18/06/2019 13:31
728 x 90

Avroliqanın futbol finalına görə Azərbaycanın gömrük, vergi və viza qanunvericiliyində dəyişikliklər - nə əldə edəcəyik…

img

Məlum olduğu kimi, mayın 29-da Azərbaycanın evsahibliyi ilə UEFA Avropa Liqasının final oyunu Bakı Olimpiya Stadionunda keçiriləcək. Dünyanın diqqət mərkəzində olan final oyunun ölkəmizdə keçirilməsi əlamətdar bir hadisədir. Ölkəmizdə keçiriləcək Avropa Liqasının final oyununa ciddi hazırlıq işləri həyata keçirilir.

Azərbaycan Respublikasının Prezideni İlham Əliyevin sərəncamı ilə Avroliqanın final oyunu və “UEFA 2020″nin oyunları ilə bağlı malların idxalı gömrük rüsumundan azad edilib. Eyni zamanda,  Prezidentin sərəncamı ilə vergi qanunvericiliyinə dəyişiklik edilib və bunun nəticəsində də "Avropa Liqasının finalı və AVRO-2020-nin final mərhələsinin oyunları zamanı vergi güzəştləri tətbiq olunacaq. Prezident İlham Əliyev, həmçinin, UEFA Avropa Liqasının final oyununun 2019-cu ildə Bakı şəhərində təşkili və keçirilməsi ilə bağlı Azərbaycan Respublikasına gələcək əcnəbilər və vətəndaşlığı olmayan şəxslər üçün viza prosedurlarının sadələşdirilməsi haqqında sərəncam imzalayıb.

Bu, Azərbaycan dövlətinə nə verəcək?

  • Elçin Mirzəbəyli: “Bu sənədlərin imzalanması, gömrük və vergi güzəştlərinin tətbiqi, viza rejiminin sadələşdirilməsi bu mötəbər oyunu izləməyə gələn insanların rahatlığının təmin olunması üçün atılan addımdır”

“Xalq cəbhəsi” qəzetinin baş redaktoru, politoloq Elçin Mirzəbəylinin sözlərinə görə, bu, Azərbaycan xalqının qonaqpərvərliyinin bir daha nümayiş etdirilməsidir. E.Mirzəbəyli, həmçinin, hesab edir ki, ölkə başçısının bu istiqamətdə imzaladığı sərəncamlar Prezidentin humanistliyindən xəbər verir: “Şübhəsiz, Azərbaycan hər zaman beynəlxalq tədbirlərə evsahibliyi edəndə təkcə prosesin özündə deyil, prosesin başlanğıcında da mühüm işlər görür. Təbii ki, belə nüfuzlu oyunun daha yüksək səviyyədə təşkil olunması üçün bütün lazımi addımları atır. Cənab Prezidentin imzaladığı sərəncamlar, əslində, ölkəmizin idmana olan münasibətini göstərir. Eyni zamanda, bu sənədlərin imzalanması, gömrük və vergi güzəştlərinin tətbiqi, viza rejiminin sadələşdirilməsi bu mötəbər oyunu izləməyə gələn insanların rahatlığının təmin olunması üçün atılan addımdır. Həmçinin, bu sərəncamların mahiyyətində Azərbaycan xalqının uzun əsrlərdən bəri daşıdığı qonaqpərvərlik ənənəsinin mövcudluğu dayanır. Biz qonağa yüksək qiymət vermişik və Azərbaycan da öz qonaqpərvərliyi, öz humanist mahiyyəti ilə hər zaman fərqlənib. Bu da ölkəmizin növbəti atdığı addımlardan biridir”.  

  • Natiq Cəfərli: “Belə praktika Azərbaycanda əvvəlki beynəlxalq yarışlar zamanı da mövcud olub”

Tanınmış iqtisadçı Natiq Cəfərli də hesab edir ki, tətbiq olunan güzəştlərdən Azərbaycan müsbət mənada çox şey qazanacaq: “Əslində, Avropa Birliyi ölkələri, Amerika, Çin və Yaponiya ilə viza rejiminin tam ləğv edilməsinin gündəmə gəlməsi daha doğru olardı. Bu bizim üçün turizm baxımından çox vacib amillərdən biridir. Viza rejiminin “ASAN xidmət”ə verilməsi və “ASAN viza”ya keçid Azərbaycana gələn turistlərin artımına səbəb oldu. Biz yaxşı təqdimat etsək, turistik xidmətlərin çoxçeşidliliyini artıra bilsək və sənədləşmə işlərini qaydasına qoysaq, turizm sahəsində yüksək nəticələr əldə edə bilərik. Bu da əlavə iş yerləri, büdcə qazancları, vergi ödəmələri deməkdir. Belə praktika Azərbaycanda əvvəlki beynəlxalq yarışlar zamanı da mövcud olub. Həm İlk Avropa Oyunlarında, həm İslam Oyunlarında viza rejimində müəyyən güzəştlərin tətbiq edildiyini gördük. Sonradan isə “ASAN viza” xidməti işə düşdü. Vergi güzəştlərinin tətbiq edilməsinə və Avroliqanın final oyunu və “UEFA 2020″nin oyunları ilə bağlı malların idxalının gömrük rüsumundan azad edilməsinə gəlincə, bunun büdcəyə elə də ciddi bir təsiri olmayacaq. Əksinə, turistlərin və oyuna baxmağa gələnlərin sayının artmasına səbəb olacaq. Oyuna baxmağa gələnlərin sayı haqqında müxtəlif rəqəmlər səsləndirilir. Təkcə çarter reyslərinin sayı 43 olacaq. Yəni söhbət 20-30 min azarkeşin Azərbaycana gəlməsindən gedir. Ortalama hər bir azarkeşin də 1000 dollara yaxın vəsait xərcləmək potensialı olduğunu nəzərə alsaq, o otellərdə, restoranlarda, kafelərdə əlavə dövriyyənin yaranmasına və həmin təşkilatların vergi öhdəliklərinin, eyni zamanda, dolayısı ilə büdcəyə əlavə vergi daxilolmalarının artmasına səbəb olacaq. Final oyunun Bakıda keçirilməsi bu günə qədər Azərbaycanda keçirilən digər idman yarışlarından daha çox büdcə və gəlirlilik nöqteyi-nəzərindən Azərbaycana xeyir verə bilər”.

İradə SARIYEVA 

Son xəbərlər