Azərbaycanda daha bir tarixi hadisə yaşandı. Mayın 29-da paytaxt Bakı dünyanın ən nüfuzlu idman yarışlarından olan UEFA Avropa Liqasının final oyununa evsahibliyi etdi. Həmin gün dünyanın idman ictimaiyyətinin diqqəti Bakıya yönəlmişdi, milyonlarla insan finalı gözləyirdi.
Nəhayət, çempionluq uğrunda mübarizə aparan London klublarının - “Arsenal”la “Çelsi”nin oyunu gözlənildiyindən də möhtəşəm alındı və Azərbaycan yenidən bütün dünyaya sübut etdi ki, istənilən nüfuzlu tədbiri ən yüksək səviyyədə keçirmək iqtidarındadır.
Möhtəşəm oyunu izləmək üçün ölkəmizə dünyanın dörd bir yanından izləyici gəlmişdi. “Azərbaycan Hava Yolları”nın (AZAL) yaydığı məlumatda qeyd olunur ki, bütün mülki aviasiya strukturları UEFA Avropa Liqasının finalının keçirildiyi dövrdə ölkəyə gələn qonaqlara və idmançılara yüksək səviyyəli xidmət göstərilməsini təmin ediblər. Heydər Əliyev Beynəlxalq Aeroportu 2019-cu il may ayının 27-dən 30-dək, ümumilikdə, təxminən 600 reysə xidmət göstərib. Onlardan 57-si çarter reysləri, 10-u isə “FlyDubai”, “AirArabia”, “SCAT”, “IsrAir”, “Jazeera” və s. kimi aviaşirkətlərin əlavə müntəzəm uçuşlarının payına düşüb.
Açıqlanan statistik rəqəmlərdə qeyd olunur ki, Azərbaycanın əsas hava limanının sərnişin axını Bakıda Avropa Liqası finalının keçirildiyi dövrdə, ümumilikdə, təxminən 60 min nəfər təşkil edib.
Sərnişin axını və uçuş-eniş əməliyyatları üzrə hava limanının infrastrukturunda yüklənmənin pik vaxtı 30 may tarixində müşahidə edilib. Gün ərzində Heydər Əliyev Beynəlxalq Aeroportu 164 reysə və 18 mindən çox sərnişinə xidmət göstərib.
Qeyd olunur ki, paytaxtın hava limanından mayın 30-da rekord sayda - 100-dən çox təyyarə uçuşu həyata keçirilib. Reyslərin çoxu London-Bakı-London marşrutu üzrə həyata keçirilib. Həmçinin, Frankfurt, Vyana, Buxarest, Madrid, Nitsa, Afina, Stokholm, Doha və bir sıra digər şəhərlərdən nümayəndə heyətləri, pərəstişkarlar və azarkeşlər gəliblər.
Ekspertlər Avroliqanın futbol finalı zamanı ölkəmizə 60 min turistin gəlməsinin gözlənilən olduğunu bildirirlər.
Nahid Bağırov: “Final qarşılaşması zamanı ölkəmizə gələn turistlər sayəsində yüksək gəlir əldə etmək mümkün oldu”
Azərbaycan Turizm Assosiasiyasının (AzTA) rəhbəri Nahid Bağırov bildirdi ki, oyunu izləmək üçün ölkəmizə minlərlə turist gəlmişdi: “Final oyunundan bir neçə gün əvvəl belə otellər bron edilmişdi. Demək olar ki, mayın 28-30-da Bakı şəhərində yerləşən otellərdə yer tapmaq qeyri-mümkün idi. Dünya praktikasında elədir ki, futbolu başqa şəhərdə izləmək üçün sıravi adam gələ bilmir. Çünki otelin qiyməti 3-4 dəfə baha olur. Bura gələn azarkeşlər orta və daha yüksək təbəqədir. Sevindirici haldır ki, möhtəşəm bir gün ölkəmizdə reallaşdı”.
N.Bağırov onu da əlavə etdi ki, final qarşılaşması zamanı ölkəmizə gələn turistlər sayəsində yüksək gəlir əldə etmək mümkün oldu: “Aviabilet, qalmaq daxil olmaqla, bu səfər bir turistə minimum 1000 dollara başa gəldi. Bu rəqəmi ölkəmizə gələn turist sayına vurduqda gəlirlərin xeyli olacağını demək olar. Nəzərə almaq lazımdır ki, bu turistlər futbol fanatıdırlar və çılğındırlar. Onlar kədərlənə və sevinə bilərlər”.
Elçin Rüstəmov: “Avroliqanın futbol finalını izləmək üçün ölkəmizə 60 min əcnəbinin gəlməsi turizmin inkişafına böyük təkan verdi”
Turizm sahəsi üzrə ekspert Elçin Rüstəmov bildirdi ki, möhtəşəm idman oyunlarının ölkəmizdə keçirilməsi əhəmiyyətlidir. Bu cür idman oyunları sayəsində həm ölkəmiz beynəlxalq arenada tanınır, həm də çoxlu sayda turist gəlir: “Arsenal”la “Çelsi”nin qarşılaşması, eyni zamanda, Azərbaycanın turizm potensialının inkişafında da xüsusi rol oynadı. Bu oyun sayəsində Bakıya gələnlərin, şəhərimizi, ölkəmizi tanıyanların sayı artdı. Nəzərə almaq lazımdır ki, turistlərin böyük əksəriyyəti Bakıya ilk dəfə gəlirdi. Onlar gördülər ki, Bakı necə gözəl, necə inkişaf etmiş və təhlükəsiz şəhərdir. Beynəlxalq tədbirlər dünyaya ölkənin səviyyəsini nümayiş etdirir. İstənilən beynəlxalq tədbir, həmçinin, idman yarışı yeni dostların qazanılması deməkdir”.
Həmsöhbətimiz onu da vurğuladı ki, ölkəmizə təşrif buyuran turistlər ölkənin adət-ənənələri ilə tanış oldular, gəzməli-görməli yerlərinə baş çəkdilər: “Bu günlərdə ölkəmizə 60 min əcnəbinin gəlməsi turizmin inkişafına böyük təkan verdi. Sırf oyunu izləmək üçün 60 min turistin ölkəmizə gəlməsi ölkə iqtisadiyyatına daxil olacaq valyutanın artmasına səbəb olacaq”.
Ekspert hesab edir ki, ölkəmizə gələcək turistlərin sayı daha da artacaq: “Artıq Azərbaycan xaricilər üçün turizm baxımından əlverişli ölkə kimi xatırlanacaq. Əcnəbilər istirahət üçün ölkəmizə üz tutacaqlar”.
Günel CƏLİLOVA
