“Gözəllik qurban tələb edir” düşüncəsi ilə bəzi qadınlar öz həyatlarını görünüş xatirinə risqə atırlar. Söhbət bəzən estetik əməliyyatların ölümlə nəticələnməsindən gedir.
Artıq çəki problemi yaşayan xanımlar bəzən bu məsələni əməliyyat yolu ilə həll etməyə çalışırlar. Hazırda bir çox gənc qız və qadınların üz tutduğu qarın piylərinin liposaksiyası əməliyyatı ölüm təhlükəsi yüksək olan əməliyyatlardandır.
Əgər əvvəllər şou-biznes nümayəndələri, sənətçilər estetik əməliyyatlara müraciət edirdilərsə, hazırda sadə insanlar, hətta az imkanlı şəxslər də buna maraq göstərir. İnsanlar keçirəcəyi estetik əməliyyatların onlara həyatı bahasına başa gələcəyini, ölüm risqini bilə-bilə, yenə də bu addımı atırlar. Heç də gizlin deyil ki, estetik cərrahiyyə inanılmaz dərəcədə inkişaf etsə belə, hər zaman təhlükəlidir. Çünki mütəxəssislər dəfələrlə bildirirlər ki, istənilən cərrahiyyə əməliyyatının ölüm risqi var. Belə ki, xəstədə hər hansı sistematik problem yoxdursa, ölüm risqi 10 min nəfərdən birində və ya ikisində özünü göstərə bilər. Xəstənin qan, ürək, diabet, revmatizm, damar kimi xəstəlikləri və ya uşaqlıqdan gələn bir anormallığı varsa, bu da təhlükə yarada bilər.
Məlumat üçün bildirək ki, dünyada ən çox müraciət edilən plastik əməliyyat “ritidektomiya”, sifət və boyun dərisinin dartılması əməliyyatıdır. Bu əməliyyat növü ötən əsrin əvvəllərində Avropada yaranıb, lakin uzun müddət gizlin saxlanıb.
“Liposaksiya” - bel, yan, qarın, əl, boyun və digər hissələrdəki artıq piylər üçün nəzərdə tutulan əməliyyat növü də dünyada geniş yayılmağa başlayıb. Bu əməliyyat ilk dəfə 20 il əvvəl Fransada yaranıb.
Araşdırmalar zamanı məlum olub ki, ölkəmizdə ən çox müraciət edilən plastik əməliyyat “rinoplastik” burun əməliyyatıdır. Bununla yanaşı, son zamanlar “liposaksiya” əməliyyatı da geniş yayılıb.
Estetik əməliyyatlarla arıqlamaq, istədiyi bədən formasına sahib olmaq istəyi insanlar arasında geniş yayılıb. Bu üsulla qısa müddətdə qalıcı nəticə əldə etmək mümkün olduğu üçün, xüsusən qadınlar piylərini liposaksiya metodu, piy sovurma ilə kənarlaşdırmağa üstünlük verirlər.
Ancaq son vaxtlar təhlükəsiz kimi bilinən, təqdim olunan liposaksiya proseduru bir çoxlarının həyatına son verib. Təkcə Azərbaycanda hələ mətbuata məlum faktlar il ərzində 4-5 nəfəri keçir.
Həkimlər bu əməliyyatın xəstənin həyatı üçün təhlükəsiz olduğunu bildirsələr də, fakt faktlığında qalır.
Bir neçə həftə öncə "Baku Medical Plaza”da liposaksiya əməliyyatı keçirən, özü də həkim-ginekoloq olan Sona Gürgün Vəliyeva gözəlliyin qurbanı oldu. Növbəti xoşagəlməz hadisə Avrasiya Hospitalında baş verib. Azərbaycan Dövlət Tibb Universitetinin müəllimi, pediatr Sədaqət Şahsuvarova liposaksiya əməliyyatından 4 gün sonra həyatını itirib. Onun əməliyyatı plastik cərrah Vüqar Ələkbərov tərəfindən həyata keçirilib. Cərrah açıqlamasında pasiyentin ölümündə günahkar olmadığını bildirib.
