“Müalicə aldığım pansionatdan xoş əhval-ruhiyyə ilə ayrıldım”
Redaksiyamıza şəhid atası Xuduş Ağdamlı tərəfindən Şağan qəsəbəsində yerləşən “Müharibə əlilləri üçün müalicə pansionatı”nın kollektivi tərəfindən ona göstərilən yüksək qayğı ilə əlaqədar təşəkkür məktubu daxil olub. Şəhid atası yazır ki, hər birimiz son illər respublikamızda həyata keçirilən abadlıq-quruculuq işlərinin şahidi oluruq.
Bakıda, Gəncədə, Sumqayıtda, Mingəçevirdə, Naftalanda, Yevlaxda və digər şəhərlərimizdə bu istiqamətdə görülən işlərin əhalinin inkişafına müsbət təsir göstərdiyini yazan X.Ağdamlı bu inkişafın ölkənin səhiyyə sistemində də özünü göstərdiyini qeyd edir. “Müalicə insan sağlamlığı üçün çox vacib amildir. Son illər ölkəmizdə bu sahəyə xüsusi diqqət yetirilir. Mən də respublikamızda tanınan bir sağlamlıq ocağından söhbət açmaq istəyirəm. Şağan qəsəbəsində yerləşən “Müharibə əlilləri üçün müalicə pansionatı”nı deyirəm. Ulu öndərimiz Heydər Əliyevin göstərişi əsasında inşa edilən pansionat 15 ildir fəaliyyət göstərir. Paytaxtımızdan çox uzaq olmayan bu pansionatda müalicə alanlar hər zaman bu səhiyyə ocağı haqqında müsbət fikirlər bildirirlər. 2017-ci ildə 4187, 2018-ci ildə 4508, 2019-cu ilin dördüncü ayında 1284 nəfər əlilliyi olan şəxs burada müalicə alıb. Vaxtaşırı olaraq Prezident İlham Əliyevin və ölkəmizin Birinci vitse-prezidenti Mehriban Əliyevanın, eləcə də Əmək və Əhalinin Sosial Müdafiəsi Nazirliyinin əməkdaşlarının bu səhiyyə ocağına baş çəkməsi təqdirəlayiq haldır”.
X.Ağdamlı qeyd edir ki, pansionatda olan müsbət dəyişikliklər nəzərəçarpacaq dərəcədə özünü büruzə verir. O yazır ki, burada Böyük Vətən Müharibəsi, Çernobl, Əfqanıstan və Qarabağ əlilləri, veteranları, fiziki qüsurlu insanlar müalicə olunur, şəfa tapır və müəssisənin kollektivindən razılıq edirlər. O qeyd edir ki, pansionatın binasında köhnə liftlərin müasir elektron liftlərlə əvəzlənməsi, daxildəki dəyişikliklər, isti və soyuq suyun fasiləsiz verilməsi olduqca müsbət haldır. “Müalicə aldığım günlərdə hər həftə pansionatın direktoru, baş həkimi Pərvanə Hacıyevanın işgüzarlığının da şahidi oldum. Onun xəstələrlə fərdi söhbəti, onlara göstərdiyi diqqət və qayğı, yerməkxanaya tez-tez baş çəkməsi, işçilərlə mehriban münasibəti onun səriştəli və işgüzar bir səhiyyə işçisi olmasını göstərir. Müalicə müddətində xəstələrdən “Allah bu pansionatı tikdirənə rəhmət eləsin”, “Sağ olsun Prezidentimiz və Mehriban Əliyeva”, “Var olsun xalqın qədirbilən oğulları” kimi dualar eşidirəm. Onu da deyim ki, bura öz hesabına ərzaq gətirən xeyirxah oğullar da var. Onlara da təşəkkürümü bildirirəm. Həkimlərdən Məlahət Əliyeva, Rəna Əsgərova, tibb bacıları Samirə Məmmədova, Həqiqət Məmmədova, Səbinə Bayramova, fizioterapevt Vəfa Məmmədəliyeva, “Burulğan” və “Mirvari” vannalarında xidmət göstərən Vüsalə Xanbudaqova, masaj otağında Gülarə Xələfli, Zümrüd Rzayeva, iynə otağında Cəvahir Qasımova, kardioloq “EKQ” Səadət Ələkbərova, idman zalında Mədinə Məmmədova, Arzu Məmmədova, qəbulda Kəmalə Ağasıyeva, inzibatçı Zülfiyyə Bayramova, Zülfiyyə Babayeva öz vəzifələrinin öhdəsindən layiqincə gəlirlər. Bundan başqa, bu səhiyyə ocağında çalışan Fəlakət Əliyeva, Vəsilə Abdıyeva, Məlahət Atayeva, Türbət Məmmədbəyova və başqaları da xəstələrə qayğıkeşliklə yanaşırlar.
“Müharibə əlilləri üçün müalicə pansionatı”nda müalicə alan Naxçıvan, Gədəbəy, Tərtər, Ağdam, İmişli, Bərdə, Masallı, Ucar, Ağdaş və s. regionlardan olan xəstələrlə həmsöhbət oldum. Ağdaşlı II qrup əlil Əvəz Mütəllibov, Nəsib Atakişiyev, Gəncədən Müzəffər Əhmədov, Bakıdan Mehman Şirinov, Tovuzdan I qrup Qarabağ əlili Ramiz Məmmədov müalicədən və pansionatdakı yüksək xidmətdən razılıqlarını bildirdilər.
Mən özüm şəhid atası, 83 yaşlı ahıl, məcburi köçkün, əmək veteranı kimi müalicə aldığım pansionatdan xoş əhval-ruhiyyə ilə ayrıldım. Dövlətimizə minnətdaram ki, vətəndaşlarımızın şəfa tapması üçün belə bir nümunəvi şərait yaradıb”.
Namiq QULİYEV
