“Təəssüf edirəm ki, bizim gənclərin xeyli hissəsi bu cür zövqsüz geyimlərdən istifadə edir”
Cəmiyyətimizdə peyda olan yeni geyim dəblərinin bir qismi bizə heç də müsbət şeylər vəd etmir. Son 1-2 ildə Azərbaycanda gənc oğlanların geyim tərzi ciddi şəkildə dəyişməyə başlayıb. Bu xüsusən də özünü paytaxtda daha qabarıq şəkildə büruzə verir. Diqqətçəkən geyim tərzlərindən biri oğlan uşaqlarının, xüsusən də ali məktəb tələbələrinin allı-güllü köynəklər, pencəklər geyinməsidir. Gənc oğlanlar üzərində iri və müxtəlif rəngli gülləri olan köynəklər, koftalar geyməyə üstünlük verirlər. Belə geyim nümunələri hazırda paytaxt mağazalarında kütləvi olaraq satılır.
Oğlanların üzəri güllü köynəklər, pencəklər geyməsinin geniş miqyas alması həqiqətən də narahatlıq doğurur. Vaxtilə qızların, qadınların üzərində “şapan-şapan” gülləri olan donlar, kofta və ətəklər geyinməsi dəbdə idisə, hazırda xanımlar bu tip geyim tərzinə elə də üstünlük vermir, onlar əsasən sadə geyimlərə meyl göstərirlər. Oğlanlar isə, əksinə, sadə geyimlərdən sürətlə uzaqlaşaraq güllü libaslara maraq göstərirlər. Bundan əlavə, bu gün oğlanlar arasında ayaqqabını corabsız geyinmək də dəbə minib. Demək olar ki, gənc oğlanların böyük əksəriyyəti ayaqqabı geyərkən corabdan istifadə etmir.
Oğlan uşaqlarının günü-gündən dəyişən geyim tərzi nə ilə bağlıdır? Onlar hansı səbəbdən güllü geyimlərə üstünlük verirlər?
“Güllü geyimlər geyinən gənc oğlanların geyim tərzini həssaslıqla təhlil etməliyik”
Bakı Milli Geyim Evinin rəhbəri Könül Vəlibəyova bizimlə söhbətində bildirdi ki, son dövrlər gənc oğlanların geyim tərzi həqiqətən də dəyişib. O hesab edir ki, indiki gənclər özlərinə yeni geyim tərzi seçməklə fərqlənmək məqsədi güdürlər. “Zövqlər müxtəlifdir. Müasir gənclər tamamilə fərqlidirlər, onlarla bizim düşüncə tərzimiz, zövqümüz üst-üstə düşmür. Bütün bunların hamısı nədən irəli gəlir? Bu, gənclərimizin təhsili və dünyagörüşü ilə bağlıdır. Səhnə geyimi ilə gündəlik geyim fərqli olmalıdır. Gənclərin corab geyinməməyinə gəlincə, idman ayaqqabısının içinə qısa corab geyinmək olar. Klassik ayaqqabıların içinə isə bizim gənclər qısa corab geyinir. Bu, bütün dünyada dəbdədir. Sadəcə olaraq, onlar geyindiklərini bir-birinə uyğunlaşdıra bilmirlər. Geyimlər bir-birini tamamlamadığına görə də geyimləri şit görsənir. Rəngli köynəklərə gəlincə, bilirsiniz ki, keçən əsrin 80-ci illərində də güllü, bəzəkli-düzəkli köynəklər dəbdə olub. Azərbaycanda həmin dövrdə o cür köynəklər geyiniblər. Dəb zamanla dəyişir, dəbə dönüş olur. Dəb elə bir anlayışdır ki, onun qarşısı alına bilmir və bu, cəmiyyətin fikri ilə yaranmır. Bu bir axındır, biz də düşürük. Bu, hansısa ölkədən, cəmiyyətdən bizə gələn axındır. Xaricdə bu stildə geyənlər var. Amma təəssüf edirəm ki, bizim gənclərin xeyli hissəsi bu cür geyimlərdən istifadə edir. Mənə elə gəlir ki, bu cür gənclərin zövqləri tam formalaşmadığı üçün, onlar geyim baxımından təsir altına düşürlər. Düzdür, bizim zövqlə geyinən gənclərimiz də çoxdur. Güllü geyimlər geyinən gənc oğlanların geyim tərzini həssaslıqla təhlil etməliyik. Çünki bəzən tənqidin özü bir reklamdır. Yəni biz onları tənqid edirik, amma bundan nəticə çıxarmaq əvəzinə, bəzən ondan daha çox yararlanırlar. Biz onları tənqid ediriksə, onlar bu cür geyimləri daha çox geyinə bilərlər. İndiki gənclərdə də belə bir yanaşma var ki, biz daha yaxşı bilirik, özümüz sizdən daha anlayışlı və dünyagörüşlüyük. Bu baxımdan, bizim tənqidimiz onlarda yanlış fikir yarada bilir. Son 6 ay ərzində dünyanın təxminən 20 ölkəsində olmuşam, Avropa ölkələrinə getmişəm. Burada gənclərdə zövqsüz tərzlə rastlaşmamışam. Bizim gənclərin bəzilərinin geyimlərində Şərq üslubu ilə Avropa üslubunu yanlış qarışdırma var. Mənə elə gəlir ki, səhnədə olan gənclərə baxaraq geyim tərzlərini uyğunlaşdıra bilməzlər. Çünki səhnə geyimi ilə adi həyatdakı geyim tərzi fərqlidir”.
K.Vəlibəyova hesab edir ki, bu məsələyə həssas yanaşmaq lazımdır. Gənclərə geyimlərlə bağlı məsləhətlər verməyin vacib olduğunu deyən K.Vəlibəyovanın sözlərinə görə, zaman hər şeyi öz yoluna qoyacaq.
İradə SARIYEVA
