Azərbaycan Milli Kulinariya Mərkəzinin rəhbəri Tahir Əmiraslanovla bağlı aidiyyəti beynəlxalq təşkilatlara şikayətlər daxil olması barədə xəbərlər yayılıb. Uzun illərdir Azərbaycan milli kulinariyasının yaşadılmasında, mətbəx mədəniyyətimizin qorunmasında və təbliğatında əhəmiyyətli rol oynayan T.Əmiraslanov haqqında kimlər Dünya Kulinariya Təşkilatında mənfi rəy yaratmaq məqsədi güdür?
Azərbaycanın Milli Kulinariya Mərkəzinin rəhbəri, ölkəmizin baş kulinarı, Dünya Kulinariya Assosiasiyasının nüfuzlu üzvü Tahir Əmiraslanov “Bakı-Xəbər”ə bildirdi ki, bu əməli ona qarşı “sapı özümüzdən olan balta”lar törədib.
“Bu böhtan və şər kampaniyasını aparmaqla məni beynəlxalq təşkilatda nüfuzdan salmaq, neytrallaşdırmaq məqsədi güdürlər”
T.Əmiraslanovun sözlərinə görə, o, bu məsələnin hüquq müstəvisində həll edilməsini istəyir. Bununla əlaqədar artıq məhkəməyə də müraciət etdiyini dedi.
“Xəyanətin detalları haqqında qısa məlumat verə bilməyəcəyəm. Amma bununla bağlı faktlarımız, sənədlər, səs materialları var. Həmin faktlar məhkəməyə də təqdim edilib. Mediadan xahiş edirəm, tək mənim sözlərimi deyil, faktları da dərc etməyə maraqlı olsunlar. Mən bu faktları jurnalistlərlə bölüşə bilərəm”.
T.Əmiraslanov, həmçinin, vurğuladı ki, Dünya Kulinariya Təşkilatına şikayət məktubu imzalayanlar sırasında azərbaycanlıların da olması onu təəssüfləndirir. Bunun bir erməni oyunu olduğunu və bizimkilərin də, ya bilərəkdən, ya da bilməyərəkdən, bu oyuna qoşulmasının böyük təxribat xarakteri daşıdığını vurğulayan T.Əmiraslanov bildirdi ki, bütün bunlar ona qarşı bir xəyanətdir. “Bu bir erməni planıdır. Məqsəd də məni oradan uzaqlaşdırmaqdır. O insanlar ermənilərlə əlbir olub barəmdə Beynəlxalq Kulinariya Təşkilatına həqiqətə uyğun olmayan sözlər yazıblar. Həmin məktubda yazırlar ki, guya mən rüşvətxoram, qohumbaz və yerlibazam, gənclərə işləmək üçün şərait yaratmıram. Bunların hamısı ağ yalandır. Bu böhtan və şər kampaniyasını aparmaqla məni beynəlxalq təşkilatda nüfuzdan salmaq, neytrallaşdırmaq məqsədi güdürlər. Hazırda Ermənistan həmin quruma üzv olmaq istəyir, onlar o quruma üzv olan kimi bütün qədim Azərbaycan xörəklərinin ermənilərin milli xörəkləri olduğunu iddia edəcəklər, hətta bunun təsdiqlənməsinə də nail olacaqlar. Nə qədər ki, mən o qurumda təmsil olunuram, ermənilər heç bir şey edə bilmirlər. Çünki lavaşın ermənilərə aid olmadığnı, eyni zamanda da dolmanın milli Azərbaycan xörəyi olduğunu sübut etdik, UNESCO-ya saldırdıq. Bundan sonra ermənilər mənə qarşı daha böyük təxribatlara əl atdılar. Ermənilər özlərinə güclü sponsor tapıb Azərbaycan mətbəxi əleyhinə həmin qurumda işlər görəcəklər. 2004-cü ildə Beynəlxalq Kulinariya Təşkilatına biz sədrlik etməli idik. Təəssüf edirəm ki, bəzi azərbaycanlılar da ermənilərə qoşulublar. Konkret olaraq Milli Mətbəxin və Qastronomik Turizmin Təbliğatı Təşkilatının sədri Fərhad Aşurbəyli və onun müavini Orxan Muxtarov mənim əleyhimə yazılan şikayət məktubuna imza atıblar. Hazırda iş Yasamal Rayon Məhkəməsindədir. Bu məktubla bağlı təkzib verilməlidir” - deyə T.Əmiraslanov vurğuladı.
Yazıda adı keçənlərin də mövqeyini dərc edə bilərik.
İradə SARIYEVA
