Çimərlik mövsümünün başlamasına sayılı günlər qalıb. Həmişə olduğu kimi, bu il də istirahətini şəhərdən kənarda keçirə bilməyənlər çimərliklərə üz tuturlar. Amma bu o demək deyil ki, paytaxt və ətraf ərazilərdə yerləşən çimərliklərdə istirahət ucuz başa gəlir.
Əslində, həftədə 1-2 dəfə çimərliyə üz tutmaq istəyənlərin xərclədiyi məbləğ hər hansı istirahət mərkəzində ödədiyi pulla eynilik təşkil edir. Belə ki, çimərliklərə giriş 1 manatdan 20 manatadək dəyişir. Dənizə girişin pullu olmasından başqa, burada əylənmək və dincəlmək istəyənlər digər xidmətlərə görə də pul ödəməlidirlər.
Təbii ki, özəl çimərliyə daxil olmaq üçün müəyyən məbləğdə vəsait xərcləməlisən. Nəzərə almaq lazımdır ki, hər kəs özəl çimərlikdə istirahət edə bilmir. Bu səbəbdən də ölkədə özəl çimərliklə yanaşı, ictimai çimərliyin yaradılması təklif olunur. Belə bir təklif Azərbaycan Dövlət Turizm Agentliyinin sədri Fuad Nağıyev tərəfindən səsləndirilib. O bildirib ki, bu olduqca vacib məsələdir: “Ölkədə özəl çimərliklər olsa da, onların sayının az olması narahatedicidir. Dünyada çimərliklərin, demək olar ki, hamısı ictimaidir. Hansısa qurumlar orada öz xidmətlərini təklif edə bilərlər”.
Qeyd edək ki, “Azərbaycan Respublikasında çimərlik turizminin inkişafına dair 2017-2020-ci illər üçün Tədbirlər Planı”nın icrasının müzakirə edilməsi məqsədilə mədəniyyət və turizm naziri Əbülfəs Qarayevin sədrliyi və aidiyyəti qurumların nümayəndələrinin iştirakı ilə görüş keçirilmişdi. Həmin görüşdə nazir bildirmişdi ki, Tədbirlər Planının icrası çərçivəsində cari ildə çimərlik mövsümünün açılışına qədər Bakıda 6 özəl, 6 ictimai, Xaçmazda 2 özəl, 2 ictimai, Lənkəranda 2 özəl, 1 ictimai, Astarada 1 özəl, 1 ictimai çimərliklərin yaradılması planlaşdırılır. Ancaq hələ ki, bu sahədə hər hansı bir irəliləyiş yoxdur.
Elçin Rüstəmov: “İctimai çimərliklərin sayının çox olması turist sayının artmasına təsir edən amillərdən biridir”
Özəl çimərliklərin yaradılmasının vacibliyi barədə fikir bildirən turizm sahəsi üzrə ekspert Elçin Rüstəmov bizimlə söhbətində qeyd etdi ki, ölkədə ictimai çimərliklər təşkil olunmalıdır: “Çimərlik turizmi inkişaf etməlidir. Bu sahəyə xüsusi diqqət ayrılmalıdır. Məlumdur ki, son illər ölkəyə gələn turistlərin sayı günü-gündən artır. Turistlərin bir qismi çimərlik turizminə üstünlük verir.
Azərbaycanda çimərlik mövsümü qısamüddətli davam edir. Hesab edirəm ki, ictimai çimərliklərin yaranması turizm sektoruna xeyli müsbət təsir göstərəcək”.
E.Rüstəmov bildirdi ki, xarici ölkələrdə özəl çimərliklərlə yanaşı, ictimai çimərliklər də fəaliyyət göstərir. İctimai çimərliklərin sayının çox olması turist sayının artmasına təsir edən amillərdən biridir.
Günel CƏLİLOVA
