“Çıxış yolu reydlərdən və videomüşahidə kameralarının quraşdırılmasından keçir”
Axşam saatlarında Sabunçu, Zabrat, Maştağa, bu istiqamətdə olan digər kənd və qəsəbələr istiqamətində nəqliyyatın hərəkətində tıxaclar müşahidə edilir. Məsələ ondadır ki, Zabrat şosesinin Heydər Əliyev prospekti ilə kəsişən hissəsində (Sabunçu yol qovşağı) yerüstü piyada keçidi yaradılsa da, keçidin yaxınlığında yerləşən dayanacaq məntəqəsinin yeri qabağa çəkilsə də, axşam saatlarında tıxac yaranır.
Əvvəl tıxacın yaranmasına səbəb Sabunçu yol qovşağında piyada keçidin olmaması idi. Düz bir il əvvəl süzügedən ərazidə yerüstü piyada keçid istifadəyə verildi. O zaman həmin yoldan istifadə edən sürücü və sərnişinlər sevindilər ki, daha pik saatlarda ərazidə tıxac olmayacaq.
Ancaq sözügedən keçid qismən tıxacın azalmasına səbəb oldu. Çünki Sabunçu-Zabrat yolunun xüsusilə yolüstü piyada keçidinin yerləşdiyi hissəsində taksilərin avtobus dayanacaqlarında saxlaması, avtobusların isə yolun ikinci və üçüncü zolaqlarında saxlaması pik saatlarında tıxacların yaranmasına səbəb olur. Məlum oldu ki, tıxacın yaranma səbəbi dayanacağın yerüstü piyada keçidinə yaxın olması ilə bağlıdır. Belə ki, avtobus və taksilərin dayanacağa yanaşması yoldakı nəqliyyat vasitələrinin hərəkət intensivliyini aşağı salırdı. Bu səbəbdən dayanacaq piyada keçidindən təxminən 300 metr uzaqlaşdırıldı. Sabunçu bazarı istiqamətində hərəkət edən avtomobillər dayanacağa çatmadan rahat sağa dönürlər. Bütün bunlar həqiqətən də bir müddət yaranan tıxacın aradan qalxmasına səbəb oldu. Ancaq son aylar yenə də həmin istiqamətdə, xüsusən axşama doğru olan vaxtlarda tıxac yaranır. Bunun səbəbi onunla bağlıdır ki, taksi fəaliyyəti ilə məşğul olan şəxslər dayanacağa yaxın yolboyu avtomobillərini saxlayırlar. Bir sıra hallarda avtobusların saxlama yerlərində taksini saxlayırlar. Nəticədə avtobus sürücüləri məcbur olur yolun ikinci zolağında maşını saxlasınlar. Bu da axşam saatlarında ciddi tıxacın yaranmasına səbəb olur. Onu da qeyd edək ki, bağ mövsümü ilə əlaqədar həmin istiqamətdə avtomobillərin sayı xeyli artıb. Xüsusən cümə günü bu özünü daha qabarıq göstərir.
Məsələ ilə əlaqədar Bakı Nəqliyyat Agentliyi ilə əlaqə saxlamağa çalışsaq da, bu alınmadı.
- Azər Allahverənov: “… o zaman Sabunçu yol qovşağında tıxac problemi öz həllini tapacaq”
Nəqliyyat sahəsi üzrə ekspert Azər Allahverənov “Bakı-Xəbər”ə açıqlamasında çıxış yolunun yol qovşağına nəzarətin artırılmasından keçdiyini bildirdi: “Əvvəllər orada Yol Patrul Xidmətinin əməkdaşları tez-tez reydlər keçirirdilər. İnsafən, bu reydlər tıxacların qarşısını alırdı. Hesab edirəm ki, günün pik saatlarında sözügedən reydlər yenidən bərpa edilməlidir. Digər tərəfdən, avtobus rəhbərliyi buna görə məsuliyyət daşımalıdır. Çünki bir sıra hallarda avtobus sürücülərinin özü qaydaları pozurlar. Ona görə də avtobuslar üzərində nəzarət çox sərt şəkildə qoyulmalıdır. Başqa bir tərəfdən, avtobusun dayanacaqdan kənarda saxlanma səbəbləri araşdırılmalıdır. Taksi avtobusun yerini zəbt edibsə, o zaman taksi sürücüləri cərimələnməlidirlər. Ona görə də, birincisi, DYP həmin ərazidə reydləri gücləndirməlidir. İkincisi, Baki Nəqliyyat Agentliyi həmin ərazidə videomüşahidə kameraları quraşdırmalıdır. Bu zaman çox rahat şəkildə qayda pozuntularını aşkarlamaq olar. Ondan sonra qaydanı pozanları cərimələmək və onlara elektron protokollar göndərmək lazımdır. İnanın, taksi və avtobus sürücüləri biləndə ki, videomüşahidə kameraları var və buna görə cərimələnəcəklər, o zaman qaydanı pozmazlar. O üzdən, çıxış yolu reydlərdən və videomüşahidə kameralarının quraşdırılmasından keçir. Belə olarsa, o zaman Sabunçu yol qovşağında tıxac problem öz həllini tapacaq”.
Vidadi ORDAHALLI
