki, tək Bakıətrafı qəsəbələr deyil, mərkəzi ərazilərdə də zibil qutuları gün ərzində bir neçə dəfə boşaldılmalıdır ki, yığılıb ətrafa üfunət saçmasın. Əks təqdirdə, Bakı, xüsusilə şəhərdən kənar yerlər zibilin içində itib-batacaq: “Onu da bildirim ki, tullantı vaxtında təmizlənmədiyinə görə ərazi üzrə məsul olan bələdiyyənin cərimələnməsi yaxşı haldır. Bundan sonra digər bələdiyyələr cərimələnməmək üçün nəzarət etdikləri ərazini təmiz saxlamağa çalışacaqlar”.

Günel CƏLİLOVA

Son xəbərlər