Hər gün Azərbaycanın bu və ya digər rayonunda kriminal insidentlərlə bağlı məlumat alırıq. Bölgələrdə müxtəlif növ cinayət hadisələrinin qeydə alınması ilə bağlı kütləvi informasiya vasitələrində informasiya yayılır. Maraqlıdır, Azərbaycanın ən çox və ən az cinayət baş verən rayonu hansıdır?
Daxili İşlər Nazirliyinin rəsmi məlumatı əsasında ən kriminal rayonların siyahısı hazırlanıb. Daxili İşlər Nazirliyinin 2019-cu il yanvar ayında verdiyi rəsmi məlumata görə, 2018-ci ildə əməliyyat-axtarış və istintaq fəaliyyətini həyata keçirən bütün dövlət orqanları üzrə 26381 cinayət qeydə alınıb, onların 84,7 faizinin açılması təmin olunub. Bu cinayətlərin 92,4 faizi daxili işlər və prokurorluq orqanlarının səlahiyyətləri çərçivəsində istintaqı və təhqiqatı aparılan hüquqazidd əməllər olmaqla, onların 89,7 faizini böyük ictimai təhlükə törətməyən və az ağır növlər təşkil edib.
Dövlət Statistika Komitəsinin açıqladığı hesabatda qeyd olunur ki, 2017-ci il ölkədə 26 min 916 cinayət hadisəsi qeydə alınıb və qeydə alınan cinayət hadisələrinin təxminən yarısı - 12 min 693-ü Bakı şəhərinin payına düşüb.
Ümumiyyətlə, Naxçıvan Muxtar Respublikasına daxil olan rayonlarda qeydə alınan cinayət hadisələrinin sayı minimum səviyyədə olub. Muxtar Respublikada ən çox cinayət hadisəsi Naxçıvan şəhərində qeydə alınıb - 10 hadisə.
Rayonlar üzrə qeydə alınan cinayət hadisələrinin sayı bölgələr üzrə fərqlidir. Ən çox cinayət Bakıda qeydə alınıb. Bakı üzrə ən çox cinayət Xətai rayonunda qeydə alınıb. Adıçəkilən rayonda 1554 cinayət hadisəsi baş verib. Ən az isə Pirallahı rayonunda qeydə alınıb. Pirallahıda 59 cinayət hadisəsi yaşanıb.
Bölgələr üzrə isə ən çox cinayət Sumqayıt şəhərində baş verib. Ən az isə Naxçıvan MR, Xızı, Naftalan və Oğuz rayonlarında qeydə alınıb.
Maraqlıdır, eyni ölkədə kriminogen durumun bölgələr arasında fərqli formada qeydə alınmasının səbəbi nə ilə bağlıdır?
Şəmsəddin Əliyev: “Naxçıvan, Xızı, Oğuz və Naftalanda demoqrafik quruluş baxımından kriminogen durum üçün zəmin mövcud deyil”
"Polisə Dəstək" İctimai Birliyinin sədri Şəmsəddin Əliyev “Bakı-Xəbər”ə açıqlamasında qeyd etdi ki, bölgələr arasında kriminogen vəziyyət fərqli formada dəyişir. Bunun da məlum səbəbləri var: “Son zamanlar mediada zorakılığa çağırışlarla bağlı dərc olunan yazılar, video və fotosüjetlər yayımlanması gənclərin düşüncəsinə təsir edir. Eyni zamanda, kriminal aləmin nüfuzlu şəxslərinin cəmiyyətə qəhrəman kimi təqdim olunması gənclərin psixologiyasına təsir edir. Bu kimi faktlar cinayət aləminin genişlənməsinə səbəb olur”. Həmsöhbətimiz onu da vurğuladı ki, cinayət hadisələrinin daha çox qeydə alındığı bölgələrin adı ictimaiyyətə açıqlanıb: “Elə yerlər var ki, orada demoqrafik quruluş digər bölgələrlə müqayisədə fərqlidir. Məsələn, Bakı şəhərində əhalinin çoxluğu baxımından digər bölgələrlə müqayisədə kriminogen durum seçilir. Ancaq Naxçıvan, Xızı, Oğuz və digər bölgələrdə demoqrafik quruluş baxımından kriminogen durum üçün zəmin mövcud deyil. Bu bölgələrdə əsasən xırda xuliqanlıq, oğurluq hadisəsi qeydə alına bilər. Ağır cinayətlər əsasən əhalinin sıx olduğu bölgələrdə baş verir”.
Günel CƏLİLOVA
