Bakıda sürücülərin üzləşdiyi böyük problemlərdən biri də park yerləri ilə bağlıdır. Hər bir parklanma yerində sürücülər, saatından asılı olaraq, 2 manatdan başlayan ödənişlər etməyə vadar edilir. İstər paytaxtın mərkəzi küçələrinə, avtodayanacaq və ya istənilən ticarət mərkəzinə avtomobillə daxil olarkən sürücü giriş üçün parkinq aparatının düyməsini basaraq oradan çek əldə edir. Sürücü ticarət və ya istirahət mərkəzindən çıxarkən parkinq aparatına həmin çeki yaxınlaşdırır, aparat talonu qəbul etdikdən sonra şlaqbaum açılır və o ərazini tərk edə bilir. Müəyyən səbəblərdən çek itirilərsə, sürücü həmin məkandan çıxa bilmir.
Belə olan halda, avtodayanacaq talonunun itirilməsinə görə sürücülər cərimə olunurlar. Cərimənin məbləği 10-15 manat dəyərindədir. Sürücü cəriməni ödəyəndən sonra həmin məkanı tərk edə bilər.
Ancaq avtodayanacaqların sürücülərə təqdim etdiyi talon müqavilə şərti ilə deyil, öz öhdəliklərini yerinə yetirməyə görə verilir.
Əksər hallarda sürücülər, bir qayda olaraq, mübahisə etmədən cəriməni ödəyirlər. Ekspertlər bildirirlər ki, sürücülərin bir qismi qanunu bilmədiklərindən və məbləğin kiçik olduğunu düşünüb cəriməni yerindəcə ödəyib məkanı tərk edir.
Avtodayanacaqlarda parkinq üçün nəzərdə tutulan talonun itməsinə görə sürücülərin 10-15 manat dəyərində cərimələnməsinin qanunsuz olmasını müsahiblərimiz də təsdiqləyirlər.
Azər Allahverənov: “Bu kimi hal vaş verdikdə nəqliyyat vasitəsinin dayanacaqdan çıxması üçün zəruri tədbirlər həyata keçirilməlidir”
Nəqliyyat sahəsi üzrə ekspert Azər Allahverənov “Bakı-Xəbər”ə açıqlamasında qeyd etdi ki, özəl dayanacaqların sahibləri maraqlıdırlar ki, onların sürücülərə təqdim etdikləri talona səliqəli yanaşsın. Həmin talon itərkən texniki cəhətdən müəyyən problem yaradır: “Məlumdur ki, avtodayanacaqlara giriş həmin talon vasitəsilə baş verir. Talon olmazsa, sürücünün o məkanı tərk etməsi mümkün olur, ancaq müəyyən prosedurlar keçdikdən sonra baş verir. Özəl avtodayanacaqlar bu kimi hadisə baş verərsə, qanunsuz əməldən istifadə edirlər. Onlar parkinq üçün sürücülərə verilən talon itirilərsə, müəyyən məbləğdə cərimə ödənəcəyini bildirirlər. Təbii ki, bu qanunsuzdur”.
Həmsöhbətimiz onu da vurğuladı ki, Bakı şəhərində fəaliyyət göstərən avtodayanacaqların birində parkinq üçün sürücülərə verilən talon itirildiyi halda avtomobil sahibi 10-15 manat deyil, 30-50 manat cərimələnir. Hətta bu məbləğ həmin talonun üzərində də qeyd olunur: “Sürücü müəyyən səbəblərdən dayanacağa giriş-çıxış üçün verilən talonu itirdikdə bununla bağlı müəyyən qaydalar tətbiq olunmalıdır. Bu kimi hal vaş verdikdə nəqliyyat vasitəsinin dayanacaqdan çıxması üçün zəruri tədbirlər həyata keçirilməlidir”.
Günel CƏLİLOVA
