Son illər Azərbaycana turist axını müşahidə olunur. Azərbaycan üçün turizm baxımından prioritet olan ölkələrin İran, Rusiya, Türkiyə, Gürcüstan, Çin, Fars körfəzi ölkələri, xüsusilə də BƏƏ, Küveyt, Qətər və Səudiyyə Ərəbistanı olduğu söylənir. Nazirlikdən bildirilib ki, Fars körfəzi ölkələrindən gələnlər son illər çoxluq təşkil edir.
Bir qayda olaraq, kütləvi turist axını olan ölkələrdə turizm yerli əhalinin mədəniyyətinə, həyat tərzinə öz təsirini göstərir. Belə ki, hər bir turist başqa ölkəyə getdikdə öz mədəniyyətini təbliğ edir.
Təbii ki, turistlərin ölkəyə axını iqtisadiyyata, ticarət dövriyyəsinə, ölkədə fəaliyyət göstərən kafe, restoran, otellərin qazanclarına müsbət təsir göstərir. Bunu qeyd etdiyimiz obyektlərin sahibləri də təsdiq edirlər. O da bəllidir ki, hər bir turist öz ölkəsinə geri qayıdarkən istirahət etdiyi ölkədən xatirə olaraq nəsə alıb aparır. Əvvəllər ölkəmizə gələn turistlər daha çox Azərbaycan adət-ənənəsini təbliğ edən, ölkəmiz haqqında məlumatlar əks olunan xırda suvenirlərə üstünlük verirdilər. Azərbaycanı tanıdıqca, xarici turistlər ölkəmizin daha çox məhsullarını əldə etmək istəyirlər. Artıq bu sıraya Azərbaycanda istehsal olunan təbii qida məhsulları da daxildir. İndi əcnəbi turistlər bura gələrkən daha çox çay və bal məhsulu alıb aparmağa üstünlük verirlər.
Tursitlərin Azərbaycan çayı və balına maraq göstərməsi sevindiricidir. Onların ölkəmizdən alıb apardığı yerli məhsul yaşadıqları ölkədə də tanınacaq və beləliklə, çay və digər məhsullardan istifadə etmək üçün ölkəmizə gələcək xarici turistlərin sayı artacaq.
Maraqlıdır, turistlərin çay və bala maraq göstərməsi adıçəkilən məhsulların istehsalına və qiymətinə necə təsir edəcək?
Natiq Cəfərli: “Turistlər tərəfindən kütləvi şəkildə bal və çay alınıb xaricə aparılarsa, bu hal istehsala və qiymətə təsir edər”
İqtisadçı-ekspert Natiq Cəfərli bizimlə söhbətində qeyd etdi ki, turistlərin Azərbaycan istehsalı olan məhsullara üstünlük verməsi sevindiricidir: “Turistlərin Azərbaycan çayı və balını alıb öz ölkələrinə aparması ölkənin tanıdılması baxımından əhəmiyyətlidir. Turistlər tərəfindən kütləvi şəkildə bal və çay alınıb xaricə aparılarsa, bu hal istehsala və qiymətə təsir edər. Ancaq, indiki halda, turistlərin aldığı məhsulun həcmi o qədər də böyük deyil ki, həm istehsala, həm də yerli istehlakçılara təsir göstərsin. Gələcəkdə Azərbaycandan alınıb aparılan bal və ya çayın həcmi artarsa, bu, istehsalata və qiymətə də təsir edər”.
Həmsöhbətimiz onu da vurğuladı ki, hər iki istiqamət üzrə ixracat da var. Çay ixracatında qeydə alınan rəqəmlər normal səviyyədədir. İqtisadçının fikrincə, Azərbaycan istehsalı olan çay və balın həm keyfiyyəti, həm də qiyməti turistləri cəlb edir.
Ceyhun Aşurov: “Azərbaycana gələn turistlər öz ölkələrinə qayıdanda ən çox çay və bal alıb aparırlar”
Turizm sahəsi üzrə ekspert Ceyhun Aşurov bildirdi ki, Azərbaycana gələn turistlər öz ölkələrinə qayıdanda ən çox Azərbaycan çayı və balını alıb aparırlar. Onun sözlərinə görə, ölkəmizə gələn turistin hansı ölkədən olması onun alıb apardığı məhsula da təsir edir. Belə ki, ölkəmizə gələn ərəb turistlərinin ən çox aldıqları məhsullar çay və baldır: “Rusiyalı və avropalı turistlərə gəlincə isə, onların Azərbaycandan daha çox suvenir alıb apardıqları bildirilir”.
Ceyhun Aşurovun sözlərinə görə, Azərbaycan mürəbbələri də turistlər arasında olduqca populyarlıq qazanıb”.
Günel CƏLİLOVA
