Bakı avtomobil sıxlığı olan şəhərlərdən biridir. Bu istiqamətdə hədsiz dərəcədə yüklənən şəhərimizdə dizellə, benzinlə işləyən köhnə avtomobillər də az deyil. Məlum olduğu kimi, köhnə avtomobillər şəhərin ekoloji vəziyyətinin ağırlaşmasına böyük təsir göstərir. Dizellə işləyən avtomobillərin ekologiyaya vurduğu zərər, onların ətraf mühiti çirkləndirməsi böyük problem kimi diqqəti çəkir.
Hazırda atmosfer havasının çirklənməsinin azaldılması üçün köhnə nəqliyyat vasitələrinin, xüsusilə də dizel mühərrikli avtomobillərin idxalının müəyyən dərəcədə məhdudlaşdırılması istiqamətində işlər görülür. Ekologiya və Təbii Sərvətlər Nazirliyinin Ekoloji siyasət şöbəsinin müdiri Rasim Səttarzadə mətbuata bildirib ki, hazırda atmosfer havasının çirklənməsinin azaldılması üçün müxtəlif istiqamətlərdə tədbirlər həyata keçirilir. O cümlədən, ətraf mühitə və insan sağlamlığına mənfi təsirin azaldılması üçün ekoloji təmiz yanacaq növləri ilə işləyən avtomobillərdən istifadənin təşviq edilməsi ilə bağlı işlər həyata keçirilir. R.Səttarzadənin bildirdiyinə görə, ekoloji cəhətdən təmiz avtomobillərdən (elektromobillər, hibrid avtomobillər, digər alternativ yanacaq növü ilə işləyən) istifadənin təşviq edilməsi işləri aparılır: “Alternativ yanacaq növü kimi sıxılmış təbii qazı misal göstərmək olar. Bu həm avtomobillərin təhlükəsiz istismarı, həm də atmosfer havasına atılan zərərli maddələrin miqdarının kəskin azalması üçün yaxşıdır. Bu da şəhərlərdə, böyük meqapolislərdə ətraf mühit üçün çox vacibdir. Bundan əlavə, sıxılmış təbii qaz digər yanacaq növləri ilə müqayisədə daha ucuzdur və avtomobillərin istismar müddətini də artırır”.
Dizellə işləyən avtomobillərin ölkəmizə idxalına qadağa qoyulacaq. Ekspertlərin fikrincə, benzinlə, dizellə işləyən köhnə avtomobillərin Azərbaycana idxalına qadağa qoyulması reallaşarsa, bunun nəticələri müsbət olacaq.
Nüsrət İbrahimli: “Benzinlə, dizellə işləyən minik avtomobillərinin ömrü başa çatıb, onlar həm ekoloji, həm də digər baxımdan ətraf mühitə, atmosferə zərər vururlar”
Daşınmaz əmlak üzrə ekspert Nüsrət İbrahimli “Bakı-Xəbər”ə bildirdi ki, bu məsələ olduqca aktualdır. “Bilirsiniz ki, bu məsələ ekoloji problemlərlə bağlı qaldırılıb. Köhnə və öz istismar müddətini başa vurmuş avtomobillər Bakı kimi iri şəhərlərdə ekoloji problemlər yaradırlar. Yəni bütün iri şəhərlərdə bu cür avtomobillərdən istifadəyə və onların idxalına məhdudiyyətlər qoyulur. Bizdə də düzgün olaraq məsələ qaldırılıb ki, dizellə işləyən köhnə avtomobillərin ölkəmizə idxalı qadağan olunsun. Hesab edirəm ki, bu, düzgün qərar olardı. Bu gün Bakı həm əhali, həm də avtomobil baxımından kifayət qədər yüklənib. Ümumiyyətlə, ictimai nəqliyyat sahəsində standartlara uyğun bir şərait yaratmaq lazımdır. Bir də ki, benzinlə, dizellə işləyən minik avtomobillərinin ömrü başa çatıb, onlar həm ekoloji, həm də digər baxımdan ətraf mühitə, atmosferə zərər vururlar. Buna görə də artıq bütün dünya tədricən elektriklə, hibrid yanacaqla işləyən avtomobillərə keçir. Biz də onlardan geri qalmamaq üçün dizellə işləyən köhnə avtomobillərin ölkəmizə gətirilməməsi barədə fikirləşməliyik” - deyə N.İbrahimli qeyd etdi.
İradə SARIYEVA
