“Azərbaycan Respublikasında fiziki şəxslərin problemli kreditlərinin həlli ilə bağlı əlavə tədbirlər haqqında” Prezident fərmanının icrasına başlanıldığı gündən əhalinin bəzi banklardan narazılığı artmaqda davam edir.
Biz bu istiqamətdə apardığımız araşdırmalar zamanı müəyyən etmişik ki, vətəndaşlara dövlət tərəfindən müəyyən edilən kompensasiyaların ödənişində daha çox problemlərin yaşandığı banklardan biri “Unibank”dır. Bizə olunan şikayətlər daha çox bu məzmundadır. Vətəndaşlar qeyd edirlər ki, saytda adlarına müəyyən məbləğ kompensasiya müəyyən edilsə də, onların adına olan borc qrafasında 0 rəqəmi yazılsa da, “Unibank” onlardan faiz tutumunu davam etdirir. Araşdırmamız zamanı çox maraqlı məlumatlara rast gəlmişik. Məsələn, bank bir müddət əvvəl bəzi müştərilərini çağırıb dollar kreditini manata keçirməyi təklif edərkən, bununla razılaşan müştərilərin adına, sən demə, yeni kredit müqaviləsi rəsmiləşdiriblər. Yəni artıq dövlətin etdiyi güzəşt yeni müqaviləyə şamil olunmadığı üçün, müştəri məcburdur ki, dövlətdən aldığı kompensasiyanı başqa müqavilənin faizinə ödəsin.
Bizə müraciət edən vətəndaş İradə Kərimova bildirir ki, o, “Unibank”dan 4 min dollardan bir az artıq məbləğdə kredit götürüb: “Devalvasiyadan sonra ödənişi edə bilmədim. Onlar məni məhkəməyə verdilər. Məhkəmənin qərarı ilə mənim əməkhaqqımın 50 faizi tutulub banka verilirdi. Prezident fərman verəndən sonra mənə 1128 manat kompensasiya yazılıb. Maraqlıdır ki, həmin məbləğdən 705 manat mənim “Bank of Baku”ya olan borcuma görə çıxılıb. Halbuki, mən ora ödənişimi edirdim. Bunu çıxmaqla “Bank of Baku” krediti bağlayıb. Mən başa düşə bilmirəm, mənim “Unibank”a olan borcuma görə təyin edilən kompensasiya niyə başqa banka ödənilməlidir? Hətta çıxılandan sonra yerdə qalan 423 manatı belə “Unibank” mənə ödəmək istəmir. Saytda mənim kredit borcumun qalmadığı göstərilir. Mənə heç bir mesaj gəlmədiyi üçün məsələmlə maraqlandım. Deyiblər ki, mənim banka guya 800 manat borcum qalıb. Axı hansı borcdan söhbət gedə bilər? Saytda mənim borcumun olmadığı yazılır. Prosesə 3 gün qalıb. Maraqlıdır, mənim “Unibank”a borcum varıydısa, elə kompensasiyadan ödəyəydilər də. Niyə başqa banka köçürürdülər? Çox xahiş edirəm, mənə köməklik edin. Mesaj gəlmədiyi üçün, apelyasiyaya da verə bilmirəm”.
Yaranmış vəziyyət, xüsusilə də vətəndaşa müəyyən edilən kompensasiyanın başqa yerlərə transfer edilməsinin nə dərəcədə qanuni olub-olmamasını dəqiqləşdirmək üçün “Unibank”ın mətbuat xidmətinin rəhbəri Sülhiyə Şirinova ilə əlaqə saxladıq. O, “Bakı-Xəbər”ə açıqlamasında bildirdi ki, belə köçürmələrin mümkünlüyü fərmanda da öz əksini tapıb: “Fərqi yoxdur hansı banka görə kompensasiya müəyyən edilib. Həmin məbləğdən başqa bankın borcları da çıxıla bilər. Borcların çıxılması, hara yönəldilməsi ilə bağlı məsələni bank yox, Palata həll edir. Bizim vəzifəmiz budur ki, yerdə qalan son məbləği ödəyək. Bizdən bu istiqamətdə şikayətin çox olması da təbiidir. Çünki ən çox kredit götürən müştərisi olan bank bizik. Kompensasiyalardan hansı halda silinmənin getməsi ilə bağlı mən sizə bankımızın uyğun sahəyə cavabdeh olan şəxsinin mövqeyini təqdim edə bilərəm”.
Bankın Satış və xidmətə dəstək departamentinin müdiri Mikayıl Məmmədovun sözlərinə görə, fərmanın əhatə etdiyi ən çox müştəri sayı “Unibank”ın payına düşür: “Fərmanın vacibliyini, istər müştərilər, istərsə də bank sektoru üçün böyük əhəmiyyətini ilk gündən dərk edərək, bütün resurslarımızı fərmanın icrasının vaxtında bitməsi üçün səfərbər etmişik.
Kompensasiya siyahısında olan hər bir müştərimizin dövlətin ona ayırdığı vəsaiti vaxtında alması üçün bank olaraq bir çox tədbirlər həyata keçiririk. SMS göndərməklə kifayətlənməyərək, bu həftənin əvvəlindən müştərilərə birbaşa zənglər edirik. Bank əməkdaşları müştərilərin sistemdəki əlaqə nömrələrinə zəng edərək, kompensasiyalarını götürmələri üçün filiala dəvət edirlər. Bu zənglər zamanı biz gözləmədiyimiz vəziyyətlə qarşılaşdıq. Məlum oldu ki, bir sıra müştərilərin ona kompensasiya hesablandığından, ümumiyyətlə, xəbəri yoxdur. Bank əməkdaşının zəngindən sonra müştəri filiala gəlib ona çatan məbləği götürür. Kompensasiya alacağını məhz “Unibank” əməkdaşının zəngindən öyrənən onlarla müştərimiz oldu. Birbaşa zəng zamanı bəzi müştərilərimizdən bankdan gələn kompensasiya məbləğini bildirən SMS-i oxumadıqlarını deyənlər də oldu. Məlumatsız olan bu müştərilərə xəbər vermək və onlara düşən vəsaiti əldə etmələrinə yardımçı olmaq bizi çox sevindirir. Bank olaraq bütün müştərilərimizin prosesin sonunadək kompensasiya məbləğini əldə etməsində maraqlıyıq.
Son günədək biz qalan bütün müştərilərimizlə əlaqə yaratmağa çalışacağıq. Əlaqə saxlanması heç cür mümkün olmayan müştərilərə hesablanmış kompensasiya məbləğləri onların bankımızda olan hesabına köçürüləcək və müştəri istənilən vaxt gəlib bu vəsaiti hesabından götürə bilər”.
“Hansı hallarda müştəriyə hesablanmış kompensasiya onun borcuna silinə bilər” sualına isə bank rəsmisi belə cavab verib: “Cənab Prezidentin fərmanında da qeyd olunduğu kimi, kompensasiyaların ödənişində əsas məqsəd müştərilərin kredit yükünün azaldılması, üzləşdiyi maliyyə itkisinin qarşısını almaqdır. Kompensasiya məbləğindən silinmələr yalnız müştərinin gecikmədə olan və ya məhkəmə qərarı olan krediti üzrə aparıla bilər. Bu proses isə müştərinin kredit yüklülüyünün azaldılmasına, məhkəmədə olan işlərin azalmasına xidmət edir. Gecikdirilən borcdan əlavə məbləğ isə müştərinin özünə qaytarılır. Heç bir gecikməyən kredit üzrə silinmə ola bilməz və olmayıb”.
Məhəmmədəli QƏRİBLİ
