Yaxın müddət ərazində Azərbaycanda bütün sənədsiz evlərə sənəd veriləcək. İllərdir sənədsiz mənzildə yaşayan vətəndaşların problemi öz həllini tapacaq. Qeyd edək ki, sənədsiz evlərin özəlləşdirilməsi ilə bağlı Prezident İlham Əliyevin tapşırığı olub. Tapşırığa əsasən, Bakıda olan sənədsiz evlərin siyahısı hazırlanacaq.
Onu da bildirək ki, Əmlak Məsələləri Dövlət Komitəsi özbaşına və sənədsiz inşa edilmiş tikililərin sənədləşdirilməsi ilə bağlı konsepsiya hazırlayır
Komitənin yaydığı məlumatda qeyd olunur ki, bir çox hallarda, vətəndaşlar kənd təsərrüfatı təyinatlı torpaqlarda, mühafizə zolaqlarında yaşayış və ya qeyri-yaşayış evləri inşa edirlər, buna görə də onların qeydiyyatı qanunvericiliklə mümkün olmur.
Bəllidir ki, bu gün Bakı və ətraf ərazilərdə yaşayış üçün icazə verilməyən yerlərdə, yüksək gərginlikli elektrik xətlərinin altında evlər inşa olunub. Bu tip evlərin qeydiyyatının mümkün olmadığı haqqında məlumatlar yayılır.
Vüqar Bayramov: “70 minə yaxın mənzil inşaata icazə verilməyən və ya nisbətən risqli hesab edilən ərazilərdədir”
İqtisadçı-ekspert Vüqar Bayramov bildirdi ki, Azərbaycan Prezidentinin sənədsiz evlərin özəlləşdirilməsi ilə bağlı problemin həll edilməsi barədə tapşırığından sonra bu məsələ ilə əlaqədar formalaşdırılmış komissiyanın fəaliyyətinin güclənməsi hiss olunur: “İqtisadi və Sosial İnkişaf Mərkəzi (CESD) 2014-cü ildə sənədsiz inşa edilmiş tikililərin sənədləşdirilməsi ilə bağlı təkliflər paketini Azərbaycan hökumətinə təqdim edib: “Təklif etdiyimiz mexanizmlə bağlı son həftələr məsul dövlət qurumlarında görüş və müzakirələrimiz olub. Əvvəla bizim təkliflərimiz əmlak amnistiyasını nəzərdə tutur. O baxımdan yaxın zamanda sənədsiz əmlaka amnistiya verilməsi məqsədəuyğun olardı. İlkin monitorinqlər göstərir ki, Bakı və ətrafdakı ərazilərdə sənədsiz həyət evlərinin sayı 450 mindir. Onların 70 minə yaxını inşaata icazə verilməyən və ya nisbətən risqli hesab edilən ərazilərdədir. Bunlar yüksək gərginlikli elektrik, mavi qaz, yaxud su xətlərinin yaxınlığında olan evlərdir. Əgər elektrik, ya da su xəttinin istiqamətini dəyişmək mümkündürsə, o zaman evlərə toxunulmasın. Bununla da həmin ərazi təhlükəli zona anlayışından çıxarılsın. Amma su, qaz xəttinin üstündə tikilən evlərə real təhlükə varsa, ev sahiblərinə kompensasiya ödənilməklə evlərin köçürülməsi təmin edilsin”.
Həmsöhbətimiz onu da vurğuladı ki, mənzil sahiblərinin günahı deyil ki, bələdiyyə onlara sənəd verib, onlar da həmin sənədlə evlərini özəlləşdirə bilmirlər: “Əgər bu cür sənədlərlə evi özəlləşdirmək mümkün deyilsə, həmin sənədlər verilməməli idi. Xüsusən də ev sahiblərinin həmin sənədləri müəyyən xərc bahasına aldıqları da nəzərə alınmalıdır. Bizim mexanizm ondan ibarətdir ki, evlərin rəsmiləşdirilməsi üçün çox simvolik məbləğ müəyyənləşdirilməli və məbləğ ev sahibi üçün hər hansı bir ağırlıq yaratmamalıdır. Məbləğ ödənildikdən sonra evlərin qeydə alınması və "kupça" ilə təmin olunması prosesi başlanmalıdır. Əslində, bu prosedur dövlətin özü üçün də əhəmiyyətlidir. Bir tərəfdən ev sahiblərinin mülkiyyət hüquqları təmin edilir, digər tərəfdən də əmlak vergiyə cəlb olunur. Ona görə problemin həlli dövlət qurumlarının özünün marağında olmalı və onlar qısa zamanda məsələnin aradan qaldırılmasına çalışmalıdırlar”.
Günel CƏLİLOVA
