Təhsil Nazirliyi müəllimlərin iş yerini dəyişdirməsi üçün müsabiqəyə start verib. Belə ki, iyunun 3-dən etibarən Təhsil Nazirliyi sisteminə daxil olan ümumtəhsil müəssisələrində müddətsiz müqavilə ilə işləyən müəllimlərin iş yerinin dəyişdirilməsi müsabiqəsinə start verilib. Müsabiqədə iştirak etmək istəyən namizədlər iş yeri diaqnostik qiymətləndirilmədə və ya işə qəbul üzrə müsabiqədə iştirak etdiyi bölmə və ixtisasa uyğun olaraq dəyişdiriləcək.
Vakansiyalara yerləşdirilmə zamanı işə qəbul müsabiqəsi və ya diaqnostik qiymətləndirilmədə toplanan bal əsas götürüləcək. Namizədlər müəllimlərin işə qəbulu üzrə müsabiqədə və ya diaqnostik qiymətləndirilmədə iki və ya daha çox sayda iştirak ediblərsə, üstünlük verdikləri balla müsabiqəyə qatıla bilərlər.
Onu da qeyd edək ki, müsabiqə zamanı bəzi sosial amillərlə əlaqədar namizədlərin topladıqları bal artım əmsalına vurulacaq. Belə ki, əri və ya arvadı hərbçi və ya özü şəhid ailəsinin üzvü olan namizədlərin topladıqları bal 1,1 artım əmsalına, iş yerini özünün faktiki yaşayış yeri və ya qeydiyyatda olduğu ərazidə yerləşən, həvəsləndirmə tədbirləri tətbiq edilən müəssisəyə dəyişdirən namizədlərin topladıqları bal 1,05 artım əmsalına vurularaq hesablanacaq. Hər iki şərti ödəyən namizədlərin topladığı bal isə 1,1 artım əmsalına vurularaq hesablanacaq.
Məlahət Mürşüdlü: “Bu müsabiqələr sayəsində bəzi məktəblərdə hansı fənn üzrə pedaqoq çatışmadığı aydın olur”
Müəllimlərin iş yerini dəyişdirməsi müsabiqəsinin keçirilməsinin əhəmiyyəti barəsində danışan təhsil eksperti Məlahət Mürşüdlü “Bakı-Xəbər”ə açıqlamasında qeyd etdi ki, bu addım çox əhəmiyyətlidir: “Elə müəllimlər var ki, onlar ailə vəziyyətinə görə iş yerini dəyişmək məcburiyyətindədirlər. İş yeri başqa bir ərazidə, özü isə işindən uzaq məsafadə yaşayan pedaqoqların işini dəyişməsi əvvəllər çətin prosedur idi. Ancaq indi Təhsil Nazirliyi bu məsələ ilə bağlı müsabiqə elan edib və iş yerini dəyişmək istəyən pedaqoqlar müsabiqədə iştirak edərək istədikləri ərazinin təhsil müəssisəsində çalışa bilərlər”.
Həmsöhbətimiz onu da vurğuladı ki, müəllimlərin iş yerinin dəyişməsi üçün müsabiqələrin keçirməsi vacibdir. Bu müsabiqələr sayəsində bəzi məktəblərdə hansı fənn üzrə pedaqoq çatışmadığı aydın olur. Belə olduğu halda, namizədlər bölgələr və ya paytaxtda mövcud olan təhsil müəssisələrində hansısa fənn üzrə pedaqoqa ehtiyacı öyrənib o ərazidə çalışmağa maraq göstərəcəklər.
Günel CƏLİLOVA
