Uzun müddətdir Bakının tarixi mərkəzinin sərhədlərinin müəyyənləşdirilməsi ilə bağlı məsələ gündəmdədir. Bakının tarixi sərhədlərinin hələ tam müəyyən edilməsi mümkün olmayıb. Bəzi ekspertlərin qənaətinə görə, Bakının tarixi sərhədi İçərişəhərdən başlayıb mikrorayonlarda başa çatır. Əslində, bu yanaşmanın özündə ziddiyyətlər var.
“Bakının tarixi sərhədləri haradan başlayıb, harada bitir” sualına hətta memarlar və tarixçilər də birmənalı fikir bildirə bilmirlər.
Azərbaycan Memarlar İttifaqı İdarə Heyətinin sədri Elbay Qasımzadə mətbuata bildirib ki, Bakının tarixi mərkəzinin sərhədlərinin müəyyənləşdirilməsi ilə bağlı layihə hazırlanıb. “Bakının tarixi mərkəzinin sərhədlərinin müəyyənləşdirilməsi ilə bağlı layihəni hökumətə təqdim etmişik” - deyə bildirən E.Qasımzadənin sözlərinə görə, Memarlar İttifaqı üzərinə düşən vəzifəni yerinə yetirib: “Sərhədlər haqqında məlumat verə bilmərəm, çünki hələ təsdiqlənməyib. Təsdiqləndikdən sonra yəqin ki, hamı biləcək. Sərhədlərin dəyişməsi Milli Məclisin səlahiyyətidir. Milli Məclis baxıb sərhədləri dəyişməlidir”.
Qeyd edək ki, Prezident İlham Əliyev və birinci xanım Mehriban Əliyevanın mədəniyyət və incəsənət xadimləri ilə keçirdiyi görüşdə E.Qasımzadə Bakının tarixi mərkəzinin sərhədlərinin müəyyənləşdirilməsi ilə bağlı təklif irəli sürmüşdü.
Bakının tarixi sərhədlərinin müəyyən edilməsi ilə bağlı layihə Milli Məclisdə nə zaman müzakirəyə çıxarılacaq?
Fəzail İbrahimli: “Hələlik Bakının tarixi mərkəzinin sərhədlərinin müəyyənləşdirilməsi ilə bağlı hazırlanan layihə haqqında məlumatsız olduğum üçün, o barədə heç nə deyə bilmərəm”
Millət vəkili, tarixçi-alim, professor Fəzail İbrahimli “Bakı-Xəbər”ə bildirdi ki, hələ sözügedən layihə Milli Məclisə təqdim edilməyib. “Bu qanun layihəsi haqqında hələlik heç nə deyə bilmərəm. Həmin qanun layihəsi Milli Məclisdə bizə təqdim edildikdən və onunla tanış olduqdan sonra fikir bildirə bilərəm. Hələlik Bakının tarixi mərkəzinin sərhədlərinin müəyyənləşdirilməsi ilə bağlı hazırlanan layihə haqqında məlumatsız olduğum üçün, o barədə heç nə deyə bilmərəm” - deyə millət vəkili qeyd etdi.
Sənan Salamzadə: “... burada birmənalı fikir yürütmək çətindir”
Memar Sənan Salamzadənin sözlərinə görə isə layihənin detallarının açıqlanmaması onun bu barədə hər hansı bir fikir söyləməsinə imkan vermir. Bununla belə, Bakının tarixi mərkəzinin sərhədlərinin müəyyən edilməsinin olduqca vacib olduğunu deyən S.Salamzadənin bildirdiyinə görə, bu həm tarixi və memarlıq abidələrinin qorunmasına, həm də şəhərimizə gələn turistlərin tarixi məkanla tanış olmasına geniş şərait yaradacaq. “Bakının tarixi sərhədindən danışarkən burada birmənalı fikir yürütmək çətindir. Buna zamana görə baxmaq lazımdır. Zaman dəyişdikcə, sərhədlər də dəyişir. Hər dövrdə Bakının öz tarixi sərhədi olub, ona görə də onu müəyyənləşdirmək bir qədər çətin görünür. Vaxt olub ki, İçərişəhər olub, sonra Bakıxanov küçəsi olub, sonra mikrorayonlar tikilib və paytaxtın sərhədləri böyüyüb. Dəqiq demək olmaz ki, Bakının tarixi sərhədi filan yerdir. Çünki Bakı həm köhnə sərhədin üstündə tikilib, həm də bayır şəhərin. Mən o layihə ilə tanış olmadığım üçün orada sərhədin necə göstərildiyini deyə bilmirəm. İndi yəqin ki, həmin layihədə bunu müəyyən etmək mümkün olub”.
S.Salamzadənin fikrincə, qanun layihəsi Milli Məclisdə müzakirəyə çıxarıldıqdan sonra onun detalları məlum olar və mütəxəssislər də bu barədə fikir bildirər.
İradə SARIYEVA
