27/06/2019 17:12
728 x 90

Azərbaycan Prezidenti görməsi məhdud insanları da unutmadı

“Yeni yaşayış binasında təxminən 300 nəfər mənzillə təmin olunacaq”

img

Dinamik iqtisadi tərəqqi dövrünü yaşayan ölkəmizdə sosial cəhətdən həssas əhali qruplarına xüsusi qayğı göstərilir. Əlilliyi olan şəxslərin, o cümlədən, gözdən əlillərin də sosial müdafiəsinin gücləndirilməsinə şərait yaradılır. Azərbaycanda gözdən əlilliyi olan şəxslərin sosial müdafiəsinin gücləndirilməsi sahəsində aparılan işlərin bir istiqaməti də onların mənzil-məişət şəraitinin yaxşılaşdırılmasına yönəlib.

Prezident İlham Əliyevin 11 iyun 2019-cu il tarixli Sərəncamı həmin kateqoriyadan olan vətəndaşların mənzillə təminatına xüsusi qayğının növbəti göstəricisi olmaqla, bu istiqamətdə növbəti addımın atılmasına imkan verib.

Əmək və Əhalinin Sosial Müdafiəsi Nazirliyinin yaydığı məlumatda qeyd olunur ki, sərəncam Bakı şəhərində gözdən əlilliyi olan şəxslər üçün inşa ediləcək çoxmənzilli binanın layihə-smeta sənədlərinin hazırlanması məqsədilə 300 min manat vəsait ayrılmasını nəzərdə tutur. Cari ildə müvafiq layihə-smeta sənədlərinin hazırlanması işləri aparılmaqla, paytaxtda gözdən əlilliyi olan şəxslər üçün daha bir çoxmənzilli yaşayış binasının tikintisinə başlanacaq.

Binada mənzillə təmin ediləcək gözdən əlilliyi olan şəxslərin rahatlığı üçün xüsusi layihə əsasında məişət şəraiti yaradılacaq. Onların əl və ayaqla hiss etmələrinin asanlaşdırılması məqsədilə müvafiq yerlərdə xüsusi tikinti materiallarından və işarələrdən istifadə olunacaq. Binanın tikintisinin gələn il ərzində yekunlaşdırılaraq istifadəyə verilməsi planlaşdırılır.

Məlumat üçün bildirək ki, bu təbəqədən olan şəxslərin mənzillə təminatı proqramının davamı olaraq, son illərdə gözdən əlilliyi olan şəxslər üçün Bakının Nərimanov rayonunda 132 mənzildən ibarət yaşayış binası tikilərək istifadəyə verilib.

Maraqlıdır, yeni tikiləcək yaşayış binasında gözdən əlilliyi olan neçə şəxs mənzillə təmin olunacaq? Ümumiyyətlə, Gözdən Əlillər Cəmiyyətində mənzil növbəsində olan neçə şəxs var?

  • Səmyar Abdullayev: “Təxminən 600 gözdən əlil sosial şəraitinin yaxşılaşdırılması üçün mənzil növbəsindədir”

Bu kimi suallara aydınlıq gətirmək üçün Azərbaycan Gözdən Əlillər Cəmiyyəti İctimai Birliyinə müraciət etdik. Birliyin sədri Səmyar Abdullayev “Bakı-Xəbər”ə açıqlamasında qeyd etdi ki, gözdən əlil vətəndaşların mənzil şəraitinin yaxşılaşdırılması ilə bağlı Prezident İlham Əliyevin sərəncamına əsasən yaşayış binasının tikilməsi bu qəbildən olan insanların sevincinə səbəb olub.

Onun sözlərinə görə, bu gün Bakı şəhərində 600-ə yaxın gözdən əlil mənzil növbəsindədir. 2015-ci ildə gözdən əlillərin sosial müdafiəsinin gücləndirilməsi məqsədilə 132 mənzil onların istifadəsinə verildi. Yeni binanın inşa olunması üçün bu sahəyə vəsait ayrılıb: “Məlumat üçün bildirim ki, bu il yeni binanın layihəsi hazırlanıb, gələn il isə tikintiyə başlanacaq. Yeni yaşayış binasında təxminən 300 nəfər mənzillə təmin olunacaq”.

Həmsöhbətimiz hesab edir ki, gözdən əlillərin sosial müdafiəsinin gücləndirilməsi üçün tikiləcək bina 3 il ərzində hazır olacaq. Bina hazır olandan sonra 300-ə yaxın gözdən əlil yeni mənzillə təmin olunacaq.  

Günel CƏLİLOVA

Son xəbərlər