Ekologiya və Təbii Sərvətlər Nazirliyinin şöbə müdiri Mirsalam Qənbərov mətbuata açıqlamasında deyib ki, son 3 ildə Azərbaycanda istehsal olunduğu ölkədə istismar müddəti başa çatmış və ekoloji tələblərə cavab vermədiyi üçün istifadəsi qadağan edilmiş nəqliyyat vasitələrinin sayı 2,5-3 dəfə artıb.
Belə nəqliyyat vasitələrinin 40 faizinin müəyyən müddətdən sonra tullantıya çevrildiyini deyən nazirlik rəsmisi qeyd edib ki, hesablamalara görə, 1991-1992-ci illərdə Azərbaycanda atmosferə atılan tullantıların 85-90 faizi stasionar mənbələrin, yəni sənaye müəssisələrinin, az hissəsi isə nəqliyyat vasitələrinin payına düşürdü. Bu gün isə bunun əksi olaraq, ölkədə atmosferə atılan zərərli qazların çox hissəsi - 75 faizə qədəri nəqliyyat vasitələrinin payına düşür.
O da məlum olub ki, sənaye müəssisələrinin daha mütərəqqi texnologiyalar əsasında yenidən qurulması nəticəsində ətraf mühitə daha az tullantı buraxılır. Ancaq köhnə nəqliyyat vasitələri ekologiyaya daha çox zərər vurur. Bu gün Azərbaycana idxal edilən nəqliyyat vasitələrinin 80 faizdən çoxu işlənmiş, ekoloji tələblərə uyğun gəlmədiyindən, istifadə olunduğu ölkələrdə istismarına qadağa qoyulan maşınlardır. İnkişaf etmiş ölkələrdə ekoloji tələblərə uyğun olmayan maşınların istifadəsi məsələsinə ciddi diqqət yetirilir, maşınların ekoloji tələblərə uyğun olması tələbi qoyulur, onlar ətraf mühit üçün problem yaratdıqda istismardan çıxarılır.
Ümumilikdə, belə avtomobillər əsasən köhnə 05 və 06 markalı “Jiquli”lərdir ki, görürsən isti havada mühərriki işə düşmür. Nəticədə yolda tıxac yaranır. Sözügedən avtomobillər ekologiyaya zərər vurmaqla yanaşı, insanların həyatı üçün də təhlükə yaradır. Çünki həmin avtomobillərin iştirakı ilə baş verən qəzaların nəticəsi daha ağır olur. O üzdən, avtomobil parkını necə yeniləmək olar?
Azər Allahverənov: “Reallıq ondan ibarətdir ki, belə avtomobillər həm ekologiyaya zərər vurur, həm də qəza risqini artırır”
Sözügedən məsələni dəyərləndirən nəqliyyat sahəsi üzrə ekspert Azər Allahverənovun fikrincə, avtomobil parkında ekoloji tələblərə cavab verməyən xeyli sayda belə maşın var: “Zaman-zaman Dövlət Yol Polisi bununla bağlı ekoloji postlarda reydlər keçirir. Müşahidələr göstərir ki, belə avtomobillər həqiqətən də çoxdur. Belə avtomobil sahiblərinə bunun aradan qaldırılması ilə bağlı xəbərdarlıq edilir, əks halda isə avtomobil sahibləri cərimə olunur. Digər tərəfdən, hər il avtomobillər texniki baxışdan keçirilir. İstehsal ilindən asılı olaraq, avtomobillər texniki baxışdan keçirilir. Bununla bağlı çatışmazlıqlar aşkar olunanda avtomobil sahibinə tövsiyələr verilir. Reallıq ondan ibarətdir ki, belə avtomobillər həm ekologiyaya zərər vurur, həm də qəza risqini artırır. Belə halların qarşısını almaq üçün müvafiq qurumlar nəzarəti artırmalıdırlar. Belə avtomobil sahibləri cərimələnməlidirlər. Fikrimcə, mərhələ-mərhələ ölkənin avtomobil parkı yenilənməlidir”.
Rəsul Cahangirli: “Buraxılış ilindən asılı olaraq, belə avtomobillərin istismarı qadağan edilməlidir”
Digər ekspert Rəsul Cahangirli isə hesab edir ki, sözügedən avtomobillərin istismarına qadağa qoyulmalıdır: “Buraxılış ilindən asılı olaraq, belə avtomobillərin istismarı qadağan edilməlidir. Çünki ilbəil belə avtomobillərin sayı artır. Bu da narahatlıq doğurmaya bilməz. Xüsusən də sovet dönəmində istehsal olunan və tələblərə cavab verməyən avtomobillərin istismarı qadağan edilməlidir. Yalnız bu minvalla problemi həll etmək olar”.
Vidadi ORDAHALLI
