Məlumdur ki, Azərbaycanda proporsional üsulla deputat seçilmək mümkün deyil. Yəni qanunvericilik buna imkan vermir. Deputatlar fərdi qaydada namizədliklərini irəli sürüb, öz alternativləri ilə yarşıb estafeti qazanmalıdırlar. Bu da deputat seçilən şəxslə ona səs verən ərazidəki vətəndaşların fərdi ünsiyyətini zəruri edir.
Məhz həmin seçkiqabağı kampaniyaların gedişi zamanı namizədlər seçilmək üçün əhaliyə çoxlu vəd verirlər. Bir çox rayondan edilən şikayətlərin məzmunundan, eləcə də əhali arasında gəzən söhbətlərdən məlum olur ki, seçilən millət vəkillərinin heç də hamısı vədlərinə sadiq olmur. Bu bir tərəfə, hətta elə millət vəkilləri var ki, seçildikləri rayonun, ərazinin mədəni-kütləvi tədbirlərində belə yaxından iştirak etmirlər. Yəni mandatı qazanıb, deputat nişanını döşünə taxandan sonra seçildikləri ərazi ilə “vidalaşmalı” olurlar.
Son vaxtlar millət vəkillərindən edilən ən böyük narazılıqlardan biri də onların ərazidə olan şəhid dəfnlərində iştirak etməməsidir. Hesab edirik ki, bu, daha çox onların qanuni və mənəvi borcudur. Seçildikləri ərazidəki proseslərdə yaxından iştirak etməmək deputatların indiki və gələcək imici, karyerası üçün nə vəd edir?
Elşən Həsənov: “Danışa bilməyən, mediadan qaçan və ən əsası da xeyrə-şərə yaramayan adamın yeri qətiyyən parlament ola bilməz”
Azərbaycan Sosialist Partiyasının sədri Elşən Həsənov qəzetimizə bildirdi ki, deyilən istiqamətdə vəziyyət olduqca acınacaqlıdır: “Mənim özüm də seçkilərdə namizəd olmuşam. Hətta prezident seçkilərində iştirak etmişəm. Bu sahədə olan vəziyyətə yaxşı bələdəm. Əksər rayonlardakı seçicilər öz deputatlarını əllərində çıraqla axtarırlar. Elə dairələr var ki, millət vəkili oradan dalbadal bir neçə dəfə seçilib. Seçicilər deyirlər ki, biz həmin adamın sifətini beş ildə bir dəfə, yalnız seçkidən-seçkiyə görə bilirik. Bəla burasındadır ki, elə deputatların heç səsini də biz eşitmirik. Təsəvvür edin ki, parlamentin əksər deputatlarının adını cəmiyyətə təqdim edəndə heyrət adamı bürüyür və haqlı olaraq belə bir sual ortaya çıxır: yəni belə deputat da var. Gəlin etiraf edək ki, çox az sayda deputat var ki, onlar mediatikdir, tez-tez jurnalistlərin suallarını cavablandırır, sosial şəbəkələrdə öz adları ilə aktivlik nümayiş etdirirlər. Başa düşürük, deputatlarımızın çoxu bu cür fəaliyyətdən yayınmağa üstünlük verir. Bəziləri danışa bilmir, bir çoxu isə hesab edir ki, gizlənmək gözə girməkdən daha optimal variantdır. Bunları başa düşdük. Bəs maraqlıdır, deputatın rayondakı tədbirlərdə iştirak etməsi, xalqın içində olması ilə bağlı nə problem var? Hətta vəziyyət o həddə çatıb ki, bəzi millət vəkilləri seçildikləri ərazidən olan şəhidlərin hüzr mərasimləri, onların dəfnlərində belə iştirak etməkdən yayınırlar. Bu cür fəaliyyət onların nüfuzuna ciddi zərbə vurur. Gələcək talelərinə gəldikdə isə, belələri bir də deputat ola bilməyəcək. Təhlillərim onu deməyə əsas verir ki, növbəti parlamentin tərkibində biz çox fərqli simaları və aktiv insanları görəcəyik. Ölkədəki islahatların gedişi bunu diqtə edir. Danışa bilməyən, mediadan qaçan və ən əsası da xeyrə-şərə yaramayan adamın yeri qətiyyən parlament ola bilməz. Bu cür fəaliyyət həm də günahdır. Axı düşünsünlər ki, onların yerinə başqası olsaydı, yenə kimlərinsə dərdinə əlac ola bilərdi”.
Məhəmmədəli QƏRİBLİ
