Ümumi təhsilin keyfiyyətini yüksəltmək üçün orta məktəblərdə təmayül sinifləri yaradılıb. Təmayül siniflərini bitirən məzunlar ali məktəblərə qəbulda daha yüksək nəticələr nümayiş etdirirlər. Bunu "Azərbaycan" qəzetində dərc olunan məqaləsində təhsil naziri Ceyhun Bayramov deyib.
O qeyd edib ki, ümumi təhsilin keyfiyyətini yüksəltmək, şagirdlərə seçdikləri ixtisas istiqamətləri üzrə daha yüksək kompetensiyalara yiyələnmək imkanı yaratmaq məqsədilə tam orta təhsil səviyyəsində təmayülləşmənin əhatə dairəsi genişləndirilib, 2140 sinifdə 47930 şagird təmayüllər üzrə təhsilə cəlb edilib ki, bu da X-XI siniflərdə təhsil alan şagirdlərin təxminən 30 faizini təşkil edib: “Təmayül siniflər üçün tədris planları, proqramları hazırlanıb və tətbiq edilib. İlkin təhlillər göstərir ki, təmayül siniflərini bitirən məzunlar ali məktəblərə qəbulda daha yüksək nəticələr nümayiş etdirir və akademik nailiyyətləri ilə fərqlənirlər. Hər bir şagirdə təmayül istiqamətinə uyğun peşəkar bacarıqların aşılanması məqsədilə "Ümumi təhsil haqqında” Qanunda təmayül siniflərində şagird sayı əvvəlki 20 nəfərdən 15 nəfərə endirilib. Qarşıda ölkə üzrə təmayülləşmənin tətbiqi vəziyyətinin təhlili, əhatə dairəsinin daha da genişləndirilməsi, təmayül sinifləri üçün yeni proqram və dərsliklərin hazırlanması, peşəkar və səriştəli müəllimlərin cəlb edilməsi ilə bağlı tədbirlərin həyata keçirilməsi vəzifəsi dayanıb”.
Təmayül tipli sinif və məktəblərdə təhsil alan şagirdlərin yüksək nəticə göstərərək ali məktəbə qəbul olunmasını ekspertlər də təsdiqləyirlər.
Kamran Əsədov: “Təmayül siniflərinin yaradılması şagirdlərin dərsə davamiyyətinə də müsbət təsir edir”
Təhsil eksperti Kamran Əsədov “Bakı-Xəbər”ə açıqlamasında qeyd etdi ki, bu gün təmayül tipli sinifləri bitirənlər daha yüksək nəticə ilə ali məktəbə qəbul olunur. Bu danılmaz faktdır: “Təhsil haqqında” Qanuna edilən əlavə və dəyişikliklərdən sonra ali təhsil müəssisələrinə hazırlaşan abituriyentlərə kömək məqsədilə 4 istiqamət üzrə təmayül sinifləri yaradılıb. Belə ki, təbiət, humanitar, texniki və riyaziyyat fənləri üzrə təmayül sinifləri yaradıldı. Təmayül siniflərinin yaradılması olduqca müsbət haldır. Məsələn, humanitar sahəyə hazırlaşan məktəbli yalnız öz ixtisası üzrə fənlər oxuyur. Nəticədə həmin abituriyentin qəbul imtahanında göstərdiyi nəticə yüksək olur”.
Həmsöhbətimiz onu da vurğuladı ki, təmayül siniflərinin yaradılması şagirdlərin dərsə davamiyyətinə də müsbət təsir edir: “Danılmaz faktdır ki, riyaziyyat təmayülündə təhsil alanlar digər fənlər üzrə keçirilən dərslərdə iştirak etməkdən yayınırdılar. Təbii ki, bu hal onların davamiyyətinə təsir edirdi. Ancaq gün ərzində onların özünə lazım olan fənlər tədris olunduğu üçün, məktəblilər aktiv şəkildə dərsdə iştirak edirlər”.
Günel CƏLİLOVA
