17/06/2019 03:29
728 x 90

Yaş salfetkaların uşaqlar üçün fəsadları var imiş…

“Körpələrin dəri bişməcəsindən əziyyət çəkməsinin ilkin səbəbi də elə bu nəm salfetlərdir”

img

Yaşından asılı olmayaraq, bütün insanlar üçün salfetlər önəmlidir. Gündəlik yaşam zamanı insanı bir çox narahat vəziyyətlərdən çıxaran salfetlər, demək olar ki, hər kəsin çantasında mövcuddur.

Müxtəlif formalı, qoxulu, dizaynlı olan bu salfetlərə tələbat o qədər artıb ki, istehsalçı firmalar bunu növlərə ayırmağa başlayır: körpə salfeti, yeniyetmə salfeti, gündəlik alkoqollu salfet, alkoqolsuz salfet, qoxulu, sərinləşdirici, əsəb sakitləşdirici və s. Təmizlik, xüsusən mikroblardan qorunmaq üçün istifadəsinin vacibliyini qeyd edən firmalar bu salfetlərin heç bir əks təsirindən söz açmırlar. Halbuki, böyüklərə belə təhlükəli olan bu salfetlərin uşaqlar üçün istehsal olunub satışa buraxılması heç də düzgün deyil.

Həkimlər bildirirlər ki, yaş salfetlər dəri üçün ziyanlıdır, xüsusilə də uşaqların yaş salfetlərdən istifadə etməsi onların sağlamlığına mənfi təsir edir. 

  • Nərmin Əliyeva: “Körpələrin təmizliyində nəm salfetlərdən istifadə edilməməlidir”

Dermatoloq Nərmin Əliyeva bildirdi ki, üzdə dəri problemlərindən əziyyət çəkən gənc xanımların 90%-i nəm salfetlə makiyaj təmizləyir. Körpələrin dəri bişməcəsindən əziyyət çəkməsinin ilkin səbəbi də elə bu nəm salfetlərdir: “Hətta valideynin bu salfetlərlə əllərini silib körpəsinə toxunması belə körpə sağlamlığı üçün təhlükəlidir. İstər böyüklər, istərsə də uşaqlar üçün istehsal olunan nəm salfetlər olduqca çoxlu kimyəvi maddə saxlayırlar. Kim desə ki, uşaq salfetləri belə deyil, əmin olun, yalandır. Əvvəla sağlamlıq üçün zidd olmayan əşyaların tərkibi kimyəvi maddələrlə zəngin olmamalıdır. Salfetlər isə belə deyil. Nəm salfeti sıxdıqda yuyucu tozlu su damcıları çıxır. Eləcə də kasaya su doldurub nəm salfeti içərisində fırladın. Kasadakı su köpüklənəcək. Körpələrin geyimləri, yataq dəstləri dəfələlə durulanır ki, yuyucu maddə qalıb allergik reaksiya verməsin. Digər tərəfdən, ana tərkibi yuyucu maddə ilə dolu olan salfeti körpəsi üçün istifadə edir. Bu cür ziddiyyət körpəni qoruya-qoruya təhlükəyə atmaq deməkdir".

Həmsöhbətimiz onu da vurğuladı ki, körpələrin təmizliyində nəm salfetlərdən istifadə edilməməlidir. Su və sabunla yuyulmalı olan bədənə bu cür kimyəvi maddələrlə zəngin olan salfetlər vurulmamalıdır. Bu salfetlər uşaqları öldürməz, amma sağlamlığına ciddi təsir göstərər: "Körpə dərisi çox həssasdır. Buna görə də yumaq əvəzinə, nəm salfetlər qətiyyən istifadə olunmamalıdır. Körpə üçün 1 qram kimyəvi maddə belə təhlükəlidir. Uşaqların təmizliyi üçün yaş salfetlər əvəzinə, islanmış pambıqdan istifadə edilməlidir”.

Günel CƏLİLOVA

Son xəbərlər