Demək olar ki, hər gün olmasa da, günaşırı müxtəlif saytlarda, xüsusən də sosial şəbəkələrdə Azərbaycanın orta ümumtəhsil məktəbləri və məktəblilər baradə heç də ürək açmayan məlumatlar yayılır. Son zamanlara qədər şagirdlərin intihar məsələləri şişirdilmiş formada təqdim edilirdisə, indi də naməlum məktəblilərin intim videolarının mövcud olduğu haqqında xəbərlər sosial şəbəkələri zəbt edib. Səhər-səhər gündəmlə tanış olmaq üçün bəzi saytlara və sosial şəbəkələrə daxil olmaq kifayət edir ki, bu cür xəbərlərlə tanış olasan.
Sosial şəbəkələrdə yayılan məlumata görə, iki yeniyetmə məktəbli qızın intim görüntüləri mövcuddur. Xəbəri yayanların bildirdiyinə görə, guya bu videoda yer alan görüntülər o qədər qeyri-etik, açıq-saçıqdır ki, onu sosial şəbəkələrə qoymayıblar. Video haqqında bəhs edilən məlumatda deyilir ki, naməlum məktəbin naməlum iki qız şagirdi hər gün məktəbin yaxınlığındakı həyətlərdən birinə gəlir və burada intim münasibətdə olurlar (?). Ümumiyyətlə, belə bir hadisənin baş verib-vermədiyi məlum deyil, heç o videonun mövcudluğu da inandırıcı görünmür. Bu, sadəcə olaraq, məktəbləri və məktəbliləri qaralamaq, şantaj etmək, kimlərisə təşviş içində saxlamağa xidmət edir.
Azərbaycan məktəblərini və məktəblilərini hansı qüvvələr hədəfə alır? Nə üçün son dövrlər orta məktəblər və şagirdlər haqqında xoşagəlməz informasiyalar sosial medianın gündəmindən düşmür?
Fatimə Hacıbəyli: “Bəziləri Azərbaycanı istəməyən qara qüvvələrin bizim məktəblərlə və məktəblilərlə bağlı həyata keçirmək istədikləri çirkin işlərə bu yolla dəstək olurlar”
“Vəfa” Sosial İctimai Birliyinin sədri Fatimə Hacıbəyli bizimlə söhbətində bildirdi ki, son dövrlər məktəblərin və məktəblilərin bu və ya digər formada hədəfə alınması olduqca mənfi haldır. Azərbaycanda orta ümumtəhsil sistemini gözdən salmağa cəhd edən qüvvələrin olduğunu istisna etməyən F.Hacıbəyli qeyd etdi ki, bəzən bilərkdən və bilməyərəkdən ayrı-ayrı saytlar, sosial şəbəkə istifadəçiləri də həmin qüvvələrin istəyini həyata keçirirlər. “İki yeniyetmə məktəbli qız haqqında bu cür məlumatın sosial mediada yer almasını normal qəbul etmirəm. Yazırlar ki, adı, ünvanı məlum olmayan məktəbin iki qız şagirdi “intim əlaqəyə” giriblər. Bu cür xəbəri tirajlamaq, sensasiya naminə, oxucu cəlb etmək üçün yalandan istifadə etmək düzgün deyil. Bu, Azərbaycan məktəblərinin və məktəblilərinin gözdən salınmasına, bütövlükdə, orta ümumtəhsil sisteminin şübhə altına alınmasına yönəlik məsələdir. Guya ki, həmin videogörüntü hansısa saytın redaksiyasındadır və onlar bunu qeyri-etik olduğu üçün yaymırlar. Ümumiyyətlə, bəlkə də heç elə bir hadisə baş verməyib və bu barədə ortada video da yoxdur. Sadəcə, bəziləri Azərbaycanı istəməyən qara qüvvələrin bizim məktəblərlə və məktəblilərlə bağlı həyata keçirmək istədikləri çirkin işlərə bu yolla dəstək olurlar. Azərbaycan məktəblisini, yeniyetməsini bu cür təqdim etmək olmaz, bu, ən azından, mənəvi cinayətdir. Hər baş verən hadisəni sensasiyalı xəbərə çevirmək, onu tirajlamaq, yaymaq olmaz”.
F.Hacıbəylinin sözlərinə görə, bu xəbərlərin yayılması düşmən dəyirmanına su tökməyə xidmət edir. Onun dediyinə görə, bu kimi neqativ təqdimatlar Ermənistan mediasında da işıqlandırılır və Azərbaycana qarşı istifadə edilir. “Bu cür informasiyalar yaymaqla biz Azərbaycanı anbaan izləyən xarici qüvvələrin əlinə fürsət veririk. Onlar bizim medianı yaxından izləyirlər. Kim təminat verə bilər ki, xarici qüvvələr bu tip xəbərlərdən ölkəmizə, cəmiyyətimizə qarşı istifadə etməyəcəklər. Ermənistan mətbuatında belə xəbərlər dərc edilir, yayılır və Azərbaycandakı “mövcud vəziyyət” kimi təqdim edilir. Nə bilirik, bəlkə sabah Ermənistan mətbuatı yazacaq ki, Azərbaycanda cinsi azlıqların sayı artır. Bəs onda nə olacaq? Sosial media yaydığı hər bir məlumata, xəbərə ehtiyatla yanaşmalıdır. Ona görə ki, bizimlə bağlı hər bir informasiya kənarda şişirdilir. İki qızın “intim əlaqəyə girməsi” məsələsindən də bizə qarşı istifadə edə bilərlər” - deyə F.Hacıbəyli vurğuladı.
Nərgiz Allahverdiyeva: “Çox zaman həqiqəti əks etdirməyən belə xəbərlər məqsədli şəkildə yayılır”
Uşaq və yeniyetmələrlə bağlı bu cür xəbərlərin yayılmasının mənfi hal olduğunu deyən psixoloq Nərgiz Allahverdiyevanın sözlərinə görə də eynicinsli yeniyetmələrin intim videosunun mövcud olmasını gündəmə gətirmək düzgün deyil. “Hesab edirəm ki, bu kimi məlumatlar məqsədli şəkildə yayılır. Bir çox hallarda bu məlumatların əsası olmur. Bu gün sanki bəzi qüvvələr məktəblərlə, məktəblilərlə ciddi psixoloji mübarizə aparırlar. Gah bəzi məktəblilərin məktəbdə, sinif otaqlarında “əxlaqsızlıq etdiyini” yazırlar, gah da onların məktəbdən kənarda bu işlə məşğul olduqlarını deyirlər. Belə halın baş verməsi reallığı əks etdirmir, çünki məktəblərdə mövcud olan şərait, nəzarət qaydaları buna imkan vermir. Ümumiyyətlə, məktəblilərin bu şəkildə təqdim edilməsi mənfi haldır və bu, o xəbərlərlə tanış olan yeniyetmələrin psixikasına mənfi mənada ciddi təsir göstərir. Bilirsiniz, çox zaman həqiqəti əks etdirməyən belə xəbərlər məqsədli şəkildə yayılır və bu, yeniyetmələri bu cür neqativliklərə yönəltməyə xidmət edir” - deyə N.Allahverdiyeva qeyd etdi.
İradə SARIYEVA
