İstər dövlət, istərsə də özəl qurumların rəsmi saytları o dərəcədə aktiv fəaliyyət göstərməlidirlər ki, istənilən vətəndaş, eləcə də KİV heç bir problemlə üzləşmədən məlumat əldə edə bilsin. Ancaq təəssüf ki, bir çox dövlət və özəl təşkilatın saytları ölü vəziyyətdədir. Bu da, demək olar ki, hər hansı bir hadisə ilə bağlı yeni məlumatlar almaq məsələsində vətəndaşlar üçün ciddi problemlər yaradır. Bəzi dövlət qurumlarının saytlarındakı informasiyaların tez-tez yenilənməməsi probleminin aradan qaldırılması üçün müvafiq addımlar atılır.
Müəyyən qurumlar var ki, onlar Nazirlər Kabinetinin 2012-ci il 4 sentyabr tarixli, 189 nömrəli Qərarı ilə təsdiq edilən “Dövlət orqanlarının internet informasiya ehtiyatlarının yaradılmasına və idarə edilməsinə dair Tələblər”in 4-cü hissəsinin tələblərinə tam olaraq əməl etmirlər.
Qeyd edək ki, Nazirlər Kabineti “Şəhər və rayon (şəhər rayonu istisna olmaqla) inzibati ərazi vahidi üzrə elektrik enerjisi, qaz və su təchizatı şəbəkələrinin və sistemlərinin, həmin sistemlərdə mövcud qoşulma imkanlarını (sərbəst gücləri) əks etdirən məlumatların mühəndis-kommunikasiya təminatı xidmətləri göstərən təchizat müəssisələrinin internet saytlarına yerləşdirilməsi formasının və müddətinin müəyyən edilməsi qaydaları”nı təsdiqləyib.
Məlumatlara görə, internet saytlarına yerləşdirilmiş məlumatlarda dəyişikliklər baş verdikdə, həmin məlumatların təchizat müəssisələri tərəfindən yenilənməsi 3 iş günü müddətində həyata keçirilir.
Məlumatların təchizat müəssisələrinin internet saytlarına yerləşdirilməsi və yenilənməsi ilə bağlı Energetika Nazirliyi tərəfindən monitorinqlər aparılır.
Təchizat müəssisələri tərəfindən təyin edilən məsul şəxslər məlumatların internet saytlarına yerləşdirilməməsinə və ya yenilənməməsinə görə intizam məsuliyyəti daşıyırlar. Aparılan monitorinqlər nəticəsində məlumatların internet saytlarına yerləşdirilməməsi və ya yenilənməməsi aşkar edildikdə, nazirlik tərəfindən aidiyyəti təchizat müəssisəsinə ünvanlanan məktub əsasında həmin müəssisə tərəfindən təyin edilən məsul şəxslər intizam məsuliyyətinə cəlb edilirlər.
Sözügedən məsələ bir sıra dövlət qurumlarının ölü vəziyyətdə olan veb saytlarının canlandırılmasında nə kimi rol oynayacaq?
Müşfiq Ələsgərli: “Dövlət qurumlarının saytlarına məlumatı vaxtında yerləşdirməyən məsul şəxslərə qarşı xüsusi məsuliyyətin müəyyən edilməsi...”
Mətbuat Şurasının sədr müavini, tanınmış ekspert Müşfiq Ələsgərli “Bakı-Xəbər”ə bildirdi ki, yeni tələblər ictimaiyyəti məlumatlandırmaq səlahiyyətində olan qurumların üzərinə böyük məsuliyyət qoyur. “Azərbaycanda 2005-ci ildə “İnformasiya əldə etmək haqqında” Azərbaycan Respublikasının Qanunu qəbul olunub. 2006-cı ildən isə o qanun qüvvəyə minib. Burada informasiya əldə olunmasının standartları müəyyən edilib. Burada maraqlı cəhət ondan ibarətdir ki, informasiya əldə etmək yalnız mediaya aid deyil, vətəndaşlara da aiddir. Hər bir vətəndaşın istənilən dövlət qurumundan onu maraqlandıran suala cavab almaq hüququ var. İstər dövlət, istərsə də özəl qurumlar olsun, cəmiyyətə gündəlik lazım olan informasiyaları öz saytlarında yerləşdirməlidirlər ki, istənilən vətəndaş onu maraqlandıran sualı həmin təşkilatların veb saytlarına daxil olmaqla əldə edə bilsin. Bu, sadəcə, tövsiyyə deyil, bütün qurumlar qarşısında öhdəlik qoyur ki, onların hər biri özünün veb səhifələrini yaratmalı və onu informasiya ilə zənginləşdirməlidirlər. Əgər bunu etmirlərsə, onda onlarla bağlı hüquqi məsuliyyət yaranır. O informasiya resursları hər gün yenilənməlidir ki, orada yeni informasiyalar olsun. Bu qurumlar özlərinə aid olan bütün informasiyaları həmin resurslarda yerləşdirsinlər. Çox təəssüf ki, bu gün qurumların çoxunun saytları ölü canlara çevrilib. Baxmayaraq onlar saytı yaradıblar, onu guya ki, interaktiv ediblər, ancaq onların fəaliyyətinə aid vətəndaşı maraqlandıran məlumatlar yerləşdirilmir. Bura yerləşdirilən məlumatlar ümumi informasiya yükünün heç 20 faizini təşkil etmir. Ona görə də bu ciddi problemdir və hesab edirik ki, bu sahədə ciddi dəyişikliklər olmalıdır. Çox müsbət haldır ki, 2018-ci ildən başlayaraq bir çox dövlət qurumunda ictimaiyyətlə əlaqələr və mətbuat xidmətləri dəyişməyə başlayıb, bu işə peşəkar jurnalistlər cəlb olunublar” .
M.Ələsgərlinin sözlərinə görə, bu postlara təyin edilən jurnalistlər, mütəxəssislər dövlət qurumlarının saytlarında yenidənqurma işləri aparıb, fəaliyyətlərini operativləşdirəcəklər. Bu sahədə ciddi dəyişikliklərin baş verəcəyinə ümid edən M.Ələsgərlinin sözlərinə görə, bu hazırda özünü o qədər də çox göstərməsə də, gələcəkdə bunun müsbət nəticələrini görəcəyik: “Bu məsələ lazımi səviyyədə həll edilməlidir ki, bəzi biabırçı vəziyyətlər aradan qaldırılsın. Son illər Azərbaycanda baş verən bəzi məsələlərin ictimaiyyətə düzgün çatdırılmamasının səbəbi ayrı-ayrı dövlət qurumlarının saytlarının və həmin qurumların mətbaut xidmətlərinin insanları vaxtında məlumatlandırmamasıdır. Onların operativ işləməməsi problemlər yaranmasına səbəb olub. Bilirsiniz ki, bu yaxınlarda İçərişəhərdə baş verən və böyük səs-küy yaradan hadisədən də gördük ki, zamanında bu məsələ ilə bağlı mətbuat xidməti qurumun saytına məlumat yerləşdirməyib. Bu da çaşqınlıq yaratdı. Dövlət qurumları öz saytlarının fəaliyyətini o qədər operativ qurmalıdırlar ki, vətəndaş maneəsiz informasiya əldə edə bilsin. Hesab edirəm ki, dövlət qurumlarının saytlarına məlumatı vaxtında yerləşdirməyən məsul şəxslərə qarşı xüsusi məsuliyyətin müəyyən edilməsi o qurumların saytlarının canlanmasına səbəb olacaq”.
İradə SARIYEVA
