Oyuncaqlar hər uşağın sevimli əşyasıdır. Onlar vaxtlarını əyləncəli keçirmək üçün oyuncaqlarla oynayır, onlarla dostlaşırlar. Oyuncaqlar həm də körpələrin zehni inkişaf mənbəyidir. Belə ki, oyuncaqların keyfiyyəti, materialı çox önəmlidir.
Məlumat üçün bildirək ki, SSRİ dövründə oyuncaqlar və uşaq ləvazimatları əsasən İttifaq daxilində istehsal olunurdu. Az bir qismi isə xaricdən idxal olunurdu ki onların da tərkibi və keyfiyyəti ciddi yoxlanılırdı. Lakin Sovet İttifaqının dağılmasından sonra MDB məkanı bir sıra ölkələrin kimyəvi zavodlarının təhlükəli tullantılarından hazırlanmış məhsulların münbit bazarına çevrildi. Bu problem Azərbaycanda da müşahidə edilir. Belə ki, ölkəmizin oyuncaq bazarının çox böyük hissəsini idxal məhsulları təşkil edir.
Qeyd edək ki, bazarda İran, Rusiya, Ukrayna, Almaniya, İtaliya və digər Avropa ölkələrinin istehsalına rast gəlinsə də, bunların həqiqətən həmin ölkələrin istehsalı olduğuna inanmaq olduqca çətindir. Çin istehsalı demək olar ki, liderdir. Bu məhsullara olan tələbat daha çox qiymət ucuzluğu ilə bağlıdır. Son zamanlar aparılan reydlər zamanı satışdan çıxarılan oyuncaqlar da Çin istehsalıdır. Bu oyuncaqların tərkibindəki kimyəvi maddənin çoxluğu nəticəsində oyuncaqlar uşaqların dostuna deyil, onları ölümə sürükləyən düşmənə çevrilir. Bunun üçün oyuncaq alarkən keyfiyyət nişanı tələb etmək, ümumiyyətlə, olduqca diqqətli olmaq lazımdır.
Bəllidir ki, oyuncaq tək bu gün deyil, hər zaman tələb olunan əşyadır. O üzdən, ölkədə yerli oyuncağın istehsal olunması daha münasib olar.
Vahid Əhmədov: “Hardasa fabrik tikib, orada milli oyuncaq istehsalına başlamaq Azərbaycan üçün ciddi problem deyil”
Millət vəkili Vahid Əhmədov qeyd etdi ki, hardasa fabrik tikib, orada milli oyuncaq istehsalına başlamaq Azərbaycan üçün ciddi problem deyil. Bunun üçün Azərbaycanın kifayət qədər maddi vəsaiti də var. Ölkəmizdə bununla məşğul olacaq sahibkarlar yetərincədir. Bu məsələ hökumətin nəzərində olmalıdır. Uşaqlarımızın milli oyuncaqlarımızla böyümələri vacib məsələdir: “Xaricdən gətirilən oyuncaqlar həm tərkibinə, həm də uşaqlara aşıladığı tərbiyə və mədəniyyət baxımından ölkə siyasətinə uyğun deyil”.
Tahirə Əliyeva: “Hazırda yerli istehsal evdə oyuncaq hazırlamaq sayılır, bu isə daxili tələbatı belə təmin etmir”
Ev şəraitində yumşaq oyuncaq düzəldib satışı ilə məşğul olan Tahirə Əliyeva bizimlə söhbətində bildirdi ki, hazırda yerli istehsal yalnız evdə oyuncaq hazırlamaq sayılır: “Bu işlə oyuncaq hazırlamağı bacaranlar məşğul olurlar. Onlar ev şəraitində müxtəlif növ oyuncaqlar hazırlayırlar. Hər bir oyuncağın hazırlanmasına isə 2-3 gün vaxt sərf edilir. Ara-sıra İçərişəhərdə təşkil olunan yarmarkalarda iştirak edirik. Əl işlərinə daha çox xarici vətəndaşlar maraq göstərirlər. Öz vətəndaşlarımız çox az halda alırlar. Ucuz da verə bilmirəm. Çünki oyuncağın yaradılmasında çox əziyyət çəkirəm. Oyuncağın əl işi olduğuna çoxu inanmır. Düzəltdiyim oyuncaq hansısa zavodda istehsal olunan məhsuldan geri qalmır”.
T.Əliyeva onu da vurğuladı ki, yerli istehsal əsasən evdə insanların oyuncaq hazırlayıb satışa çıxarmasıdır. Ancaq bu sahədə çoxlu sayda problem var: “Belə ki, əl əməyi olan məhsulu ucuz qiymətə satmaq mümkün deyil. Həmçinin, hazırladığımız oyuncaqların tanınmasında bizə yardım göstərilmir”.əmç
Natiq Cəfərli: “Azərbaycanda oyuncaq istehsalı yox səviyyəsindədir”
İqtisadçı-ekspert Natiq Cəfərli bizimlə söhbətində qeyd etdi ki, Azərbaycanda oyuncaq istehsalı yox səviyyəsindədir: “Əsasən Çin və Türkiyədən ölkəyə oyuncaq idxal olunur. Bazarda idxal məhsulları üstünlük təşkil edir. Yerli istehsal isə yalnız əl əməyidir. Kimsə öz bacarığı hesabına oyuncaq hazırlayıb bazara çıxarır. Əl əməyinin də həcmi çox azdır. Nəzərə almaq lazımdır ki, bu gün oyuncaq sektoruna böyük tələbat var. Yerli istehsal olarsa, oyuncaq bazarında həm keyfiyyətli məhsul olar, həm də qiyməti ucuz olar. Bu sahəyə maraq azdır. Yaxşı olar ki, sahibkarlar oyuncaq bazarına maraq göstərsinlər. Xarici şirkətlər ölkədə oyuncaq istehsalı üçün sərmayə yatırmalı və yerli sahibkarlarla birgə bu sahə üzrə çalışmalıdırlar.
Günel CƏLİLOVA