Bəxtiyar Qəhrəmanov: “… bu problemlər köhnə model aparatlarla edilən əməliyyatlarda müşahidə edilir”
Son zamanlar liposaksiya əməliyyatının qurbanlarının sayının nə səbəbdən artdığını öyrənmək məqsədilə plastik-estetik cərrah Bəxtiyar Qəhrəmanova müraciət etdik. Cərrah qeyd etdi ki, liposaksiya əməliyyatının həyata keçirildiyi cihazlar son illər çox təkmilləşib və uğurun yarısı da bu cihazlardan asılıdır: “Bu cihaz dəri altındakı piy toxumasını əridib, maye halına salaraq sovurub çıxarır. Həmin piy kütləsi yenidən işlənərək, bədənin müəyyən nahiyələrinə yeridilərək şəkilləndirilir.
Prosedur zamanı yaranan piy və ağciyər emboliyası xəstənin həyatına son qoya bilər. Əslində, sadalanan bu problemlər köhnə model aparatlarla edilən əməliyyatlarda müşahidə edilir. Bu zaman aparat piy toxumasını zədələyir, qan dövranını pozur, piy parçası qan damarlarına düşərək tənəffüs yollarını tutur, xəstənin vəfat etməsinə gətirib çıxarır.
Lakin son model liposaksiya aparatları təhlükəsiz hesab edilir. Çünki bu aparatlar sensorlarla təchiz olunub. Əməliyyat zamanı aparatın ucu yalnız piy toxumasına toxunduqda işləyir. Damar, əzələ, sümük və digər toxumaya çatdıqda aparat sönür, yəni fəaliyyətini dayandırır. Bu isə əməliyyat zamanı yaranan bütün risqləri aradan qaldırır, həkimin səhv etməsinin də qarşısını alır. Son model liposaksiya aparatı ilə edilən əməliyyat zamanı ölüm risqi demək olar ki, sıfıra enir.
Məlumat üçün bildirim ki, xəstənin həyatı üçün təhükəsiz olan son nəsil liposaksiya aparatları Bakı şəhərində cəmi iki klinikada mövcuddur, eləcə də mən bu aparatla əməliyyat edirəm. Ola bilər, bir çox həkim xəstələri inandırmaq üçün qeyd etsin ki, son model məndədir. Amma yoxlamaq, dəqiqləşdirmək lazımdır.
Bu aparatla piylər çıxarılan nahiyədə dəri sallanmaları da müşahidə edilmir. Əməliyyat zamanı əridilərək toplanan piy yenidən işlənələrək, hazır hala gətirilib pasiyentin istəyinə uyğun olaraq bədəninin müxtəlif nahiyələrinə yeridilir.
Bədən şəkilləndirmə zamanı ən çox qarın, qol və bud nahiyəsindən alınan piy sağrı, süd vəzi, hətta dodaq kimi hissələrə əlavə edilir. Beləliklə də pasiyentin öz piylərindən ona yeni forma verilir.
Prosedurdan sonra əməliyyat olunan pasiyent istədiyi bədən quruluşuna qovuşmaq üçün bir sıra korreksiyalar da etdirməlidir. Yalnız bundan sonra əldə edilən bədən forması bütün ömür boyu şəklini qoruyur".
B.Qəhrəmanov onu da vurğuladı ki, liposaksiya üçün hər hansı qadağa yoxdur. Yaş məhdudiyyəti qoyulmayıb, xəstəliklər də əks göstəriş deyil. Hətta şəkər xəstələrinə də olar. Bir sözlə, kimin ehtiyacı varsa, bu əməliyyatdan keçə bilər.
Adil Qeybulla: “Bu cür ciddi əməliyyatı qeyri-peşəkar həkimə etibar etmək olmaz”
Professor, tibbi ekspert Adil Qeybulla qeyd etdi ki, liposaksiya həyata keçirən həkim bu sahənin mütəxəssisi olmalıdır: “Bu cür ciddi əməliyyatı qeyri-peşəkar həkimə etibar etmək olmaz. Əməliyyat sırasında ölüm risqi bu proses üçün xarakterikdir. Liposaksiya əməliyyatında qorxulu məqamlardan biri tromb-embaliya risqidir. Bir də bəzən götürülən piyin miqdarı bədən çəkisi ilə uyğun gəlmir. Bu halda da əməliyyat ciddi fəsadla nəticələnə bilər. Əməliyyatdan əvvəl həmin şəxs həkim tərəfindən müayinə edilməlidir. Bədəndə hemoqlabinin və qanın səviyyəsi aşağıdırsa, həmçinin, qanda laxtalanma yüksəkdirsə, liposaksiya əməliyyatı həyata keçirmək olmaz”.
Günel CƏLİLOVA
