Prezident İlham Əliyevin sosial islahatlar paketinin yeni uğurlu nəticələri, sosial müdafiə sahəsində atılan mühüm addımlar müəlllimləri də əhatə edir. Belə ki, ölkə başçısının yeni sərəncamı 160 minə yaxın müəllimə şamil olunacaq.
Məsələ ondadır ki, “Dövlət ümumi təhsil müəssisələrində çalışan, bilik və bacarıqlarının diaqnostik qiymətləndirilməsi aparılan müəllimlərin əməkhaqqının artırılması haqqında” Sərəncama əsasən, həmin müəllimlərin aylıq vəzifə maaşları 2019-cu il sentyabrın 1-dən orta hesabla 20 faiz artırılacaq. Sözügedən sərəncam, ümumilikdə, 160 minə yaxın müəllimi əhatə edir və onların orta aylıq əməkhaqqının 605 manata çatmasına imkan verir.
Bu artımın təmin edilməsi üçün dövlət büdcəsindən əlavə olaraq illik 240 milyon manat, cari il (sentyabr-dekabr ayları) üzrə isə 73 milyon manat vəsait ayrılacaq.
Sözügedən sərəncam, ümumən, ölkəmizdə əhalinin həyat səviyyəsinin yaxşılaşdırılması tədbirlərinin getdikcə geniş vüsət aldığını, dövlət başçısının siyasətinə uyğun olaraq, dinamik iqtisadi inkişafın ilk növbədə vətəndaş rifahının təminatı hədəfinə yönəldildiyini bir daha təsdiq edir.
Qeyd olunduğu kimi, bu sərəncam, ümumilikdə, 160 minə yaxın müəllimi əhatə edir və onların orta aylıq əməkhaqqının 605 manata çatmasına imkan verir. Müəllim üçün 605 manat əməkhaqqı nə deməkdir?
Məhərrəm Zülfüqarlı: “Müəllimlər məktəblərdə tədrisin keyfiyyətini, səviyyəsini artırmaq üçün səylərini daha da artıracaqlar”
Məsələyə münasibət bildirən təhsil sahəsi üzrə ekspert Məhərrəm Zülfüqarlının sözlərinə görə, ümumi təhsil müəssisələrində çalışan müəllimlərin əməkhaqqının orta hesabla 605 manata çatdırılması müsbət göstəricidir: “Müəllimlərlə bağlı belə bir sərəncamın imzalanması müsbət haldır. Ölkədə milli təhsilin inkişafı üçün müəllimlərin məvaciblərinin artırılması böyük nəticədir. Nəzərə almaq lazımdır ki, təhsil orta məktəbdən başlayır. Ona görə də diaqnostik qiymətləndirmədən keçən müəllimlərin əməkhaqqının artırılması müsbət qərardır. Bu ona gətirib çıxaracaq ki, orta ümumtəhsil məktəblərində çalışan müəllimlər daha həvəslə çalışacaqlar. Müəllimlər məktəblərdə tədrisin keyfiyyətini, səviyyəsini artırmaq üçün səylərini daha da artıracaqlar. Nəzərə almaq lazımdır ki, əvvəllər məvaciblər aşağı olduğu üçün müəllimlər repetitor fəaliyyəti ilə məşğul olurdular. Bu onları həm fiziki baxımdan yorurdu, həm də ümumən tədrisin keyfiyyətinə mənfi təsir edirdi. Məvaciblər yüksəldikcə, məktəblərdə tədrisin keyfiyyəti artacaq və repetitor fəaliyyətinə o qədər də böyük ehtiyac yaranmayacaq. O baxımdan 160 minə yaxın müəllimin əməkhaqqının 20 faiz artırılmasını müsbət dəyərləndirirəm. Bütün bunlarla yanaşı, yaxşı olardı ki, ali məktəblərdə dərs deyən müəllimlərin də məvacibləri artırılsın. Elmi dərəcəyə görə olan ödənişlər də artırılsın”.
Vidadi ORDAHALLI
