Son vaxtlar xeyriyyə məqsədilə tədbirlərin keçirilməsi adı ilə insanların aldadılması prosesinə tez-tez rast gəlinir. Bakıda növbəti belə addım “Cəlil MMC” adı ilə atılıb. Qəzetimizə müracət edən jurnalist Yasəmən Möhübbətqızı həmin MMC-nin əməlindən zərər çəkdiyini bildirir.
Şikayətçinin sözlərinə görə, guya xəstə bir uşağa yardım kampaniyası adı ilə şənliyin keçirələcəyi, bilet alan uşaqlara xüsusi hədiyyələrin veriləcəyi vəd edilirdi: “Bütün bu işlər “Cəlil MMC” adlı qurumun adı ilə görülürdü. Hətta biletlərin üzərində həmin MMC-nin möhürü də var. Ancaq “layihəyə” rəhbərlik edən şəxsin adı Çimnaz olub. Biz bütün danışıqları onunla aparmışıq. Sonra Çimnaz bizə dedi ki, gedin MMC-nin rəhbəri Tahirə xanımla əlaqə saxlayın. Biz araşdırdıqda məlum oldu ki, sözügedən MMC-nin rəhbəri doğrudan da Tahirə adlı xanımdır. Ancaq onunla əlaqə saxlamaq qeyri-mümkündür. Şəxsən mən Çimnazdan 60 bilet götürdüm ki, xəstə uşaq kampaniyasına yardım edim. Hər biletə 8 manat ödəmişik. Qızımın köməkliyi ilə həmin biletləri satdırdıq. Xeyriyyə konsertinin metronun “Xalqlar dostluğu” stansiyasına yaxın ərazidə yerləşən “Sərhədçi” idman kompleksində baş tutacağı gözlənilirdi. Nəzərdə tutulan saatda bizə zənglər gəlməyə başladı ki, burada heç bir konsert yoxdur. Mən hadisə yerinə getdim. Gördüm ki, dələduzluq faktı ilə üz-üzəyik. Sonra məlum oldu ki, mənimlə yanaşı, bir çox məktəb direktoru, valideynlər də bu şəbəkənin fırıldağının qurbanı olub. Mən məcbur qalıb bir qrup valideynin pulunu cibimdən ödədim. Çimnazdan cəmi 50 manat ala bildim. Deyir ki, qoy gedib hara istəyirlər müraciət etsinlər, heç nə edə bilməzlər. İndi də bizim zənglərimizə cavab vermirlər. Çox xahiş edirəm, məsələni ictimailəşdirin ki, zərərçəkənlər onlardan pullarını ala bilsinlər”.
Biz Yasəmən xanımın təqdim etdiyi telefon nömrələri ilə əlaqə saxladıq. MMC-nin direktoru kimi adı qeyd edilən Tahirə adlı xanımın telefonuna gün ərzində zəng çatmadı. Çox güman ki, şikayətçilərdən gizlənmək üçün köhnə nömrəsindən imtina edib. Layihəyə rəhbərlik edən Çimnaz adlı xanım isə zəngimizə cavab verdi. Sualı eşidən kimi dedi ki, nə marağınız var bunu yazmaqda: “İndi rayonda yas yerindəyəm, səhər gəlim görüşək, məsələni aydınlaşdıraq”. Biz aydınlaşdırmanı telefonla apardığımız üçün, xanıma bir neçə sualımıza cavab verməyi xahiş etdik. Çimnaz xanım əvvəl şikayətin kim tərəfindən edildiyini soruşdu. Bunu biləndən sonra qeyri-rabitəli fikirlər sələndirməyə başladı: “Deyəsən onlar başlarına problem açmaq istəyirlər. “Cəlil” MMC bəyəm bilet satır? Yalandır”.
Biz deyəndə ki, satılan biletlərin üzərində həmin MMC-nin möhürü var, xanım sözünü dəyişdi: “Zəng vurun Tahirə xanımdan soruşun. Mənim o məsələyə heç bir aidiyyətim yoxdur. Axı bu hadisə çoxdan olub. İndi niyə şikayət edirlər? Soyadımı bilməyə sizin heç bir hüququnuz yoxdur. Bir də bu məsələ ilə bağlı məni narahat etməyin”.
Hər halda, bizə edilən şikayət əsasında aparılan araşdırma nəticəsində bu “layihəyə” cavabdeh olan şəxslərin keçirdiyi narahatlıq və sonra məsuliyyətdən boyun qaçırmaq üçün etdiyi müxtəlif manevrlər ortada böyük bir dələduzluq əməlinin olduğuna şübhə yeri qoymur. Yaxşı olardı ki, əlaqədar hüquq-mühafizə orqanları bu məsələni ciddi araşdırsınlar.
Məhəmmədəli QƏRİBLİ
