Son günlərdə paytaxt Bakının mərkəzi küçələrində, eləcə də park və xiyabanlarında sahibsiz itlərin kütləviləşdiyinin şahidi oluruq. Əlbəttə, bu cür itlər quduzluq, ya da yoluxucu xəstəliklərin daşıyıcısı ola bilər. Həmçinin, tez-tez sahibsiz itlərin ətrafdakı insanlara hücum etməsini müşahidə edirik. Bu da insanların, xüsusən də valideynlərin narazılığına səbəb olur.
Məlumdur ki, əvvəllər küçə itlərini güllələyir, öldürürdülər. Lakin məlum olduğu kimi, Azərbaycan 1997-ci ildə Strasburqda "Heyvanların Mühafizəsi" ilə bağlı Avropa Konvensiyasına qoşulub, 2007-ci ildə ölkəmizdə "Heyvanların mühafizəsi haqqında" Qanun qəbul olunub. Qanuna əsasən, heyvanları öldürən və yaxud onlarla qəddar rəftar edib şikəst edən şəxslər İnzibati Xətalar Məcəlləsinin 129-cu maddəsinə əsasən cərimə olunurlar. Cərimə isə əvvəllər 25-45 manat arasında dəyişirdisə, hazırda bu məbləğ 500 manatdır. Həmçinin, yarış, satış və digər heyvanların təbii imkanlarını artırıb-azaltmaq üçün onlara preparatların verilməsi, tibbi-texniki üsulların tətbiqinə görə 200 manat cərimə nəzərdə tutulub. Ev heyvanlarının görünüşünün dəyişdirilməsi və yaxud müalicə məqsədi daşımayan cərrahi əməliyyat aparmaq, o cümlədən, heyvanın qulaqlarını kəsmək, dırnağını və ya dişlərini çıxartmaq, səsini batırmaq üçün edilən və sairə kimi xoşagəlməz davranışlar üçün də 200 manat cərimə nəzərdə tutulub. Heyvanların ölkədən çıxarılması və ya gətirilməsi qaydalarını pozanlar isə 100-300 manat arasında cərimə oluna bilər. Bu səbəbdən küçə itləri öldürülmür və onlarında sayı günü-gündən artır.
Açıqlanan statistik rəqəmlərə əsasən, Bakıda 1 milyon sahibsiz küçə iti varmış. Paytaxtda mövcud olan sahibsiz itlərlə bağlı "Toplan" Sahibsiz İtlərə Qayğı Mərkəzinin xarici şirkətlə birgə apardığı araşdırmaların nəticəsi açıqlanıb. Araşdırma nəticəsində Bakıda 1 milyona yaxın sahibsiz küçə itinin olduğu müəyyənləşib.
Monitorinq qrupunun üzvləri media nümayəndələrinə bildirib ki, təcili tədbir görülməzsə, sahibsiz küçə itləri Bakı sakinlərinin təhlükəsizliyi üçün böyük problemə çevriləcək. Bu səbəbdən də Mərkəz tərəfindən küçə itlərinin toplanması işləri sürətləndirilib, briqadaların sayının artırılması qərara alınıb.
Qeyd edək ki, "Toplan" briqadaları ərazilərə başçəkməni vətəndaşlardan daxil olan şikayətlər əsasında həyata keçirirlər. Bütün monitorinqlər aktlaşdırılır.
Açıqlanan statistik rəqəmlərdə 1 milyon sahibsiz küçə itinin olduğu qeyd olunur. Ancaq bu qədər itin paytaxt Bakı ərazisində olması şübhə doğurur. Ekspertlər bildirirlər ki, Bakı əhalisinin sayı 2 milyon 274 min nəfərdir. Paytaxt əhalisinin sayı 2 milyondan çox olduğu halda, sahibsiz küçə itlərinin sayının 1 milyon olması təəccüb doğurur.
Vüsalə Ali: “Bakı əhalisinin sayı 2 milyondan artıq olduğu halda, 1 milyon sahibsiz itin olması şübhə doğurur, onda belə çıxır ki, 2 nəfərə 1 it düşür?”
Ekspert Vüsalə Ali “Bakı-Xəbər”ə açıqlamasında qeyd etdi ki, itlərin sayının dəqiq nə qədər olduğu heç kimə bəlli deyil: “Məlumdur ki, Bakı əhalisinin sayı 2 milyondan artıqdır. Onda belə çıxır ki, 2 nəfərə 1 it düşür?
Bəllidir ki, itlər ildə bir dəfə balalayır. Ancaq nəzərə almaq lazımdır ki, it il ərzində 6 və ya daha çox balalaya bilər. Sahibsiz küçə heyvanlarının dəqiq sayını müəyyən etmək çətindir. Çünki hər qəsəbədə, küçədə sahibsiz küçə itlərinin sayı yetərincədir. Onların dəqiq sayını heç həmin əraziyə nəzarət edən sahə nümayəndələri də bilmirlər. Yaxşı olar ki, sahibsiz küçə heyvanlarının dəqiq qeydiyyatı aparılsın”.
Günel CƏLİLOVA
