Son illər Azərbaycanda fəaliyyət göstərən bank olmayan kredit təşkilatlarının sayı kifayət qədər çoxalıb. Hər addımda "daha aşağı faizlə lombard krediti" elanına rast gəlirik. Bankların bağlanması və ya digərlərinin kredit şərtlərini çətinləşdirməsi də sözügedən sahəyə marağı artırmağa başladı. Əlavə sənəd və iş yerindən arayış tələb olunmadığından, bank olmayan kredit təşkilatlarına müraciət edənlərin sayı artıb. Ancaq bəzi hallarda vətəndaşlar bank olmayan kredit təşkilatlarına kredit götürmək üçün girov qoyduqları qızıl-zinət əşyalarını geri almaqda çətinlik çəkirlər.
Belə bir hadisə bu günlərdə Məmmədova Yaqut Əlyusub qızının başına gəlib. O qeyd edir ki, “ParaBokt”dan kredit götürüb, əvəzində isə qızıllarını girov qoyub. Krediti ödəyib bitirsə də, “ParaBokt” onun zinət əşyalarını geri qaytarmır: “Mən 28 noyabr 2017-ci il tarixdə Sumqayıt şəhərində “ParaBokt”dan qızıllarımın girov qoyulması müqabilində kredit götürmüşəm. 23 may 2019-cu il tarixində kredit borcumu vaxtından əvvəl bağlamışam. Buna baxmayaraq, qızıllarımı hələ də geri ala bilmirəm. Səbəbini soruşanda konkret məlumat verilmir. Gah deyilir inkassator səhvən aparıb Tovuz filialına, gah da deyilir ki, sizin qızıllar baş ofisdədir. Deyirəm gedim özüm baş ofisinizdən qızılımı götürüm, deyirlər olmaz, sizə verilməyəcək. Nə özləri gətirir, nə də imkan vermirlər özüm götürüm baş ofislərindən. Bununla bağlı dəfələrlə “ParaBokt”un “qaynar xətt”inə zəng vursam da, heç bir məlumat verilmədi.
Əminəm ki, mənim kimi digər vətəndaşların da başına belə oyunlar çox açılıb. Əgər belə halların qarşısı müvafiq orqanlar tərəfindən vaxtında alınmasa, nəticələri çox ağır olacaq”.
“ParaBokt” - Ruslan Quliyev: “Bu, daxili sirr olduğu üçün…”
“ParaBokt” bank olmayan kredit təşkilatının Problemli kreditlər şöbəsinin nümayəndəsi Ruslan Quliyev “Bakı-Xəbər”ə açıqlamasında qeyd etdi ki, bu, daxili sirr olduğu üçün, bu barədə heç bir məlumat verə bilməzlər.
Rəşad Həsənov: “Kredit təşkilatı vəsait cəlb edərkən qəbul etdiyi girovu ötürücü formasında digər kredit təşkilatları qarşısında girov kimi təqdim edir”
İqtisadçı-ekspert Rəşad Həsənov bildirdi ki, müştəri ilə kredit təşkilatı arasındakı münasibət müqavilə şərtlərinə uyğun olaraq həyata keçirilməlidir: “Bank olmayan kredit təşkilatı və ya digər kredit təşkilatları müqavilə şərtlərinə riayət etməsə, tərəflər məhkəməyə müraciət edə bilər. Vətəndaşlar kredit təşkilatının müqavilənin şərtlərinə riayət etməməsi ilə bağlı məhkəməyə müraciət edə bilər”.
Həmsöhbətimiz onu da vurğuladı ki, kredit təşkilatı vəsait cəlb edərkən qəbul etdiyi girovu ötürücü formasında digər kredit təşkilatları qarşısında girov kimi təqdim edir. Belə olduğu halda, sözügedən girov başqa bir kredit təşkilatının sərəncamında olur. Müddət bitəndən sonra zinət əşyası kredit təşkilatına qaytarılır, daha sonra isə girov kredit götürən şəxsə geri qaytarılır. Təbii ki, bu vəziyyətin vətəndaşa heç bir aidiyyəti yoxdur. Girov qoyduğu əmlakı geri ala bilmədikdə vətəndaş məhkəməyə müraciət edə bilər.
Günel CƏLİLOVA
