Azərbaycan Dövlət Mədəniyyət və İncəsənət Universitetində (ADMİU) abituriyentlər üçün xüsusi qabiliyyət imtahanları keçirilir. Abituriyentlər test imtahanları verməmişdən əvvəl ADMİU-da təşkil edilən qabiliyyət imtahanlarında iştirak edirlər. Onların aktyorluq, rejissorluq qabiliyyətləri incəsənət xadimləri tərəfindən qiymətləndirilir.
ADMİU-nun müvafiq fakültələrinin tələbələri olmaq istəyən abituriyentlərdən qabiliyyət imtahanlarını kimlər götürür?
Məlumatlara görə, qabiliyyət imtahanlarına Azərbaycanın görkəmli kino və teatr xadimləri, aktyorlar, rejissorlar cəlb edilmirlər. Bunu dolayısı ilə Xalq artisti, “Şöhrət” ordenli görkəmli aktyor Rasim Balayev də mətbuata verdiyi açıqlamada təsdiqləyib. R.Balayev qabiliyyət imtahanları ilə bağlı iradlarını bildirərkən deyib ki, artıq Azərbaycan Dövlət Mədəniyyət və İncəsənət Universitetinin qəbul imtahanlarında iştiraka dəvət almır. R.Balayev gələcək aktyorların seçim sistemindən narazıdır. Aktyor hesab edir ki, Azərbaycan teatrı və kinosunda artıq uzun müddətdir sakitlik hökm sürür. O bunun səbəbini gələcək aktyorların seçiminin düzgün aparılmaması ilə izah edib. R.Balayevin sözlərinə görə, Azərbaycan Dövlət Mədəniyyət və İncəsənət Universitetinə, Bakı Rəssamlıq Akademiyasına, Milli Konservatoriyaya daxil olan insanlar digər imtahanları da verməlidir və insanların istedadını nəzərə almaq lazımdır: “Bir dəfə məni Mədəniyyət və İncəsənət Universitetinin qəbul imtahanında iştiraka dəvət etdilər. Mən bir neçə iradımı bildirdim və görünür, bu, kiminsə xoşuna gəlməyib. Bundan sonra daha məni çağırmadılar. Onda mən digər mədəniyyət xadimləri ilə birlikdə həqiqi aktyorluq istedadı olan beş gənci seçmişdim. Lakin sonra bildim ki, onlar test imtahanları zamanı lazımi balı toplamadıqlarına görə universitetə daxil ola bilməyiblər. Qız və oğlanların əksəriyyəti aktyorluq istedadı olmaya-olmaya Mədəniyyət və İncəsənət Universitetinə daxil olurlar. Çünki oranın balları yüksək deyil. Hər bir insan peşə seçərkən öz qabiliyyətinin bu və ya digər ixtisasa uyğun gəlib-gəlmədiyini nəzərə almalıdır”.
R.Balayevin iradlarının haqlı olduğunu deyən bəzi rejissor və aktyorlar hesab edirlər ki, qabiliyyət imtahanlarının götürülməsində görkəmli kino və teatr xadimlərinin iştirakı təmin edilməlidir. Ümumiyyətlə, çox zaman qabiliyyət imtahanlarında ADMİU-nun orta səviyyəli sənət sahibi olan müəllimlərinin iştirak etdiyini bildirən mütəxəssislər hesab edirlər ki, bu, kinoya və teatra istedadı olmayan gənclərin gəlməsinə səbəb ola bilər.
Gülşən Kəngərli: “Abituriyentlərdən qabiliyyət imtahanlarını bizim universitetin öz müəllimləri götürür”
ADMİU-nun prorektoru Gülşən Kəngərli isə “Bakı-Xəbər”ə bildirdi ki, bu ali məktəbdə keçirilən qabiliyyət imtahanlarına kənardan mütəxəssis dəvət edilmir. “Abituriyentlərdən qabiliyyət imtahanlarını bizim universitetin öz müəllimləri götürür, biz bu işə kənardan aktyor, rejissor cəlb etmirik” - deyə o qeyd etdi.
Elçin Cəfərov: “Qəbul imtahanlarında iştirak edən şəxslərin adları məxfi məlumatdır”
Azərbaycan Dövlət Mədəniyyət və İncəsənət Universitetinin mətbuat xidmətinin rəhbəri Elçin Cəfərov isə bizimlə söhbətində bildirdi ki, qəbul imtahanlarında iştirak edən şəxslərin adları ictimaiyyət üçün açıqlanmır: “Qəbul imtahanlarında iştirak edən şəxslərin adları məxfi məlumatdır və bu barədə informasiya verə bilmərik”.
Zülfiyyə Eldarqızı: “Mən bu universitetdə işlədiyim dövrdə qəbul imtahanlarına əsasən universitetin öz müəllimləri düşürdü”
ADMİU-nun sabiq müəllimi, sənətşünaslıq üzrə fəlsəfə doktoru Zülfiyyə Eldarqızı isə “Bakı-Xəbər”ə Xalq artistinin iradı ilə bağlı bildirdi ki, ADMİU-da abituriyentlərdən qabiliyyət imtahanlarını təsadüfi adamlar götürmür. O qeyd etdi ki, onun bu ali məktəbdə çalışdığı illərdə abituriyentlərdən respublikanın tanınmış mədəniyyət və incəsənət xadimləri qabiliyyət imtahanları götürüblər. Qəbul prosedurlarının ilbəil dəyişdiyini deyən Z.Eldarqızının sözlərinə görə, bu imtahanları əsasən ADMİU-nun müəllimləri götürüb: “Mən bu universitetdə işlədiyim dövrdə qəbul imtahanlarına əsasən universitetin öz müəllimləri düşürdü. Bu ali məktəbdə görkəmli sənət adamları, əməkdar və xalq artistləri dərs deyir. Mən özüm də qəbul imtahanlarına düşmüşəm. Ali məktəbin rəhbərliyi dəyişdikdən sonra, bildiyim qədər, qəbul imtahanlarını götürən mütəxəssisləri kənardan cəlb edirlər. Kənardan gətirilən mütəxəssislər də mədəniyyət və incəsənətimizin görkəmli simalarıdır. Onlardan xalq artistləri Şəfiqə Məmmədovanın, Cənnət Səlimovanın, Bəhram Osmanovun və başqalarının adlarını çəkə bilərəm. Ola bilsin, görkəmli sənətkarımız Rasim Balayev qəbul imtahanlarına düşməyib. Ümid edirəm ki, Rasim Balayevin də imtahanda iştirakı təmin edilər. Hansısa bir tanınmış sənətkar orada iştirak etmirsə, bu o demək deyil ki, abituriyentlərdən imtahan götürənlər zəif sənətkarlardır. Əlbəttə, görkəmli aktyorumuz Rasim Balayevin gələcək aktyor və aktisaların seçimində iştirakı bizə müsbət mənada çox şey qazandırar” - deyə Z.Eldarqızı bildirdi.
İradə SARIYEVA
